Бæрæгбонон мадзæлттæ

Республикæ Хуссар Ирыстоныл 27 азы сæххæсты цытæн бæрæгбонон мадзæлттæ райдайдзысты 19 сентябры паддзахаддзинады сæйраг символ – Паддзахадон тырысайы бонæй. Нæ Паддзахадон тырысайы бон фыццаг хатт нысан æрцыд  2013 азы, фæлæ нæ националон символ та ссис 1989 азы.

Нæ горæты Театралон фæзуаты Республикæ Хуссар Ирыстоны Паддзахадон тырысаимæ рацæуынимæ айзæлдзæн бæстæйы гимн дæр.

Нæ горæты фæндзæм астæуккаг скъолайы боны 12 сахатыл уагъд æрцæудзæн Республикæ Хуссар Ирыстоны паддзахадон символты фæдыл национ диктант.

Бæрæгбон æнæ хорзæхтæй нæ фидауы, уыцы бон 13 сахатыл уагъд æрцæудзæн Паддзахадон хорзæхтæ дæттыны церемони.

Анахарсисы номыл республикон национ библиотекæйы конференц-залы боны 14 æмæ 15 сахаттыл уагъд æрцæудзысты Цыбырты Людвиг æмæ Дзиццойты Юрийы чингуыты презентацитæ. Цыбырты Людвигы чиныг у РХИ-йы Адæмон нывгæнæг Хъотайты Григолы сфæлдыстады цытæн. Уым ма фадат уыдзæн Григолы конд нывтимæ базонгæ уæвынæн.

Дзиццойты Юрийы чиныг та у «Вопросы осетинской филологии».

Бæрæгбон æнæ культурон мадзæлттæй нæ фидауы, – куыд горæты, афтæ районты дæр уагъд цæудзæн хиирхæфсæн мадзæлттæ.

Адæмон инструментты ансамбль «Айзæлд»-ы концертмæ изæры 18 сахатыл бакæсæн уыдзæн нæ горæты киноконцертон зал «Чермен»-ы.

Ленингоры районы та æнгæс концерт уагъд цæудзæн УФ-йы Национ гвардийы зард æмæ кафты ансамблы хъæппæрисæй.

20 сентябры бæрæгбоны сæйраг хай – Республикæйы боны цытæн Цхинвалы æфсæддон гарнизоны парад – уагъд æрцæудзæн райсомы 11 сахатыл. Йæ хæдфæстæ, æхсæнады минæвæртты демонстраци «Æз хъусын фидæнæй нæ зарæг».

Цхинвалы районы Къостайыхъæуы бæрæгбоны цытæн уагъд цæудзæн стыр этнографион бæрæгбон ахæм номимæ «Фыдæлты бынтæ». Уым ма байгом уыдзæн «Цхинвайлаг Арбат» дæр.

Изæры 17 сахатыл Алина Кабаевайы номыл спорты галуан «Олимп»-ы уагъдцæуæг гала-концерты алы æмбæстагæн дæр фадат уыдзæн Галаты Барисы номыл «Симд» æмæ УФ-йы Национ Гвардийы кафт æмæ зарды ансамблы артистты арæхстдзинадмæ бакæсынæн.

Бæрæгбоны кæройнаг мадзал – бæрæгбонон салют уагъд æрцæудзæн изæры 19 сахатыл.

Паддзахадон нысаниуæгджын мадзæлттæ ауадзын æмæ цæттæ кæныны фæдыл республикон къамис сиды алы æмбæстагмæ дæр, цæмæй хъæлдзæг æмæ райдзастæй арвитой æмæ хайад райсой нæ республикæйы боны цытæн бæрæгбонон мадзæлтты.