Куыд бирæ æндæр бæстæты, афтæ Хуссар Ирыстоны дæр цытимæ нысан æрцыдис Стыр Фыдыбæстæйон хæсты фæуæлахизы 72 азы цытджын бæрæгбон. Ацы бæрæгбон хорз банысан кодтой горæтон библиотекæйы кусджытæ дæр. Ам хъуыстысты хæстыл, уæлахизыл фыст ирон æмæ уырыссаг зарджытæ, йæ кусджытæ библиотекæмæ алы бацæуæгæн дæр сæ риуыл кодтой «Георгиевская лента»-тæ.
Библиотекæйы кусæг Гуыззыдтаты Этер куыд банысан кодта, афтӕмӕй, ацы хъарм, райдзаст æмæ рæсугъд уалдзыгон бон нӕ зæрдæты агайы ныр 72 азы. Уал азы размæ дæрæн æрцыд фашизм.
Мадзалы хайадисджыты фылдæр хай кæстæр кълæсты ахуыргæнинæгтæ кæй уыдысты, уымӕ гӕсгӕ Этер лæмбынæгдæр æрдзырдта, фашистон Германы ныхмæ ирон адæмы хъайтарон тохы æмæ нæ хæстонты архайды тыххæй. Уый ма банысан кодта, зæгъгæ, Стыр Фыдыбæстæйон хæсты активон хайад райстой нæ интеллигенцийы минæвæрттæ, уыцы нымæцы нæ фысджытæй дӕр бирæтæ, куыд, зæгъæм, Асаты Реуаз, Букуылты Алыкси, Бекъойты Амыран, Гæбæраты Никъала, Гаглойты Федр, Бæззаты Кавказ, Джусойты Нафи, Мæргъиты Къоста æмæ бирæ æндæртæ.
Библиотекæйы кусæг Гæбæраты Дианӕ та æрыгон фæлтæртæн лæмбынæг радзырдта, Стыр Фыдыбæстæйон хæсты сылгоймæгтæ нæлгоймæгты ӕмрӕнхъ цы хъæбатырдзинæдтæ æвдыстой, уыдон тыххæй.
Уый фæстæ нæ хъæбатыр хæстонтыл фыст æмдзæвгæтæ æмæ зарджытæ æххæст кодтой нæ горæты скъолаты кæстæркъласонтæ Хъоцыты Владик, Тедеты Арсен, Плиты Мария, Зассеты Аделинæ, Коцты Людæ, Къæбысты Кристинæ æмæ æндæртæ.
Мадзалы хайад райста æмæ дзы раныхас кодта Хуссар Ирыстоны Культурæйы министрады кусæг Дриаты Нателӕ. Уый банысан кодта, зæгъгæ, ахæм мадзæлттæ цæттæ кæнын æмæ уадзынæн ис стыр хъомыладон нысаниуæг. Уымæн æмæ нæ хистæрты хъæбатырдзинæдтæ æмæ сгуыхтдзинæдтæ мах куыд зонæм, афтæ сæ хъуамæ зоной нæ кæстæртæ дæр. Базондзысты сæ æрмæстдæр уæд, кæд æмæ нæ ауæрдæм нæ тыхтæ, нæ зонындзинæдтыл.
Мадзалы кæрон библиотекæйы кусджытæ лæвæрттæ радтой йæ хайадисджытӕн.
Гæззаты И.
Comments are closed, but trackbacks and pingbacks are open.