Цхинвалы районы Ходы хъæуы ауагъд æрцыд джип-триал РХИ-йы Хæдбардзинад банымайыны боны цытæн. Машинæтыл зынцæуæн фæндæгтыл ерысты гом кæнынмæ æрбацыд Республикæйы Президент Бибылты Анатоли æмæ ерысты хайадисджытæн йæ цæст бауарзта æнтыстытæ, афтæ ма банысан кодта, Республикæйы цы бæрæгбон нысан чындæуы, уый ахсджиагдзинад.
«Хуссарирыстойнаг æмæ уæрæсейаг хæстонты хъæбатырдзинад ма хъуамæ рох кæнæм. Уæрæсейы æххуысы руаджы 2008 азы Хуссар Ирыстоны адæм фервæзтысты скуынæг кæнынæй æмæ Уæрæсейы Федерацийы æххуысы руаджы махæн нæ бон у нæ сывæллæтты сабыр арвы бын хъомыл кæнын», – загъта Президент.
Джиппингы организатор, зынцæуæн фæндæгтыл ерысты клуб «Скиф – 4х4»-йы сæрдар Лæууойты Сева хайадисджытæн загъта æнтыстыты фæндиæгтæ æмæ сын ауагъта инструктаж. Трассæйыл цы ныхдуртæ ис, уыдонимæ базонгæ уæвыны фæстæ зынцæуæн фæндæгтыл цæуæг машинæты шофыртæ райдыдтой ерыс кæнын. Экстремалон уавæрты машинæскъæрджытæ уыдысты, куыд хуссарирыстойнæгтæ, афтæ Цæгат Кавказы рес-публикæты Цæгат Ирыстон, Цæцæн, Кæсæг-Балхъар, Дагестан æмæ Черкескы минæвæрттæ дæр. Æдæппæт уыдысты 30 хайадисæджы.
Ерысты фæстиуæгæн «экстрим» æмæ «стандарт»-ы категориты уæлахизуæвджытæ систы цæгатирыстойнæгтæ Артем Дигоев æмæ Сергей Камилин. «Спорт» æмæ «туризм» номинациты та фæуæлахиз сты хуссарирыстойнæгтæ Кокойты Батрадз æмæ Кокойты Александр.
Банысан кæнын хъæуы уый, æмæ ахæм ерыстæ республикæйы уагъд кæй цыдысты цыппæрæм хатт.
Comments are closed, but trackbacks and pingbacks are open.