30-æм марты официалонæй байгом суаруадзæн завод «Родник Осетии». Завод конд æрцыд нæ горæты БАМ-ы районы. Куыд зонæм, афтæмæй ацы проект реализаци æрцыд «Владимирский стандарт»-ы руаджы. Ин-вестор нæ республикæмæ хуынд æрцыд реалон сектор райтынг кæныны нысанæн, Уæрæсейы æртæ бангæй цы æхцайы фæрæзтæ хицæн цæуынц, уый руаджы.
«Осетинская» – ахæм маркæйы бын уагъд цæудзæнис минералон дон. Дон ист цæудзæнис Бæгъиаты 9-æм донгуырæнæй. Куыд зонæм, афтæмæй уырдыгæй исы «Бæгъиат»-ы суаруадзæн завод йæхæдæг дæр дон. Паддзахадон куыстуаты генералон директор Тедеты Роланд куыд зæгъы, афтæмæй уыцы донгуырæнæй уыйбæрц дон ис æмæ æппындæр нæ бандавдзæнис йæ заводы куыстыл.
Завод байгом кæнынмæ хуынд æрцыдысты РХИ-йы Президент Тыбылты Леонид, Хицауады Сæрдар Хъуылымбегты Доменти, президенты администрацийы сæргълæууæг Тъехты Алан, экономикон рæзты министр Зæгъойты Вильям, Арæзтады министр Зæгъойты Эдуард æмæ æндæр бæрнон адæй-мæгтæ.
«Владимирский стандарт»-ы вице-президент, амалиуæггæнæг Павел Антов арфæйы ныхæстæ загъта Президент, хицауады уæнгтæ æмæ æгас Хуссар Ирыстоны цæрæг адæмæн, куысты уавæртæ сын кæй радтой.
Уый фæстæ Тыбылты Леонид загъта:
«Республикæйы территорийыл ног куыстуаты фæзынд дзурæг у Хуссар Ирыстоны размæцыдыл. Ацы проект реализаци æрцыд Уæрæсейы Федерацийы æххуысæй, нæ республикæйы реализаци цы проекттæ цæуынц, уый руаджы. Абон ам завод арæзт кæй æрцыд, уый та у æвдисæн – республикæ рæзты фæндагыл лæуд кæй у. Кæй зæгъын æй хъæуы, ахæм завод бакæнын æнцон нæу, уый саразынæн æрмæст фæндон фаг нæ уыд. Хъуыд бирæ радзур-бадзур, гæххæттытæ цæттæ кæнын, фембæлдтытæ уадзын. Фæлæ боны фæстагмæ, уыдон реализаци æрцыдысты æмæ мах ныр æвдисæн стæм заводы бакон-дæн. Уый стыр хъуыддаг у, ныр махæн перспективæйы æнцондæр уыдзæн Уæрæсейы Федерацийæ дарддæр дæр ахæм æнгæс бадзырдтæ æмæ иумæйаг проекттæ аразынæн», – дзырдта республикæйы сæргълæууæг.
Президент сæрмагонд арфæ загъта «Владимирский стандарт»-ы амалиуæггæнджытæн сæ гуырахстджын куысты тыххæй æмæ ныфс бавæрдта дарддæр дæр æндæр проектыл кæй бакусдзысты. Павел Антов загъта: «Хуссар Ирыстоны хицауады рдыгæй хорз ахаст æмæ æмбарынад куынæ уыдаид, уæд ахæм цыбыр æмгъуыдмæ нæ къухы бæрзонд æнтыст нæ бафтыдаид. Уый тыххæй уæлдай бузныг стæм Хуссар Ирыстоны минæвар Уæрæсейы – Гасситы Знауыр æмæ Уæрæсейы Федерацийы минæвар Хуссар Ирыстоны Къарджиаты Эльбрусæй.
Компанийы инвесторы минæвар Михаил Зиновьевы ныхæстæм гæсгæ заводæн дон рæстæгмæ исынц Дзауы районы Згъубиры донгуырæнæй, æппæт æнæмæнгхъæуæг процедурæтæ рацæуыны фæстæ та компани сараздзæн документтæ сæрмагонд донгуырæны фæдыл.
Уазæгты М.
Comments are closed, but trackbacks and pingbacks are open.