10-æм июлы горæт Цхинвалы республикон соматикон рынчындоны территорийыл байгом операцион-хирургион корпус гемодиализы центримæ. Бæрæг куыд у, афтæмæй ацы медицинон объект арæзт æрцыдис 2015-2017 азты Хуссар Ирыстоны социалон-экономикон рæзтæн ахъазгæнæг Инвестицион программæйы реализаци кæныны фæлгæтты æмæ ныр лæвæрд æрцыдис эксплуатацимæ. Операцион-хирургион корпусæн йæ закъазгæнæг у Арæзтад, архитектурæ æмæ цæрæнуатон-коммуналон хæдзарады министрад. Йæ аразæг та – генералон подрядон организаци «СТМ-Юг».
Йæ байгом кæныны церемонимæ æрбацыдысты Хицауады Сæрдар Пухаты Эрик, Мæскуыйæ æмæ Цæгат Ирыстонæй æрцæуæг медиктæ. РХИ-йы Уæрæсейы Федерацийы Уæлвæткон æмæ æххæстбарджын минæвар Марат Кулахметов, РХИ-йы Æнæниздзинад хъахъхъæнын æмæ социалон рæзты министр Тотчиты Георги.
Цытджын мадзал байгом кодтой мадзаламонджытæ Хъоцыты Сергей æмæ Джиоты Инал. Уыдон арфæйы ныхæстæ загътой æппæт адæмæн дæр ног операцион-хирургион корпус гом кæныны цытæн æмæ цыбыртæй банысан кодтой 2008-æм азы августы хæсты рæстæджы хуссарирыстойнаг медикты стыр хъæбатырдзинад æмæ профессионалондзинад æмæ сын сæрмагондæй загътой бузныджы ныхæстæ сæ иузæрдион куысты тыххæй.
Республикæйы Хицауады Сæрдар Пухаты Эрик йæ раныхасы фыццаджыдæр адæмæн загъта арфæйы ныхæстæ ацы нысаниуæгджын цауы тыххæй æмæ бузныджы ныхæстæ Уæрæсейы Федерацийæн ахæм стыр æххуысы тыххæй. «Операцион-хирургион корпус байгом кæныны хъуыддаг у стыр æмæ ахсджиаг. Инвестпрограммæйы фæлгæтты Хуссар Ирыстоны медицинæйы къабазы арæзт æрцыдис æмæ цæуынц бирæ объекттæ. Ивгъуыд аз ма байгом кодтам сывæллæтты рынчындон дæр, кæцы ифтонг у нырыккон ифтонггæрзтæй. Фæнды мæ банысан кæнын уый, æмæ нæ республикæйы цæрджытæ – ныййарджытæ æмæ сывæллæттæ дæр кæй сты райгонд ацы рынчындоны куыстæй. Ныртæккæ арæзт цæуы ног гуырæн хæдзар æмæ йæ хъуамæ сцæттæ кæнæм 2019-æм азы. Рæхджы цалцæггонд фæуыдзæнис тубдиспансер дæр æмæ ацы аз лæвæрд æрцæудзæнис эксплуатацимæ. Абон райсомæй бабæрæг кодтам медицинон-социалон центры. Ам куыстытæ фесты æмæ нын аразджытæ куыд загътой, уымæ гæсгæ рæхджы, августы райдианы ацы медицинон центр баконд æрцæудзæнис. Уый, кæй зæгъын æй хъæуы, иууылдæр Уæрæсейы Федерацийы æххуысы руаджы у æмæ мæ фæнды абон уыдонæн зæгъын стыр бузныджы ныхæстæ республикæйы къухдариуæгад æмæ не ʻмбæстæгты номæй сæ бакæнгæ куысты тыххæй», – загъта Пухаты Эрик. Уый ма бузныджы ныхæстæ загъта ацы медицинон корпусы аразджытæн, кæцытæ цæсгомджынæй æххæст кодтой сæ куыст. «Аразджытæ гъæдджынæй сæххæст кодтой сæ куыст æмæ уымæ гæсгæ дарддæр дæр кусынц иннæ медицинон объектты арæзтадыл. Фæнды мæ аразджытæй алкæмæндæр хицæнæй бузныг зæгъын сæ гъæдджын куысты тыххæй. Стыр бузныг æмæ арфæйы ныхæстæ ма зæгъинаг дæн, ацы ног медицинон корпусы чи кусдзæнис, æппæт уыдонæн. Мæ зæрдæ сын зæгъы хæрзиуджытæ æмæ къаддæр та – рынчынтæ», – банысан кодта Хицауады Сæрдар.
Уæрæсейы Федерацийы Æнæниздзинад хъахъхъæныны министры хæдивæг Дмитри Костенников дæр цытджын мадзалы сæраппонд арфæйы ныхæстæ загъта æппæт æрæмбырдуæвджытæн. «Мæн фæнды арфæ ракæнын уе ‘ппæтæн дæр ацы нысаниуæгджын цауы тыххæй. Бузныджы ныхæстæ зæгъын аразджытæн, арфæ кæнын медиктæн æмæ сæ пациенттæн. Цæмæй максималон пайда хæссат, уый тыххæй æдзухдæр хъæуы ахуыр кæнын ног технологитæ, лæмбынæгдæрæй хъус дарын медицинæйы райрæзтмæ, йæ ногдзинæдтæм. Уымæ гæсгæ уын мæ зæрдæ зæгъы хорз куыст æмæ уæ дарддæры рæзт уæ равзаргæ дæсныйады, ног агъуыст æмæ хорз, нырыккон домæнтæн дзуапп чи дæтты, уыцы ифтонггæрзты руаджы. Стыр бузныг, кæй аргъ кæнут Уæрæсейы Федерацийы æххуыс æмæ хайбавæрдæн нæ иумиаг хъуыддагмæ», – загъта Дмитри Костенников.
Мадзалы ма раныхас кодта РХИ-йы Æнæниздзинад хъахъхъæнын æмæ социалон рæзты министр Тотчиты Георги. Уый дæр арфæ ракодта цытджын мадзалмæ æрбацæуджытæн æмæ, зæгъгæ, ахсджиаг у, цæмæй, нæ республикæйы æмбæстæгтæ æмбæлон аргъ скæной ацы операцион-хирургион комплексæн. Зæгъгæ, республикæйы медицинæйы къабазы къахдзæфтæ арæзт цæуынц, фыццаджыдæр, пациентты хæрзиуæгæн.
Раныхæсты фæстæ сырх лентæ алыг кодтой Дмитрий Костенников æмæ Тотчиты Георги. Уый фæстæ, уазджыты размæ, ирон æгъдаумæ гæсгæ, рахастой æртæ уæливыхы æмæ дзаггарз. Уазджытæн арфæйы ныхæстæ загъта рынчындоны раздæры кусæг, зындгонд хирург Зæгъойты Никъала. Уый бафæдзæхста ног корпус æмæ медикты Хуыцауыл, уазджытæн æрæмысыд 2008-æм азы августы хæсты рæстæджы куыд куыстой рынчындоны ныккæнды æхстыты бын, уый. Зæгъойты Никъала ма бузныджы ныхæстæ загъта Уæрæсейы Федерацийæн сæ лæмбынæг хъусдард æмæ нын æппынæдзух се ‘ххуысы тыххæй. “Абон æз дæн тынг амондджын ахæм операцион-хирургон комплекс арæзтæй кæй федтон, уый тыххæй”, – загъта Зæгъойты Никъала.
Дарддæр уазджытæ азылдысты операцион блок æмæ æндæр хайадтыл. Æхсызгон хъуыддаг уыдис уый æмæ дзы кæй федтой æвæрд компьютерон томограф. Уый у æнæмæнгхъæуæг медицинон ифтонгад, кæцыйы тыххæй не ʻмбæстæгты ба-хъæуы ацæуын республикæйæн æддæмæ.
Банысан кæнын хъæуы уый, æмæ ацы ногарæзт корпус йæ куыст кæй райдыдта дыууæ къуырийы размæ. Соматикон рынчындоны сæйраг дохтыр Кокойты Маир куыд загъта, афтæмæй дзы ныридæ-гæн сарæзтой 20 операцийы бæрц. Уазджытæ ма бацыдысты æмæ азылдысты сывæллæтты рынчындоны дæр.
Медицинон объектæн йæ иумиаг фæзуат у 4594 квадратон метры æмæ иугонд у соматикон рынчындоны бæстыхаимæ.
Уазджытæ райгондæй баззадысты куыд комплексы бæстыхайы арæзтадæй, афтæ йæ медицинон ифтонгадæй дæр æмæ ма банысан кодтой, кæй бацархайдзысты, цæмæй комплекс ифтонг æрцæуа æнæмæнгхъæуæг медицинон кадртæй.
ЦХУЫРБАТЫ Ларисæ
Comments are closed, but trackbacks and pingbacks are open.