Байгом ног спортивон фæзуат

5-æм апрелы нæ горæты цады былыл байгом спортивон фæзуат, кæцы арæзт æрцыд Уæрæсейы Æвзæнгты æхсæнады федералон агентады проект «Work Out»-мæ гæсгæ. Ардæм хуынд æрцыдысты РХИ-йы Президент Тыбылты Леонид, Хицауады уæнгтæ æмæ горæты фæсивæд, кæцыйы хæрзиуæгæн, сæрмагондæй, арæзт æрцыд гом    фæзуат.

Уæрæсейы Федерацийы фæсивæды хъуыддæгты фæдыл федералон агентад «Трезвая Россия»-йы къухдариуæггæнæг Султан Хамзаев æмæ Тыбылты Леонид гом фæзуаты сырх лентæ алыг кæныны фæстæ æрсидтысты фæсивæдмæ, цæмæй сæ сæрибар рæстæг æрвитой ам.

Президент зæрдиаг арфæ ракодта Султан Хамзаевæн сæ проект сæрмагондæй Хуссар Ирыстонæй кæй райдыдтой. «Махæн ис нæхи сæрмагонд проект «Спорт в шаговой доступности», зæгъгæ, кæцымæ гæсгæ нæ республикæйы алы районты гом æрцыдысты тренажерон залтæ æмæ спортивон фæзуæттæ. Сымах цы форматы кусут, ома, улæфæн бынæтты спортивон фæзуæттæ аразын, цæмæй фæсивæд æвзæр хъуыддæгтæй хызт уой æмæ сæ сæрибар рæстæг æмткæй се ‘нæниздзинадыл хардз кæной, уый фæрнджын хъуыддаг у. Махмæ цы æвзæнгты æхсæнад ис «Ног фæлтæр», уыдонимæ уæ ахастытæ хæларадон кæй сты, уымæ гæсгæ мæ ныфс ис дарддæр дæр уын хорз хъуыддæгтæ саразын кæй бантысдзæнис», – дзырдта Президент.

Султан Хамзаев та йæ раныхасы загъта: «Ацы проектмæ гæсгæ Уæрæсейы сырæзт ахæм хуызы 40 гом фæзуаты. Мах уæрæхдæр кæнæм нæ географи – гом кæнæм фæзуæттæ Уæрæсейæн æддейæ. Нырмæ мах архайдтам, сæйраджыдæр, Уæрæсейы территорийыл – гом кодтам ахæм æнгæс фæзуæттæ Уæрæсейы æндæр æмæ æндæр регионты. Сы-мах стут фыццаг республикæ Уæрæсейы æддейæ, кæцыйы фыццаг хатт конд æрцыд ахæм фæзуат.

Мах афтæ нымайæм, æмæ ахæм социалон нысаниуæджы проекттæ хъуамæ фылдæр кæной уæ республикæйы, нæ иумæйаг куысты фæстиуæгæн. Ацы фæзуат уæ республикæйы нысаниуæгджын цаутæм æввахс кæй байгом, уый дæр хуымæтæджы нæу. Леонид Харитоны фырт бирæ аразы фæсивæды хæрзиуæгæн. Уый фæрцы, уæ республикæйы фæсивæд цæуынц размæ. Мæн фæнды бахатын фæсивæдмæ, цæмæй æнгомдæр балæууой Тыбылты Леониды фарсмæ, – дзырдта Уæрæсейы фæсивæды  хъуыддæгты фæдыл федералон агентады къухдариуæггæнæг Султан Хамзаев.

Уазæгты М.