1-æм февралы ирон адæм нысан кæнынц Национ зонады бон. 1922 азы 1-æм февралы Хуссар Ирыстоны фæзынд фыццаг зонадон литературон æхсæнад. Литературон æхсæнад æмбырд кæнын райдыдта, иртасæн куыстытæ кæнын сæ бон кæмæн уыдис, ахæм адæймæгты. Ацы æхсæнад аразджытæй æмæ организатортæй сæ иу уыд Тыбылты Алыксандр. Уыцы уæззау рæстæджы ацы æхсæнады уæнгтæ уæхскуæзæй æрæвнæлдтой Ирыстоны экономикон æмæ монон æндидзынадмæ.
Æхсæнады фыццаг рабадты æвæрд æрцыд фарст иугонд ирон литературон æвзаджы тыххæй.
Уымæ гæсгæ 1-æм февраль ирон æвзаджы рæзты историйы райдайæныл нымад кæй цæуы, уый тыххæй ацы бон нæ республикæйы Президент Тыбылты Леониды указмæ гæсгæ ныр æртæ азы нысан цæуы паддзахадон æмвæзадыл.
Ацы бæрæгбон банысан кæныны тыххæй 1-æм февралы Уанеты Захары номыл зонад-иртасæн институты ауагъд æрцыд зонадон конференци. Йæ куысты хайад райстой нæ республикæйы зонадон архайджытæ: ногдæр историйы хайады хистæр кусæг Плиты Сослан бакаст доклад – «Становление государственности Республики Южная Осетия», ирон æвзаджы зонадон кусæг Тъехты Аленæ – «Экспресси æвдисæг дзырдтæ Гуыцмæзты Алешы уацмысты», ХИЗИ-йы зонадон кусæг Дзассохты Ланæ – «Многократное отрицание в осетинском языке», экономикæйы хайады зонадон кусæг Дзабиты Вячеслав – «Социально-экономическое развитие РЮО как инструмент публичной дипломатии России», ХИЗИ-йы зонадон кусæг Дыгъуызты Зæлинæ – «Изафетные конструкции в осетинском языке».
Зонадон конференцимæ ма хуынд æрцыдысты РХИ-йы Президенты Администрацийы къухдариуæггæнæджы хæдивæг, историк Пухаты Къоста, Президенты паддзахадон уынаффæгæнæг Коцты Къоста, ХИПУ-йы ректор Тедеты Вадим, университеты æмæ нæ горæты скъолаты ахуыргæнджытæ.
Мадзал бацæуæн ныхасæй байгом кодта зонад-иртасæн институты директор Гаглойты Роберт. Уый раарфæ кодта æрæмбырдуæвджытæн сæ бæрæгбоны цытæн æмæ æрдзырдта ацы нысаниуæгджын боны тыххæй. Уый ма ноджы æхсызгонæй банысан кодта ацы аз кæй нысан кæнынц зонад-иртасæн институты 95 азы æмæ Хуссар Ирыстоны паддзахадон университеты 85 азы юбилейтæ.
РХИ-йы Президент Тыбылты Леониды номæй та Зонады боны цытæн арфæ ракодта Пухаты Къоста.
Конференцийы куыст адарддæр кодта Плиты Сослан йæ доклад «Становление государственности Республики Южная Осетия»-йæ. Йæ доклады уый банысан кодта, зæгъгæ, Хуссар Ирыстон йæ барадон статусмæ гæсгæ у национ республикæ, кæцыйæн ис паддзахады æппæт классикон миниуджытæ. 2008 азы августæй Хуссар Ирыстон юридикон æгъдауæй нымад æрцыд Уæрæсейы Федерацийы ‘рдыгæй куыд хæдбар паддзахад, афтæ. Афтæ ма банысан кодта дыууæ бæстæйы ‘хсæн арæзт кæй æрцыдысты базæйон æмæ æхсæнадæмон бадзырдтæ æдæппæт къухтæ фыст æрцыдысты 90 документ æмæ сразыдзинадыл, кæцытæ хауынц экономикæйы, социалон æмæ æфсæддон къабæзтæм. Афтæмæй Гуырдзыстоны ‘рдыгæй агрессийæ æдасдзинады гаранти ифтонг æрцыд. Уый ма банысан кодта, зæгъгæ, Хуссар Ирыстон кæддæриддæр уыд Хуссар Кавказы Уæрæсейы æнувыд æмæ стабилон æмцæдисон. Фидарæй зæгъæн ис Хуссар Ирыстон куыд паддзахад, афтæ кæй сырæзт.
Цымыдисон доклад ма бакаст Дзабиты Вячеслав дæр. Уый, сæйраджыдæр, æрдзырдта нæ республикæйы экономикæйы иумæйаг уавæры тыххæй. Æрдзырдта нæ экономикæ райтынг кæнынæн цавæр амæлттæ æмæ фæрæзтæ хъæуы, æппæт уыдæттыл.
Банысан кæнын хъæуы уый æмæ ма Дзабиты Вячеслав ацы доклады темæимæ хайад кæй райста дунеон форум «Кавказ в начале XX века: народы, общество и государство»-йы дæр.
Конференцийы хайадисджытæ ма байхъуыстой иннæ æвзонг зонадон кусджыты докладтæм дæр. Алкæцы докладæн дæр хистæр зонадон кусджытæ скодтой аккаг аргъ.
Докладгæнджыты темæтæм байхъусгæйæ сæ хъуыдытæ загътой Джиоты Мурæт æмæ Бигъуылаты Иринæ.
Зонадон кусджытæн ма бæрæгбонон арфæты ныхæстæ загъта ХИПУ-йы ректор Тедеты Вадим дæр. Уый банысан кодта, зæгъгæ, сæ зонад-иртасæн институтимæ кæй хъæуы æмгуыст кæнын.
Афтæ ма æрдзырдта университеты юбилейы нысан кæныны сæйраг мадзæлттæй сæ иу кæй уыдзæн университеты ног комплекс байгом кæнын.
Бæрæгбонон мадзалы загъд æрцыд бирæ арфæйы ныхæстæ зонады къабазы кусджытæн.
Туаты Ларисæ
Comments are closed, but trackbacks and pingbacks are open.