Президент Гаглойты Алан ауагъта æрвылкъуырион æмбырд горæт æмæ районты администрациты сæргълæуджытимæ. Æмбырды куысты хайад райстой Хицауады Сæрдар Джуссойты Константин, Президенты Администрацийы къухдариуæггæнæг Джиоты Алан, Арæзтад, архитектурæ æмæ цæрæн-коммуналон хæдзарады министр Зæгъойты Эдуард, Автомобилон фæндæгты арæзтад æмæ сæ эксплуатацимæ дæттыны фæдыл комитеты сæрдар Елдзарты Константин æмæ æндæр бæрнон кусджытæ.

Горæт Цхинвалы администрацийы сæргълæууæг Къадзты Гено радзырдта, зæгъгæ, Нæузæххонты æмæ Сталины уынгты цæрæн хæдзæртты алфæмблай территоритæ схæрзарæзт кæныны фæдыл куыстытæ кæронмæ конд æрцыдысты, цæттæ цæуынц асфальт кæнынмæ.

Президент администрацийы сæргълæууæджы хъусдард аздæхта, фæстаг рæстæджы арæх фенæн кæй ис, горæты уынгты сфетофортæ хæлдæй æмæ, уый та тæссаг у фæндагон-транспортон цаутæ æрцæуынæй. Уымæ гæсгæ бахæс кодта, цæмæй ацы фарст бæстон æрцæуа.

Санахъойы фырты уынджы тротуартыл гъæдджын плиткæ æвæрд кæй не ‘рцыд, уый тыххæй дæр дзырдтой æмбырды. Фæндагарæзтады фæдыл комитеты сæрдар Елдзарты Константины ныхæстæм гæсгæ, йæ аххосаг у, заводы рауагъдадон ифтонггæрзтæ æмбæлон уагыл кæй нал сты, уый. Уыцы проблемæ ныридæгæн иуварс æрцыд.

Дзырд ма цыд раздæры бигæдзаумæтты фабрикæйы районы æмдзæрæндоны цæрджыты проблемæтыл. Президент куыд банысан кодта, афтæмæй цæрджыты, куырдиатмæ гæсгæ бахæс кодта, цæмæй сæ фарста хаст æрцæуа цæрæнуат дих кæныны фæдыл къамисы куыстмæ.

«Нæ горæт чысыл у æмæ алкæй цард дæр, армытъæпæнау, уынæм. Хæдзæрттæ хъуамæ райсой, цæрæнуатæй æцæг хъуаг чи æййафы, уыцы бинонтæ. Администраци æмæ цæрæнуат дих кæныны фæдыл къамисы куыст та æххæстбæрцæй у бæстæйы разамынады куысты сæйраг æвдисæн. Уымæ гæсгæ уæ архайдмæ фау æрхæссæн ма хъуамæ уа», – банысан кодта Президент.

Дзауы районы администрацийы сæргълæууæг Тыбылты Вандæйы ныхæстæм гæсгæ Теделеты хъæуы трансформатор æндæр бынатмæ хаст æрцыд æмæ цæрджытæн фæзынд электрон рухсы проблемæтæ. Районы ма хъæуы, уынгты чи рухс кæна, ахæмтæ. Итраписы хъæуы сыгъдæг хъуамæ æрцæуа бассейн. Уый æмрæнхъ бæстон цæуы, Барсы хъæуы цæрджыты донæй сифтонг кæныны проблемæ.

Къуыдаргомы зымæгон рæстæгмæ цæттæгæнæн куыстыты тыххæй æмбырды радзырдта горæт Къуайсайы администрацийы сæргълæууæг Хуыгаты Алан.

Цъыфы зæйæ сыгъдæг æрцыд Къозы хъæумæ хæстæг фæндаг. Горæты уынгты æвæрд цæуынц брондæттæ, дарддæр ивд цæуынц цæрæн хæдзæртты дуæрттæ, ахуырадон уагдæтты кæронмæ фæхæццæ кæнынц цалцæггæнæн-æндидзæн куыстытæ.

Администрацийы сæргълæууæджы ныхæстæм гæсгæ Къуайсайы цæрджытæ зымæгон рæстæгмæ ифтонг цæуынц сугæй, хынцыд ма цæуы цæрæнуатон-коммуналон хæдзарады кусджыты куыстмыздтæ фæфылдæр кæныны хъуыддаг. Нырма дæр ахсджиаг у, горæты æдзæрæг фатерты фарста. Администрацийы сæргълæууæджы ныхæстæм гæсгæ, ныртæккæ уыдо-ныл арæзт цæуы акттæ, уый фæстæ уынаффæтæ исдзæн тæрхондон.

Бæстæйы разамонæджы ныхæстæм гæсгæ фарст серьезон у æмæ домы зонд-джын архайд, зæгъгæ, алы акты фæдыл дæр архайын хъæуы закъоны домæнтæм гæсгæ æмæ Къуайсайы цæр-джыты хæрзæбонæн.

Бæззаты Инал та информаци сарæзта Цхинвалы районы бакæнгæ куыстыты фæдыл, зæгъгæ, реконструкци цæуынц районы административон бæстыхæйттæ.

«Цъунары хъæуы арæзт фæцис хъармгæнæн системæ. Тъбеты Культурæйы хæдзары бæстыхайы дæр арæзт цæуы хъармгæнæн системæ, баззад ма дзы хицæн куыстытæ. Уый фæстæ бавналдзыстæм, æдзæллаг уавæрмæ æрцæуæг, сценæмæ», – банысан кодта уый.

Нуазыны донæй ифтонг кæныны куыстытæ дарддæр цæуынц Залда æмæ Бихъары хъæуты. Цалцæг кæнынц Сатихъары хъæумæ фæндаг. Мæйæ фылдæр аразынц Хелцуайæ  Арцеумæ фæндаг. Ивд цæуынц Къостайыхъæуы бирæфатерон хæдзæртты канализацион хæтæлтæ, (уыдысты тынг æдзæллаг уавæры). Тъбет æмæ Къостайыхъæуы ма сæвæрын хъæуы электроадæттæн трансформаторон дæлстанцтæ.

Ленингоры районы администрацийы сæргълæууæг Гæджиты Иларион банысан кодта, реконструкци кæй хъæуы Ленингорæй Ахмадзмæ фæндаг. Йæ дæрддзæг у 18 километры. Хъусдард ма здæхт æрцыд, районы кæй нæ фаг кæны цæрæнуатон-коммуналон техникæ. Уымæй дарддæр ма ацы бонты сæ куыстмыздтæ райсдзысты ацы хæдзарады кусджытæ æмæ дыууæ къуырийы æмгъуыдмæ хæстæ æххæстæй фыст хъуа-мæ æрцæуой.

Знауыры районы администрацийы сæргълæууæг Гобозты Аланы ныхæстæм гæсгæ, районы стыр куыст цæуы фæндæгтæ сцалцæг кæныныл. Дзагъинайы хъæуы хид у реконструкци кæнинаг, планон цал-цæггæнæн куыстытæ фесты Бехъмары хъæумæ фæндагыл, нуазыны донæй ифтонг æрцыдысты Терегуаны хъæуы цалдæр хæдзары.

Администрациты сæргълæуджытимæ æмбырды рæстæджы дзырд цыд, цалдæр бынæтты чи кусы æмæ хъæууон цæрджытæ се ‘рвылбонон царды цæуыл тыхсынц, уыдон фæдыл.

Æмбырды рæстæджы уынаффæ цыд, коммуналон лæггæдты æргътæ дæргъвæтин рæстæджы чи нæ фиды, уыдон тыххæй. Бæстæйы разамонæг æрдомдта, цæмæй йæм æрбавдисой сæ номхыгъдтæ. Уый фылдæр хауы Хицауад æмæ Парламенты кусджытæм.

Дарддæр æмбырды хайадисджытæ уынаффæ кодтой республикæйы территорийыл уынгты рухсытæ нырыккон рухсгæнæнтæм раивыныл, уымæн æмæ уыдон бæрæг сэкономи кæндзысты электроэнерги. Ацы идейæ фæцыд Гаглойты Аланы зæрдæмæ дæр æмæ бахæс кодта, цæмæй йыл куыст цæуа.

Къæбулты Марина