20 азы дæргъы гуырдзиаг-ирон ныхмæлæуды рæстæджы Хуссар Ирыстоны цард фæстæмæ алæууыд алы фадыджы дæр, уыцы нымæцы культурæйы къабазы дæр. Дæргъвæтин азты дæргъы хæстон уавæрты аххосæй нæ республикæйы скъолаты æмæ библиотекæты чингуыты фонд бынтон скадавар. Фæлæ фæстаг рæстæджы уавæр хуыздæрырдæм фæивта. РХИ-йы Хицауад ирон æвзаджы рæзты фæдыл цы программæ райста, уый фæлгæгты мыхуыры цæуын райдыдтой алыгъуызон чингуытæ.
Чингуытæ рухс куы фенынц, уæд сæ байуарынц нæ республикæйы культурон уагдæттыл. Уыцы чингуытæй бæрæг процент раттынц чингуыты автортæн дæр. Уыдонæй алкæцы фыссæг дæр спайда кæны йæхи куыд бафæнды, афтæ. Балæвар сæ кæнынц куыд нæ республикæйы алыгъуызон уагдæттæн, афтæ сæ хæлæрттæн дæр. Ацы бонты Ирыстоны Фысджыты æмсæрдар Хъазиты Мелитон Æвзæнгты республикон библиотекæмæ радта йæхи фыст чингуытæ, куыд зæгъæм, «Нæ ис, нæ бис» (1-2 томтæ) æмæ «Ирон литературæйы истори» (1, 4, 5-æм томтæ), цæмæй сæ уыдон фыссæджы фæндонмæ гæсгæ адих кæной нæ республикæйы астæуккаг скъолаты ирон æвзаг æмæ литературæйы кабинеттæ æмæ РХИ-йы библиотекæтыл.
Ацы чингуыты лæвары хуызы райстой нæ горæты астæуккаг скъолатæ, Колыты Аксойы номыл Аивæдты паддзахадон лицей, Цхивалы скъола-интернат, Знауыры районы æмæ Хъорнисы астæуккаг скъолатæ. Афтæ ма ацы чингуытæй баххæст сты Сывæллæтты республикон библиотекæ, Анахарсисы номыл республикон национ библиотекæ, централон библиотекæ, Знауыры районы централон библиотекæ, Терегуаны æмæ Цхинвалы районы Зары хъæууон библиотекæты чингуыты фонд дæр.
Фыссæг Хъазиты Мелитон нæ республикæйы скъолатæ æмæ библиотекæтæн цы чингуытæ балæвар кодта, уыдон нымæц уыд 130 экземплярæй фылдæр. Ацы чингуытæй сын уый бакодта методикон æххуыс.
Гæбæраты Фатимæ, Аивæдты лицейы ирон æвзаг æмæ литературæйы ахуыргæнæг: «Ацы бонты нын Хъазиты Мелитон балæвар кодта йæ чингуытæ. Уыдон нын фæахъаз уыдзысты нæ хъомыладон куысты, бакусдзыстæм сыл ахуыргæнинæгтимæ. Æрæджы ауагътон мастер-кълас. Урокмæ æрбацыдысты нæ республикæйы 24 ахуыргæнæджы, уыдонæн балæвар кодтон Хъазийы фырты чингуытæ, кæцыты мын уый размæ радта РХИ-йы Ахуырады министрад. Бузныг ын зæгъын йæ хъусдарды тыххæй»
Знауыры районы централон библиотекæйы сæргълæууæг Джиоты Эммæ дæр райгондæй баззад чингуыты авторæй. «Хъазиты Мелитон нын бирæ хæттыты балæвар кодта йæ чингуытæ, ныр дæр та уыд афтæ. Уыимæ ма нæ куы бахъæуы, уæд нын Æвзæнгты республикон библиотекæ бакæны методикон æххуыс алыгъуызон мадзæлттæ, уыцы нымæцы мысæн изæртæ сорганизаци кæнынæн дæр. Чиныг «Ирон литературæйы истори»-йы томты бакæсæн ис ирон фысджыты уацмысты тыххæй анализтæн. Бузныг зæгъын фыссæгæн йæ лæвæртты тыххæй», – загъта уый.
Джиоты Е.
Comments are closed, but trackbacks and pingbacks are open.