225 азы размæ Уæрæсейы бындур æвæрд æрцыд фыццаг æхсæнадон библиотекæйæн. 1995-æм азæй нырмæ Уæрæсейы уæды президенты уынаффæмæ гæсгæ 27-æм майы бæрæг кæнынц библиотекæты Æппæтуæрæсейон бон.
Æрвылаз дæр, куыд Уæрæсейы, афтæ нæ республикæйы дæр цытджын æгъдауæй банысан кæнынц библиотекæты æппæтуæрæсейон бон. Ацы нысаниуæгджын бон у æппæт библиотекæйы кусджыты профессионалон бæрæгбон дæр. Уыцы бон кæсæн залты, ахуырадон уагдæтты, сфæлдыстадон хæдзæртты аразынц алыгъуызон мадзæлттæ, цæмæй чиныгкæсджыты хъусдард аздахой чиныгмæ цымыдис кæнынмæ. Сæ профессионалон бæрæгбоны цытæн арфæтæ райсынц библиотекæйы кусджытæ.
27-æм майы Цхинвалы районы Дменисы хъæуы библиотекæйы дæр банысан кодтой бæрæгбон библиотекæйы боны цытæн. Бæрæгбонвæлыст библиотекæмæ сæ коллегæтæн арфæ кæнынмæ æрбацыдысты Цхинвалы районы Централон библиотекæйы кусджытæ, чиныгкæсджытæ, скъоладзаутæ, ахуыргæнджытæ.
Мадзаламонджытæ – библиотекæйы кусджытæ Джиголаты Заремæ æмæ Æлборты Мадинæ раарфæ кодтой æрæмбырдуæвджытæн æмæ æрдзырдтой бæрæгбоны нысаниуæджы тыххæй. Дзырдтой, абон кæй у, йæ бон æнæ чиныг кæмæн нæу, уыдоны бæрæгбон. Уыдон дзырдтой, зæгъгæ, чингуытæ махæн сты не ‘мбæлттæ æмæ уынаффæгæнджытæ. Чингуыты фæрцы мах базонгæ вæййæм æндæр бæстæтæ æмæ паддзахадты адæмты цардимæ, цæрæгойты дунеимæ, историон ивгъуыдимæ.
Рагзамантæй нырмæ стыр ахуыргæндтæ дæр чиныджы хуыдтой адæймагады мысынад. Чингуыты мидæг æнусты дæргъы æфснайд цæуынц адæмты зонындзинæдтæ, адæймагады истори. Библиотекæтæн сæ хæс у адæмы зæрдæтæ хъарм кæнын æмæ зонындзинæдтæ парахат кæнын, чингуыты цы бирæ зонындзинæдтæ ис уыдон чиныгкæсджытæм хæццæ кæнын. – «Бирæтæн сæ хæдзæртты ис чысыл библиотекæтæ, уарзон чингуытæ, фæлæ информаци фаг куынæ вæййы, уæд фæцæуæм библиотекæмæ. Æнусты дæргъы библиотекæйы кусджытæ ахстой æмæ ахсдзысты ахсджиаг бынат æхсæнадон царды. Чизоны, библиотекæты кусджытæн сæ куыст афтæ вазыгджынæй нæ зыны, куыд, зæгъæм, дохтыр кæнæ ахуыргæнæджы куыст, фæлæ æхсæнадыл ахадындзинадæй сæ куыстæн аргъгæнæн нæй», – дзуры Джиголаты Заремæ.
«Библиотекæйы кусæг хорз хъуамæ зона библиотекæйы чингуыты фонд, – ныхас адарддæр кодта Æлборты Мадинæ – алы хатт дæр йæ бон хъуамæ уа бацамонын, кæм ссар-дæуа дзуапп цымыдисон фарстæн». Библиотекæйы кусджытæн сæ хæс у сывæллæтты ‘хсæн чиныг пропагандæ кæнын. Иунæг хæдзар дæр нæу ифтонг сывæллæтты литературæйæ, уымæ гæсгæ цæуынц библиотекæмæ æмæ уым ссарынц, цы чингуытæ сæ хъæуы, уыдон. Афтæмæй хæлар кæнын райдайынц чиныгимæ, кæцы сæ даргъ царды фæндагыл свæййы се ‘нусон æмбæлццон, – загъта йæ ныхасы кæрон Æлборон.
Бæрæгбоны цытæн арфæйы ныхæстæ ракодта Дменисы Культурæйы хæдзары директор Икъаты Ануси. Бузныг загъта библиотекæйы кусджытæн сæ иузæрдион куысты тыххæй. Уый ма загъта, зæгъгæ, чингуытæ сты, куыд стыр зонындзинæдты рухсы тынтæ, афтæ. Чынгуыты ис æппæт дуне, æмæ уый, нæ зынаргъ библиотекæйы кусджытæ, сымахæй хуыздæр чи зоны. Арфæ уын кæнын уæ профессионалон бæрæгбоны цытæн, мæ зæрдæ уын зæгъы бирæ хорздзинæдтæ, бафæндид мæ, цæмæй уæм алы бон дæр цæуой чиныгкæсджытæ, фылдæрæй-фылдæр кæной ног чингуытæ æмæ библиотекæ та уа ахæм бынат, цыранмæ адæм цæуой æхсызгонæй.
Библиотекæйы кусджытæ æмæ чиныгкæсджытæн дæр арфæйы ныхæстæ ракодта Цхинвалы районы администрацийы культурæйы хайады Централон библиотекæйы директор Уалыты Нанули.
Бæрæгбонон мадзалы æмдзæвгæтæ аив бакæсынæй барæсугъд кодтой скъоладзаутæ Уалыты Аслан, Дудайты Элинæ, Хацырты Каролинæ, Сидæмонты Владик æмæ æндæртæ.
Централон библиотекæйы кусджытæ зæрдылдарæн лæвæрттæ бакодтой чысыл чиныгкæсджытæн. Мадзал рауад цымыдисон æмæ йæ хайадисджытæ баззадысты райгондæй.
ДЗЕБЫСАТЫ Гуло
Comments are closed, but trackbacks and pingbacks are open.