Нæ дуджы астæуккаг æмæ хистæр фæлтæр, абон дæр хорз хъуыды кæнынц, скъолайы къæсæрæй бахизгæйæ, уыдоны канд ахуырыл кæй нæ цайдагъ кодтой, фæлæ ма семæ кæй кодтой æппæтварсон хъомыладон куыст дæр. Райдианы-иу уыдон систы октябронтæ, уый фæстæ-иу сæ райстой ногдзауты рæнхъытæм, хистæркъласонтæ суæвгæйæ та-иу систы фæскомцæдисонтæ.
Ногдзауты организацийы сырæзтыл ацы бонты сæххæст 100 азы æмæ кæд 30 азы дæргъы нал уæвы, уæддæр нæ ферох. Нæ республикæйы хицæн скъолаты сног кодтой ацы организацийы архайд æмæ йын дарддæр кæнынц йæ кадджын традицитæ. Нæ горæты 5-æм астæуккаг скъолайы 19-æм майы цытджын æгъдауæй банысан кодтой ацы бæрæгбон. Уый охыл ардæм æрбацыдысты РХИ-йы Компартийы ЦК-йы сæрдар Коцты Станислав, йæ хæдивæг – РХИ-йы Парламенты ахуырад æмæ зонады фæдыл комитеты сæрдар Уырыгаты Инал, РХИ-йы Компартийы ЦК-йы секретарь Тадтаты Таймураз, РХИ-йы Ахуырад æмæ зонады министр Гасситы Натали, йæ хæдивæг – Гаглойты Елиса, ахуырады æндæр æмæ æндæр бæрнон кусджытæ, РХИ-йы Парламенты æртæ сæвзæрсты депутат, РХИ-йы адæмон ахуыргæнæг Уалыты Розæ, Сывæллæтты сфæлдыстадон галуаны директор Джиоты Арянæ, ногдзауты æмæ фæскомцæдисон змæлды ветерантæ Санахъоты Иринæ æмæ Санахъоты-Гагнидзе Тамарæ.
Мадзалы райдианы айзæлыдысты Хуссар Ирыстоны гимны зæлтæ æмæ залмæ æрбацæуджыты размæ рахызтысты ногдзауты отрядтæ. Рапорттæ радтыны фæстæ ныхасы рацыд скъолайы хъомылады фарстыты фæдыл директоры хæдивæг Тедеты Ноннæ. Уый æрдзырдта скъолайы ногдзауты организаци “Ногдзау”-ы сырæзты тыххæй. Куыд банысан кодта, афтæмæй организаци йæ архайд райдыдта 2008 азы августы трагикон цауты фæстæ. Уый иу кæны 10 азæй 14 азы онг кары сывæллæтты. Организацимæ сæ бон у бацæуын алкæмæн дæр, цахæм нацийы минæвар у, цы диныл хæст у, куыд ахуыр кæны, уыдæттæм нæ кæсгæйæ. Йæ сырæзты нысан у, цæмæй сывæллæттæ хъомыл кæной намысджынæй, хорз ахуыр кæной, уарзой кусын, уой ныфсхаст æмæ уарзой сæ райгуырæн бæстæ. Фæстаг рæстæджыты йæ рæнхъытæм бацæуынц дæсгай лæппутæ æмæ чызджытæ. Мæй дыууæ хатты уагъд цæуынц ногдзауты линейкæтæ, цыран ногдзаутæ хыгъд радтынц сæ бакæнгæ куысты тыххæй. Раныхасгæнæг куыд загъта, афтæмæй сын сæ архайд тынг фæкъуылымпы кодта коронавирусы пандеми, фæлæ, уымæ нæ кæсгæйæ, уæддæр бирæ бакуыстæуыд. Йæ хъуыдымæ гæсгæ скъолайы ногдзауты организацийы руаджы æххæст цæуынц хъомыладон куысты æппæт формæтæ дæр – удварнон-хæрзæгъ-дауон, æфсæддон-патриотон, фæллойадон æмæ æндæр ахæм-тæ. Тедеты Ноннæ куыд банысан кодта, афтæмæй ацы куысты æдзух йæ фарсмæ уыдысты ногдзауон æмæ фæскомцæдисон змæлды ветерантæ – Бестауты Азæ, Уалыты Розæ, Бекъойты Юзæ, Гæбæраты Екатеринæ, Бежанты Мананæ æмæ æндæртæ. “Не скъола хъæздыг у йæ традицитæй. Мах бахъахъхъæдтам советон дуджы традициты æмæ ныртæккæ дæр нæ ахуыргæнинæгтæй 120 адæймаджы сæрыстырæй хæссынц ногдзауты ном. Уыдон активон хайад райсынц куыд горæтон, афтæ республикæйы масштабты уагъдцæуæг мадзæлтты дæр. Æз мæхæдæг дæр 1984 азæй кусын райдыдтон хистæр пионерраздзогæй æмæ уыцы азты æрымысын стыр æхцондзинады æнкъарæнтимæ”, – загъта Ноннæ.
Бæрæгбонон мадзалы ахуыргæнинæгтæн æмæ мадзалмæ æрбацæуджытæн арфæйы ныхæстæ ракодта скъолайы директор Туаты Мадинæ. Уый банысан кодта мадзалы ахсджиагдзинад æмæ æрымысыд, йæхæдæг дæр уыдоны цахъхъæнæй куы бацыд ногдзауты рæнхъытæм, уæд йæ зæрдæ рæсугъд цины æнкъарæнтæй куыд байдзаг. «Ногдзау йæ архайдæй кæддæриддæр цæвиттойнаг хъуамæ суа æмæ ацы хорз традици нæ ферох кодтой нæ горæты 5-æм скъолайы ахуыргæнинæгтæ æмæ нæ фæнды, цæмæй Хуссар Ирыстоны ахуырдзаутæ суой æппæт адæмтæн дæр цæвиттойнаг», – загъта скъолайы директор.
Сæ бæрæгбоны цытæн ахуыргæнинæгтæн раарфæ кодтой Тадтаты Таймураз, Джиоты Арянæ, Гаглойты Елиса. Коммунистон партийы номæй сын зæрдæбын арфæтæ ракодта Уырыгаты Инал æмæ сын йæ цæст бауарзта ахуырфæразондзинад, цæвиттойнаг уагахаст, кæрæдзи уарзондзинад æмæ сын бакодта зæрдылдарæн лæвæрттæ.
Йæ раныхасы Ахуырады министр Гасситы Натали дæр банысан кодта, зæгъгæ, ногдзауты дуджы традицитæ сæ нысаниуæг нæ фесæфтой абон дæр. “Мах иууылдæр стæм ногдзауты дугæй æмæ нæ удыхъæды цæрынц, уæды рæстæгæй цы æргъадтæ райстам, уыдон иууылдæр æмæ афтæмæй баззайдзысты нæ зæрдæты. Уыдон та сты хорзмæ тырнын, хорз хъуыддæгтæ аразын, хæларзæрдæ уæвын. Æмæ иттæг хорз у, сымахæн кæй ис ногдзауты организаци, афтæ ма организаци “Раззагонтæ”. Уый у командон тырнынад, зæрдæйы уаг, иууон тырнынад стыр хъуыддæгтæм æмæ рæсугъддзинадмæ”, – загъта Гасситы Натали.
Йæ раныхасы РХИ-йы адæмон ахуыргæнæг, Парламенты депутат Уалыты Розæ куыд загъта, афтæмæй советон дуджы октябронты, ногдзауты æмæ фæскомцæдисонты кæддæриддæр иу кодта фидар хæлардзинад. Уый куыд загъта, афтæмæй Советон Цæдисы нымадæуыд 23 милуан ногдзауы. Æмæ абон махæн æхсызгон у, кæй сын хъахъхъæнæм сæ традициты. “Ногдзау” – уый нысан кæны коммæгæс уæвын, хорз ахуыр кæнын, æндæр сывæллæттæн цæвиттойнаг уæвын», – загъта йæ раныхасы Уалыты Розæ æмæ сын йæ цæст бауарзта, цæмæй уой хæларзæрдæтæ, суой æцæг адæймæгтæ.
Скъолайы ахуырдзаутæн арфæйы ныхæстæ загътой иннæ уазджытæ дæр æмæ уый фæстæ та уыдис ахуыргæнинæгты ногдзаутæм райсыны церемони. Исгæ та ракодтой иууыл активондæр ахуыргæнинæгты. Уыдонæн сæ хъуыртыл сырх галстуктæ бабастой скъолайы директор Туаты Мадинæ æмæ ногдзауон змæлды ветерантæ. Тедеты Ноннæйæн та лæвæрд æрцыд грамо-тæ ахуырады министрадæй. Афтæ ма грамотæтæй хорзæхджын æрцыдысты ногдзауты къласгæстæ æмæ иууыл хуыздæр ахуыргæнинæгтæ. Ноннæ куыд зæгъы, афтæмæй сын грамотæтæ лæвар смыхуыр кодта кондадон-полиграфион куыстуаты директор Икъаты Мадинæ æмæ йын зæгъынц бузныг.
Нæ горæты фæндзæм астæуккаг скъола æвдисæн уыдис нæ адæмы хъизæмæрттæ æвзарæн азтæн. Йæ кæрты æнцойад кæнынц нæ адæмы сæрибардзинады сæрыл йæ цард нывондæн чи æрхаста, уыцы сахъгуырд ирон хъæбатыр лæппутæ, æмæ сын мадзалмæ æрбацæуджытæ Украинæйы специалон операцийы Хуссар Ирыстонæй чи фæмард сты, уыдонимæ иумæ, иу минут æмырæй алæууынæй, ссардтой сæ рухс нæмттæ.
Банысан кæнын хъæуы уый дæр, æмæ Уæрæсейы дæр æндидзыд кæй цæуы сывæллæтты æмæ фæсивæды ног организаци “Большая перемена”, зæгъгæ. Æмæ хорз уаид, нæ республикæйы дæр æппæт хъомысадæй куы сæндидзид ахæм организаци.
Иу бæрæгбон дæр æнæ хъæлдзæгдзинадæй нæ фидауы, уымæ гæсгæ раныхасгæнæгæй раныхасгæнæджы ‘хсæн йæ арæхстдзинад æвдыста скъолайы вокалон къорд “Улыбка”. Мадзал рауад цымыдисон, уымæн æмæ уырдæм æрбацæуджытæй алчи дæр æрымысыд йæ сабион бонтæй уыцы рæсугъд зæрдылдарæн цау æмæ баззадысты райгондæй.
БЕСТАУТЫ Валя
Comments are closed, but trackbacks and pingbacks are open.