Нæ республикæйы царды ахсджиаг цау уыдис, хуыйæн фабрикæ цалдæр азы размæ йæ дуæрттæ кæй бакодта БТК-4 номимæ æмæ та дзы кусджыты хъæлæба кæй райхъуыст, ногæй та продукци дæттын кæй райдыдта. Ацы фабрикæ, куыд зонæм, афтæмæй байгом зынгæ ирон амалиуæггæнæг Болоты Таймуразы финансон æххуысы руаджы. Уый ифтонг у нырыккон хуыйæн ифтонггæрзтæй æмæ дзы сæхицæн куыст ссардтой 500 адæймаджы бæрц.

Ацы бæрæгбон — Рог сæудæджерады кусджыты бон банысан кодтой БТК-4-йы куыстуарзаг коллектив дæр киноконцертон зал «Чермен»-ы сæ бæрæгбоны цытæн кусджытæн раарфæ кæнынмæ æрбацыдысты РХИ-йы Президент Тыбылты Леонид, РХИ-йы Сæудæджерад, транспорт æмæ энергетикæйы комитеты сæрдар Дзассеты Васили æмæ æндæр бæрнон кусджытæ.

Йæ раныхасы фабрикæйы генералон директор Коцты Хъазбег раарфæ кодта Президент Тыбылты Леонидæн, ацы рæсугъд бæрæгбоны хайад кæй райста æмæ сæ циндзинад семæ кæй дих кæны. — Растдæр сымах хъæппæрисон архайды руаджы бантыст Владимир Путинимæ, стæй БТК-4-йы президент æмæ не ‘мзæххон Болоты Таймуразимæ баныхас кæнын, цæмæй сæндидзыдтаид Цхинвалы хуыйæн фабрикæ æмæ æрыздæхтаид йæ традицитæм æмæ ноджыдæр раарфæ кодта Тыбылты Леонидæн.

Йæ раныхасы уый зæрдиаг арфæтæ ракодта БТК-4-йы кусджытæн сæ бæрæгбоны цытæн æмæ нæ республикæйы рæзты сæйраг рахæцæныл уый банымадта сæудæджерады. Æнæ сæудæджерад иу бæстæйæн дæр уæвæн кæй нæй. Æмæ куыстуаты кусджытæн загъта æнтысгæ куысты фæндиæгтæ.

— Дарддæр дæр мæн ныфс ис, нæ фабрикæ кæй уаддзæнис гъæдджын продукци, уымæй, — загъта йæ ныхасы кæрон фабрикæйы генералон директор æмæ ныхасы бар радта Президент Тыбылты Леонидæн.

Йæ раныхасы уый зæрдæбын арфæтæ загъта кусджытæн æмæ банысан кодта, ацы бæрæгбон, æцæгæйдæр, кæй у рæсугъд æмæ бæркадхæссæг, хуыйæн фабрикæйæн раздæр дæр кæй уыд стыр кад. Сæудæджерады къабазы уый ахста стыр бынат. Президент стыр æхсызгонæй дзырдта, абон уыцы традицитæм фабрикæ ногæй кæй æрыздæхт æмæ йæ кус-джытæн йæ цæст бауарзта, цæмæй ноджы стырдæр æнтыстытæ æфта сæ къухы. Банысан кодта, зæгъгæ, абон зæрдылдарæн бон у канд уæ коллективæн нæ, фæлæ æгас Ирыстонæн дæр.

Президент ма куыд загъта, афтæмæй йæ ныфс ис БТК-4 кæй суыдзæнис нæ сæудæджерады флагман. Уый ма стыр бузныг загъта не ‘мзæххон амалиуæггæнæг Болоты Таймуразæн, кæцыйы фæндонмæ гæсгæ сæндидзыдта хуыйæн фабрикæ. Бузныг загъта БТК-4 разамынадæн, кæй архайынц кусджытæн æппæт уавæртæ саразынæн фæллойадон архайд кæнынæн.

— Мæн ныфс ис, БТК-4-йы цæвиттойнаг архайд кæй бафæзмдзысты æндæр куыстуæттæ дæр, ацы куыстуат та дарддæр дæр кæй рæздзæн æмæ уæрæхдæр кæндзæн, ууыл дызæрдыггæнæн кæй нæй, — загъта Президент æмæ кусджыты иу къорды схорзæхджын кодта Кады грамотæтæй.

Бестауты В.

Comments are closed, but trackbacks and pingbacks are open.