Банысан кодтой Уæлахизы бæрæгбон

Стыр Фыдыбæстæйон хæсты иумиаг знагыл фæуæлахизмæ йæ уæзгæ хайбавæрд бахаста Хуссар Ирыстон дæр. 22 мин адæймагæй фылдæр тох кодтой æппæт фронтты дæр. Нæ чысыл Ирыстоны алы фæндзæм адæймаг ссис ацы хæсты хайадисæг. Хæсты быдыры уыдон равдыстой диссаджы хъæбатырдзинад. Цхинвалы районы Дменисы хъæуæй дæр бирæтæ ацыдысты Фыдыбæстæйон хæстмæ. Бирæтæ нал æрыздæхтысты сæ райгуырæн хъæумæ.

Хъæубæстæ нæ рох кæнынц, уæлахиз сын чи æрхаста, уыдоны рухс нæмттæ. Алы аз дæр 9-æм маймæ, Уæлахизы бонмæ арæзт  æрцæуынц алыгъуызон мадзæлттæ.

8 майы, Стыр Уæлахизы 72 азы боны цытæн дæр ам ауагътой бæрæгбонон мадзал. Мадзалы хайад истой Дменисы Культурæйы хæдзар, астæуккаг скъолайы ахуыргæнинæгтæ æмæ ахуыргæнджытæ, сывæллæтты цæхæрадоны кусджытæ, хъомылгæнинæгтæ.

1941-1945 азты хæсты æмæ 1989 азæй 2008 азмæ Ирыстоны сæрвæлтау йæ сæр нывондæн чи æрхаста Дменисы хъæуæй, уыдоны номыл арæзт цырты раз æрæмбырд бирæ адæм. Мадзалмæ хуынд æрцыдысты Дменисы хъæуæй Фыдыбæстæйы хъахъхъæнджытæ, хъæумæ æввахс уæвæг уæрæсейаг арæнхъахъæнджытæ.

Цырты раз сæвæрдтой веноктæ æмæ дидинджытæ. Æрæмбырдуæвджытæ иу минут æдзæмæй алæууыдысты. Скъолайы директор Дудайты Земæ арфæйы ныхæстæ ракодта бæрæгбоны цытæн. Уый ма загъта, зæгъгæ, сомбоны фæлтæр макуыуал фенæт хæст æмæ цæрæт сыгъдæг арвы бын. Хъæуы администрацийы номæй раныхас кодта Дзанайты Заретæ. Скъолайы ахуыргæнинæгтæ æмæ рæвдауæндоны сывæллæттæ бакастысты æмдзæвгæтæ. Скъоладзаутæ азарыдысты хæстон зарджытæ «Катюша» æмæ «Кино идет».

Уæрæсейаг арæнхъахъхъæнджыты номæй Антон Шишкин раарфæ кодта мадзалмæ æрбацæуджытæн æмæ бузныг загъта йæ организатортæн Лолоты Вандæ, Джиголаты Заремæ æмæ Икъаты Анусийæн.

 

***

Уæлахизы боны цытæн 10-æм майы Дменисы Культурæйы хæдзары уагъд æрцыд концерт. Концертмæ æрбацыд тынг бирæ адæм. Байгом æй кодта Икъаты Ибрагим зарæгæй «День Победы». Къультурæйы хæдзары директор Икъаты Ануси концертмæ æрбацæуæг адæмæн ракодта бæрæгбонон арфæтæ. Уый фæстæ концертон программæ байгом ирон адæмон кафт «Симд»-æй. Зарæггæнджыты къорд азарыд хæстон зарджытæ «Катюша» æмæ æндæртæ. Хæдархайгæ къорд акафыд цалдæр ирон кафт. Сценæйыл аив кастысты æмдзæвгæтæ Джиголаты Ибрагим, Куымæридтаты Олег, Батиаты Авто æмæ Джиголаты Моника.

Концерты кæрон азарыд Икъаты Ибрагим, сæххæст кодта цалдæр зарæджы.

Икъаты Ануси бузныг загъта концертмæ æрбацæуджытæн йæ цæст сын бауарзта бирæ хорздзинæдтæ.

Адæм райгондæй баззадысты бæрæгбонон концертæй.

Дзебысаты Г.