Бавдыст æрцыд преми райсынмæ

Æвзонг журналистты цæгатирыстойнаг скъола «Эрассик»-ы рауагъдон, журналист Фидараты Дианæ ссис америкæйаг преми «Эмми»-йы номинант, кæцы лæвæрд цæуы æрвылаз дæр хуыздæр телевизион проектты тыххæй. Чызг гæнæн ис хорзæх райса, горæт Колумбийы гетто-районты, штат Миссурийы криминогенон уавæры тыххæй ног хабæртты программæйы сæр-магонд алæвæрды тыххæй. «Сентябрь-октябры уый размæ 10 азимæ абаргæйæ, ацы районты æрцыд фылдæр тыхмардæй амарыны цаутæ, уыцы нымæцы хæцæнгарзæй спайда кæнгæйæ. Сæйраджыдæр мардтой хылы рæстæджы. Æппæт фæмардуæвджытæ уыдысты æвзонг афроамерикæйæгтæ. Æхсæнадон боны фæтк змæлд Black Lives Matter-имæ куыд фенын кодта, уымæ гæсгæ ацы рауагъд разынд актуалон», – радзырдта «15-æм Регионæн» Фидараты Дианæ. Журналист иу аз æмæ æрдæг куыста регионалон телеканал KOMU-йы, кæцы ис NBC Universal æмæ Миссурийы университеты къухдариуæгады бын. «Æз зыдтон телеканалы къухдариуæгад кæй арвыста бавдыстытæ (заявки) азы хуыздæр рауагъдтæ, сюжеттæ æмæ программæтимæ. Мæнæн марты дзырдтой, зæгъгæ, нын æрвитынц нæ сæрмагонд рауагъд, фæлæ æз уый тыххæй ферох кодтон. Ныффыста мæм æххæстгæнæг продюсер, зæгъгæ, уыдонæн сæ бон нæу мæ америкæйаг номыртæм фæдзурын. Уыцы номыр та рахицæн кодтон июлы райдианы Уæрæсемæ куы æрæздæхтæн, уæд. Раст зæгъгæйæ, мæ нырма дæр нæ уырны. Преми «Эмми»-йæ хорзæхджын кæныны церемони уыдзæн 22-æм ноябры. Кæд фæуæлахиз уон, уæд преми райсдзæн телеканал, уымæн æмæ æз пайда кодтон йæ ресурстæй программæ цæттæ кæныны рæстæджы», – дзуры чызг. АИШ-мæ Фидараты Дианæ ацыд 2018 азы. Уый каст фæцис горæт Колумбийы Миссурийы университеты журналистикæйы факультет телевизион продюсеры дæсныйадыл. Магистры къæпхæн исгæйæ, журналист дыууæ азы стажировкæ цыд æмæ куыста йæ профессийыл. Ныртæккæ уый цæры Уæрæсейы, фæлæ йæхи цæттæ кæны Европæмæ ацæуынмæ.