Раздæр, Советон Цæдисы рæстæджы, нæ цард тынг хъæздыг уыд алыгъуызон хæрзиуджытæй. Уыдонæй  сæйрагдæр уыд адæмы æдасдзинад.

Фæлæ Советон Цæдисы ныппырхимæ схæлæттаг адæмы цард, уæлдай дæр та чысылнымæц нациты цард. Уыцы нымæцы хъизæмайраг фæци Хуссар Ирыстоны цæрджыты цард дæр. Гуырдзыйы аххосæй сын нал дæр ахизæнтæ æмæ нал дæр æрбахизæнтæ уыд. Хъæуты цæрджыты культурон цардыл дзырд дæр нал цыд.

Раздæр-иу кæд Ленингоры районы хъæутæм арæх концерттæ æмæ спектаклтимæ æрцыдысты хуссарирыстойнаг артисттæ, уæд 20 азы бæрц гуырдзиаг-ирон ныхмæлæуды рæстæджы ленингойраг адæм тынг фæцух сты ахæм хиирхæфсæн мадзæлттæй. Фæлæ хуыздæр фæуæд Стыр Уæрæсе, нæ хæдбардзинад нын куы банымадта, уæдæй фæстæмæ сæ риуты дзаг сулæфыдысты Ленингоры районы хъæуты цæрджытæ дæр. Кæд нырма Цхинвалæй Цъинагары зонæйы хъæутæм цæугæйæ, фæндагыл бирæ рæстæг бахъæуæм, уæддæр нæ ныфс ис, æввахс рæстæджы цыбыр фæндаг кæй хонынц, уый арæзт кæй æрцæудзæн. Уыцы фæндаг арæзт куы æрцæуа, уæд нæм æнæзивæгдæрæй цæудзысты Цхинвалæй, куыд эстрадон зарæггæнджытæ, афтæ æндæр аивады къордтæ дæр.

Фæлæ уал нæм нырма дард фæндгыл дæр дыууæ хатты фæуазæг сты Хетæгкаты Къостайы номыл Хуссар Ирыстоны паддзахадон драмон театры артисттæ. 23-æм августы уыдон Цъинагары зонæйы хъæутæ – Гдулет, Дзукъаты хъæу æмæ Цъинагары хъæуы цæрджытæн равдыстой спектакль «Æфсин». Изæры Цъинагары хъæуы Культурæйы хæдзармæ æрбамбырд сты ацы хъæуты цæрджытæ. Уыдон стыр райзæрдæйæ сæмбæлдысты цхинвайлаг уазджытыл æмæ сын райгондæй бакастысты сæ арæхстдзинадмæ. Спектакль сценмæкæсджыты зæрдæмæ тынг кæй фæцыд, уый бæрæг уыд сценæмæкæсджытæ сын тыхджын къухæмдзæгъд  кæй кодтой, уымæй дæр.

Спектаклы кæрон цхинвайлаг артисттæ бузныджы ныхæстæ загътой хъæубæсты цæрджытæн, рæстæг кæй ссардтой æмæ спектаклмæ кæй æрбацыдысты, уый тыххæй. Фысымтæ дæр сæ уазджытæн дзырдтой арфæйы ныхæстæ æмæ фæндиæгтæ. Уыцы фæндиæгтæй иу уыд, цæмæй сæм арæхдæр цæуой æмæ сын æвдисой ахæм хорз спектаклтæ, науæд хъæууон цæрджытæ æгæр скадавар сты хиирхæфсæн мадзæлттæй.

Банысан кæнын хъæуы уый дæр æмæ паддзахадон драмон театры артисттæ иу мæйы размæ дæр кæй æрцыдысты Цъинагармæ спектаклимæ. Уæд дæр сыл сæ фысымтæ сæмбæлдысты райзæрдæйæ. Дыууæ хатты дæр цхинвайлаг артисттæ сæ арæхстдзинадæй тынг барухс кодтой ацы хъæуты цæрджыты зæрдæтæ.

Уалыты Зоя,

Цъинагар

Comments are closed, but trackbacks and pingbacks are open.