Нæ горæты арæзт цæуы паддзахадон фæсауæрцы объект. Стратегион арæзтад цæттæ уыдзæн ног азмæ. Арæзт цæуы горæты Хурскæсæн фарс, раздæры Авиацион заводы территорийыл. Объект аразынмæ бавнæлдта бынæттон арæзтадон фирмæ «Цхинвальская строительная компания». Ангарон типы арæзтады иумæйаг фæзуат у 1365 квадратон метры. Арæзт цæуы конструкцитæй æмæ абон цæттæ сты йæ каркастæ.

Арæзтады бригадир Джиоты Форик куыд зæгъы, афтæмæй ангармæ уагъд æрцыдысты коммуникацион хызæгтæ. Мидæггагон коммуникацийы системæйæ дарддæр ма ам арæзт цæуы, гидроизоляци æмæ зынгсирвæзты рæстæджы цы уæлæмхас донпырхгæнæн системæ хъуамæ скуса, уый дæр. Кусджытæ фæуд кæнынц территорийы алфæмблай хæрзарæзт æмæ монтажгæ­нæн куыстытæ дæр.

«Абоны бон куыстытæн сæ 70 процент фæуд сты. Цы арæзтадон-монтажгæнæн куыстытæ ма дзы ис, уыдон дæр афæдзы кæронмæ фæуыдзыстæм. Ныртæккæ объекты кусы 15 адæймаджы бæрц. Куыстытæ арæзт цæуынц графикмæ гæсгæ. Проектмæ гæсгæ Паддзахадон фæсауæрцы резервон объекты уыдзæн хицæн æфтауцтæ: хæлцадон продукттæн, арæзтадон æрмæджы­тæн, электронон техникæ, спецдарæсы хуызтæ æмæ æндæртæн. Административон блокы та уыдзæн офис, персоналæн — хицæн хатæнтæ, инвентарь æфснайд кæм хъуамæ цæуа, ахæм бынат», — загъта Джиоты Форик.

Æмткæй паддзахадон фæсауæрцы объекты территори æрцахста 7 мин кв. м. Цæмæй дзы цы автотранспорты хуызтæ цæуой, уыдонæн сæ бон ya сæрибарæй разилын. Ацы арæзтад арæзт цæуы Инвестицион программæйы фæлгæтты. Хицæн ын æрцыд 43 милуан æмæ 661 мин сомы. Йæ саразыны нысан у форс-мажорон цауты рæстæджы, цæмæй паддзахадæн уа йæхи фæсауæрцтæ æмæ фыццаг рады цардуагон товартæй сифтонг кæна йе ‘мбæстæгты.

Ахæм объект саразын рагæй домдта Уæлвæткон уавæрты министрад. Æвирхъау цаутæй хызт нæу нæ республикæ, уæлдайдæр та — зымæгон бонты, уымæ гæсгæ хъуамæ алы хатт дæр уа фæсауæрц канд хæлцадон продукттæй нæ, фæлæ æндæр фыццаг рады æрмæджытæй дæр. Махмæ продуктты кризис арæх сæвзæры,   арæны сæртыл хизгæйæ дæр, стæй зымæгон бонты зæйцæуыны рæстæджы хатт Транскавказы магистраль сæхгæнынц къуыригæйтты. Ныр ахæм объект арæзт кæй цæуы, уый хорзæрдæм бандавдзæнис республикæйыл.

УАЗÆГТЫ Марфа

Comments are closed, but trackbacks and pingbacks are open.