Цхинвалы районы милицийы управленийы фадыгон инспектортæ æмæ фæдагуырды хайады кусджытæ ауагътой профилактикон рейдон мадзæлттæ базарадон объектты.

Сæ басгæрстытæ нысанмæздæхт уыдысты уæййаг электронон сигареттæ сбæлвырд кæнынмæ æмæ бабæрæг кодтой Зары, Къостайыхъæуы, Тбеты хъæуты дуканитæ æмæ ма «ТЭК»-ы базар. Рейдон мадзæлтты рæстæджы базарадон объектты хицæуттæй райстой къухæрфыстытæ, куыд нæ ласдзысты уæй кæнынмæ электронон сигареттæ æмæ зонгæ сты, закъоны фæлгæтты цы æфхæрд баййафдзысты тæссаг товартæ уæй кæныны фæдыл, уыцы фæдзæхстимæ.

Электронон сигареттæ нæ республикæйы территоримæ ласын æмæ уæй кæныны бар нæй 2021 азæй фæстæмæ — нæ Парламенты сæ банымадтой тæссаг предметтыл æмæ уынаффæ рахастой, цæмæй сын Хуссар Ирыстоны ма уа реализаци кæныны бар. Фæткхалджытæ æрцæуынц иваргонд æмæ ма сын сæ товар дæр сконфискаци кæнынц.

ДЖИОТЫ Алыксандр