БЕСЛÆНЫ МЕДИЦИНОН ЦЕНТРЫ – НОГ ТЕХНОЛОГИТÆ

Беслæны, Цæгат Кавказы бирæпрофилон медицинон центры æрцыд, адæм рагæй кæмæ æнхъæлмæ кастысты, ахæм æхсызгон цау: нырæй фæстæмæ нейрохирургион хайады астæуыстæджы грыжæтыл операцитæ кæндзысты ног системæмæ гæсгæ. Хуыйны эндоскопия. Уый у операцийы рогдæр хуыз. Астæуыстæджы дискты грыжæтæ аиуварс кæнынæн бахъæудзæн буары иу сантиметры бæрц фæлыг кæнын æмæ бæрæг бынатмæ сæрмагонд тæнгъæд бауадзын шприцы хуызæн приборæй. Уыцы тæнгъæд сæндидзын кæндзæн астæуыстæджы хæлд диск. Ахæм операцийæн хъæуы æрдæг сахат рæстæг, иу бонмæ рынчын йæ хæдзармæ рацæудзæн, дыууæ мæйы реабилитацийы бæсты та йæ бахъæудзæн цалдæр боны.

Кæй зæгъын æй хъæуы, традицион операцитæ дæр ничи аивта, кæцыдæр цауты æнæ хирургион бавнæлдæй эндоскопийæ ницы бакæнæн ис, фæлæ уыдон стæм сты. Бафиппайын ма хъæуы уый дæр æмæ нырмæ стыр хирургион операцитæм йæ ныфс алчи кæй нæ хаста, фæлтау-иу баззадысты инвалидтæй. Ныр эндоскопия аирвæзын кæндзæн бирæ рынчынты.

Эндоскопия ма нырмæ дæр нæ республикæйы клиникæты хаттæй-хатт практикæйы уагъд цыд, фæлæ ацы технологи официалон уагæй фидаргонд æрцыд ныр. Цалдæр азы дзы пайда кæнынц Мæскуыйы, Санкт-Петербурджы, Новосибирскы æмæ Краснодары.

Цæгат Кавказы бирæпрофилон медицинон центры нейрохирургион хайады сæргълæууæг Дедегкаты Азæмæт куыд загъта, афтæмæй нæ республикæйы климат у уымæл, уæззау, уый та стджытæн у æппæтæй æвзæрдæр. Уымæ гæсгæ нæм тынг бирæ ис стджыты низтимæ рынчынтæ. Ахæм уавæрты эндоскопийы фæзынд у стыр арфæйаг хъуыддаг. “Эндоскопия рогдæр операци кæй у, æрмæст уымæй нæ хицæн кæны традиционæй, фæлæ ма у бирæ асламдæр. Саразæн æй ис медицинон полис кæнæ квотæйæ. Бахъæудзæн ма 15 – 20 мин сомы алы лыстæг хæрдзтæн. Афтæмæй традицион операци та у 150 – 200 мин сомы. Квотæ дæр, раздæрау, зын райсæн нал у. Уæд сæ Æнæниздзинад хъахъхъæнынады министрад лæвæрдта. Мах фенæм рынчыны МРТ-йы бæрæггæнæнтæ. Кæд æмæ йæ эндоскопия хъæуы, разы у операцийыл, уæд ратты æрмæст анализтæ, иннæ хабæрттæ кæнæм нæхæдæг, стæй йæ афон куы æрцæуы, уæд ын фехъусын кæнæм”, – банысан кодта Дедегкайы фырт.

Дедегкаты Азæмæт ма куыд загъта, афтæмæй ныридæгæн эндоскопийы хуызы скодтой цалдæр операци æмæ рынчынтæ баззадысты райгондæй. Даддæр, планмæ гæсгæ сæ зæрды ис афæдз сæдæ операцийы бæрц аразын.

Нæ уацх.