Дзæуджыхъæуы национ зонадон библиотекæйы уыд ирон æвзагмæ тæлмацæй  Библийы презентаци. Тæлмацыл куыст цыд 20 азы бæрц. Архиерей, Дзæуджыхъæуккаг æмæ Алайнаг епископ Герасимы ныхæстæм гæсгæ, тæлмац у уникалон, кæцы æххæст æрцыд рагондзуттаг æмæ рагонгрекъаг æвзæгтыл оригиналон тексттæй.

Эпохалон цауы тыххæй презентацийы радзырдтой дзæуджыхъæуккаг епархийы, республикæйы зонадон æмæ культурон интеллигенцийы минæвæрттæ. Презентаци райдыдта иерей Хъуысаты Игоры раныхасæй, кæцы ирон æвзагыл бакаст Библийæ скъуыддзаг. Уый фæстæ цитатæ æрхаста фыццаг ирон рухстауджытæй сæ иу – Æгъуызаты Иуанейы ныхæстæй Евангелы йæ тæлмацы разныхасæй: «Хуыцаумæ кувын, цæмæй уый ме ‘мтуг ирон адæм æмæ йæ цæуæтæн чиныгыл радта ахуырад зæрдæйæ æмæ зондæй». («Молю бога, чтобы он дал моему единокровному народу и его потомству просветиться через книгу сердцем и разумом»)

«Мах хъуамæ æрхъуыды кæнæм уыцы адæймæгты нæмттæ, кæцытæ сæ ‘ппæт цард снывонд кодтой, цæмæй ацы куыст арæзт æрцыдаид. Бирæтæ йæ нæ зонынц паддзахадон æмæ æхсæнадон архайæг, ирон æвзагыл литературæ рауадзæг Байаты Гаппо 1917 азы революцийы фæстæ Германмæ эмиграцийы кæй арæзта Библийы тæлмацтæ. Уыцы рæнхъы лæууынц Жускаты Соломон, Цорæты Васили, Григори Мчедлов, Хъараты Георги æмæ Алексей Ладжикоевы нæмттæ. Ирон æвзагмæ Библийы æххæст тæлмац у ацы рухстауджыты дарддæры куыст», – загъта Хъуысаты Игорь.

Национ зонадон библиотекæйы директор Хайманты Иринæ банысан кодта, зæгъгæ, «ирон æвзагмæ Библийы тæлмац æмæ йæ презентаци Аланийы дзуарæфтыдыл 1100 азы сæххæсты цытæн бæрæгбонон мадзæлтты рæнхъы кæй ис, уый стыр цау у. Уæлдай бузныджы ныхæстæ зæгъын мæ фæнды тæлмацгæнджытæн. Абон мах систæм æрцæугæ диссагæн æвдисæнтæ. Мæ зæрдæ зæгъы ирон адæмæн Хуыцауы арфæ æмæ уарзондзинад».

Епископ Герасимы ныхæстæм гæсгæ, ирон æвзагыл Библийы рауагъд у Аланийы дзуарæфтыдыл 1100 азы сæххæсты цытæн сæйраг мадзæлттæй  æмæ ахсджиаг цаутæй иу, кæцы ахъаз кæны ирон æвзаг бахъахъхъæнынæн. «Ирыстонæн национ æвзаг бахъахъхъæныны темæ у ахсджиаг æмæ актуалон, уымæ гæсгæ ацы Библийы фæзындмæ æнхъæлмæ кæсынц æнæрхъæцæй æмæ цымыдисæй», – загъта епископ.

РЦИ-Аланийы хицауады сæрдар Дзанайты Барис арфæйы ныхæстæ загъта республикæйы сæргълæууæг Сергей Меняйлойы номæй æмæ хорзæхтæ æмæ грамотæтæ радта Библийы тæлмацыл чи куыста, уыцы коллективæн. «Ирон æвзагмæ Библийы тæлмац стыр лæвар у Ирыстоны æппæт чырыстон дунейæн. Ахуыргæндтæ бакодтой егъау, бирæазон куыст», – загъта Дзанайты Барис.

Уæрæсейаг Библийы æхсæнады æххæстгæнæг директор Анатолий Руденко загъта, зæгъгæ, ирон æвзагмæ Библийы тæлмац æххæст æрцыд æрмæст тæлмацгæнджыты фæрцы нæ, фæлæ ма ирон адæмы арф чырыстон традицийы фæрцы дæр.

«Уый у стыр диссаг æмæ циндзинад. Ацы рауагъдыл чи бакуыста – тæлмацгæнджытæ, мыхуыргæнджытæ, корректортæ, редактортæ æмæ æндæртæ сарæзтой стыр сгуыхтдзинад. Уыдон куыстой, куывдтой æмæ диссаг æрцыд. Ныр Ирыстоны алы цæрæг дæр Хуыцауы ныхас бакæсдзæн йæ мадæлон æвзагыл. Хуыцауы ныхас бацæудзæн алы ироны хæдзармæ дæр», – загъта дзæуджыхъæуккаг æмæ Алайнаг епископ Герасим.

Ирон æвзагыл Зæронд æмæ Ног фæдзæхсты чингуытæ рухс кæй федтой, уый у Библийы тæлмацы институты, Уæрæсейаг библийы æхсæнады, Уæрæсе, Герман, Нидерландты æмæ хуыздæр ирон тæлмацгæнджытæ – Мамукъаты Хъазбег, Коцты Елизаветæ, Накъусаты-Едзиаты Наирæйы иумиаг проект. Цæмæй комкоммæ тæлмац сарæзтаиккой, уый тыххæй-иу коллектив фæхуыдта ирд литераторты дæр.

Comments are closed, but trackbacks and pingbacks are open.