Республикæ Хуссар Ирыстоны Президент Бибылты Анатоли официалон балцы ис  Уæрæсейы Федерацийы.  Паддзахады сæргълæууæг Мæскуымæ ацыд УФ-йы Президент Владимир Путины фæхуындмæ гæсгæ.

Аэропорт «Внуково-2»-йы РХИ-йы Президентыл цытджын æгъдауæй фембæлыны нысанæн схæцыдысты Республикæ Хуссар Ирыстон æмæ Уæрæсейы Федерацийы паддзахадон тырысатыл, æххæст æрцыдысты дыууæ бæстæйы гимнтæ. Бибылты Анатоли æмæ йыл чи фембæлд, уый  УФ-йы Фæсарæйнаг хъуыддæгты министрады Цыппæрæм департаменты директор Алексей Павловский азылдысты Мæскуыйы гарнизоны цытджын хъарагъулы рæнхъыл. Уыдон æгасцу  загътой РХИ-йы делегацийæн, Уæрæсейы  РХИ-йы минæварады кусджытæн æмæ Уæрæсейы фарсы минæвæрттæн.

Хуссар Ирыстоны делегацийы сконды Мæскуымæ æрцыдысты РХИ-йы Президенты Администрацийы къухдариуæггæнæг Козаты Игорь, Фæсарæйнаг хъуыддæгты министр Медойты Димитр, Æнæниздзинад хъахъхъæнын æмæ социалон рæзты министр Тотчиты Георги, Мидхъуыддæгты министр Наниты Игорь, Финансты министр Хæбæлаты Азæ, РХИ-йы Президенты паддзахадон уынаффæгæнæг Коцты Константин, Президенты æххуысгæнæг Гæззаты Давид.

РХИ-йы Фæсарæйнаг хъуыддæгты министрады пресс-службæ куыд хъусын кæны, уымæ гæсгæ дыууæ бæстæйы раздзогты фембæлд нысангонд у 14 ноябрмæ. Дыууæ бæстæйы сæргълæуджытæ кæнынц дыууæфарсон ахастыты рæзты бирæ фарстытыл æруынаффæ кæныны фæнд, фыццаг рады сты социалон-экономикон фадыджы, афтæ ма регионалон æмæ æхсæнадæмон проблемæтæ. Уæлдай хъусдард здæхт æрцæудзæн Фæскавказы регионы æдасдзинад æмæ стабилондзинад сфидардæр кæныны тематикæмæ. РХИ-йы Президенты официалон балц аххæсдзæн 15 ноябры онг, зæгъгæ, загътой пресс-службæйы.

Владимир Путин æмæ Бибылты Анатолийы уый размæйы фембæлд уыд ацы аз 2 майы, Хуссар Ирыстоны Президентæй æвзæрст куы ‘рцыд, уый фæстæ. Майы бадзырдты рæстæджы дыууæ паддзахады раздзогтæ æруынаффæ кодтой Хуссар Ирыстоны æдасдзинад æмæ социалон-экономикон фарстытыл. Сæрмагондæй, Уæрæсейы Президент хъусдард аздæхта, Æмцæдисад æмæ интеграцийы тыххæй бадзырд куыд æххæст цæуы, уымæ.

«Зонын æй, ды дæ алы здæхтыты Уæрæсеимæ ахастыты рæзты фарсхæцæг. Махмæ æххæст цæуы бæлвырд бадзырд, ды рагæйдæр йæ фарсхæцæг кæмæн уыдтæ, уый. Ныфс мæ ис, дæ къухдариуæгады бын республикæ кæй сараздзæн æппæт дæр ацы бадзырд сæххæст кæныны тыххæй», — банысан кодта уæд Владимир Путин.

Уæрæсейаг раздзог ма баныфсæвæрдта, дарддæр дæр Хуссар Ирыстонæн кæй æххуыс кæндзæн, уымæй. «Уæрæсе финанс кæны социалон хуызы бирæ фарстытæ, мах дарддæр дæр кæнæм уый аразыны фæнд. Рæзын кæндзыстæм инвестицион здæхт, ома, кусдзыстæм республикæйы инфраструктурæ сæндидзын кæныныл æмæ экономикæйы рæзтæн уавæртæ аразыныл», — загъта майы бадзырдты рæстæджы Владимир Путин.

Уæрæсемæ Бибылты Анатолийы балцы рæстæджы къухтæ фыст æрцæудзысты Мидхъуыддæгты æмæ Æнæниздзинад хъахъхъæныны министрадты хаххыл сразыдзинæдтыл.

«Паддзахады сæргълæуджыты хайадистæй къухтæ фыст æрцæудзысты Мидхъуыддæгты æмæ Æнæниздзинад хъахъхъæныны министрадты хаххыл æхсæнхицауадон сразыдзинæдтыл», — хъусын кæны Хуссар Ирыстоны  Президенты пресс-службæ.

Дыууæ бæстæйы сæргълæуджыты бадзырдтæй дарддæр ма УФ-йы æмæ РХИ-йы делегацийы уæнгты хайадистæй уыдзæн рауæрæхгонд форматы фембæлд.

Бибылты Анатолийæн ма фембæлд уыдзæн Науруйы Президент Барон Дивавеси Вакаимæ. Уымæй дарддæр ма  РХИ-йы Президент фембæлдзæн УФ-йы Фæдагурæн комитеты Сæрдар Александр Бастрыкинимæ.

Бацæттæ йæ кодта

Кокайты Заринæ

Comments are closed, but trackbacks and pingbacks are open.