12-æм августы Хуссар Ирыстонмæ æрцыдысты сæрдыгон культурон-ахуырадон курс «Этнолагерь-2017»-ы хайадисджытæ, кæцы организаци æрцыд бирææмгъуыдон дунеон проект «Аланский след»-ы фæлгæтты. Республикæмæ сæ визиты размæ Нары хъæуы Хетæгкаты Къостайы Мемориалон хæдзар-музейы уазджытимæ фембæлдысты Республикæ Хуссар Ирыстоны Президент Бибылты Анатоли æмæ РЦИ-Аланийы Сæргълæууæг Битарты Вячеслав.

Проекты фæлгæтты 34 адæймаджы бæрцæй – Ирыстонæй рацæугæтæ, кæцытæ цæрынц Турк, Франц, Казахстан, Таджикистан, Венгри, Латви, Донецкы Адæмон Республикæйы, бабæрæг кодтой сæ историон Райгуырæн бæстæ мадæлон æвзаг, национ истори æмæ традицитæ сахуыр кæныны тыххæй.

Мадзалы ма хайад райстой РХИ-йы Фæсарæйнаг хъуыддæгты министр Медойты Димитр, Фæсивæдон политикæ, спорт æмæ туризмы фæдыл комитеты сæрдар Зассеты Сергей, РЦИ-Аланийы Хицауады Сæрдары хæдивæг Фадзайты Æхсарбег, РЦИ-Аланийы Культурæйы министр Милдзыхты Руслан æмæ æндæр официалон адæймæгтæ.

Фембæлды хайадисджыты раз ныхас кæнгæйæ, Президент Бибылты Анатоли раарфæ кодта проекты организатортæн ирæтты консолидацийы фæдыл куысты тыххæй, кæцытæ цæрынц дунейы алы къуымты, фембæлд уадзынæн Нары хъæуы ирон литературæйы бындурæвæрæг Хетæгкаты Къостайы хæдзар-музей æвзæрст кæй æрцыд, уый символикондзинад банысан кæнгæйæ.

«Абоны фембæлд уагъд цæуы Ирыстоны центры, цыран иу кæнынц нæ Райгуырæн бæстæйы хуссар æмæ цæгат хæйттæ. Хетæгкаты Леуаны фырт Къостайы æмдзæвгæтæ зонынц æппæт не ‘мфыдыбæстæйонтæ, кæмфæнды ма цæрой, уæддæр. Табу Хуыцауæн, мах райдыдтам нæ уидæгтæ агурын. Зонадон æгъдауæй бæлвырдгонд у уый, æмæ ирæттæ кæй сты хъайтарон аланты комкоммæ фæдонтæ, мах уымæй сæрыстыр стæм, фæлæ сæрыстырдзинад цъус у. Ахсджиаг у æмбæлон уæвын сæ номдзыддзинадæн», – загъта уый.

Хуссарирыстойнаг паддзахады сæргълæууæг ма банысан кодта, зæгъгæ, абоны бон Европæйы не ‘мфыдыбæстæйонтæ уадзынц бирæ мадзæлттæ ирæтты культурон æгъдауæй æрбаиу кæныны нысанæн æмæ æрсидт се ‘ппæтмæ дæр, цæмæй,  гæнæн уæвгæйæ, хайад исой ацы мадзæлтты.

«Ам махимæ ис Пухаты Радион, кæцы æрвылаз дæр æппæт Европæйы сорганизаци кæны Ирон культурæйы бонтæ. Фæнды мæ арфæйы ныхæстæ зæгъын Республикæ Цæгат Ирыстон-Аланийы Сæргълæууæг Битарты Вячеславæн ацы мадзæлттæ ауадзынæн кæй баххуыс кæны, уый тыххæй. Махæн æнæмæнгхъæуæг у, цæмæй кæрæдзиимæ ныхас кæнæм, æмæ афтæмæй ахуыр кæнæм мадæлон æвзаг. Уырны мæ, сымахмæ кæй сæвзæрдзысты æхсызгон тæлмæнтæ уæ Райгуырæн бæстæйы кæй уыдыстут, уымæй» – загъта Бибылты Анатоли.

Арфæйы ныхæстимæ раныхас кодта Республикæ Цæгат Ирыстон-Аланийы Сæргълæууæг Битарты Вячеслав дæр. Уый банысан кодта, зæгъгæ, проект «Аланский след» фыццаг аз уагъд нæ цæуы æмæ ахъаз кæны ирæтты кæрæдзиимæ базонгæ кæнынæн æмæ дарддæры ныхасæн, кæцытæ цæрынц дунейы алы бæстæты, афтæ ма уыдон проекты руаджы зонгæ кæнынц сæ мадæлон æвзаг æмæ культурæимæ.

«Абон Ирыстон ам цин кæны æппæт дунейы цæрæг аланты адæмы минæвæрттыл. Махæн æхсызгон у сымахæн арфæ ракæнын. Мæн уырны, æппæт æрæмбырдуæвджытæ семæ кæй аххæсдзысты хорз тæлмæнтæ сæ Райгуырæн бæстæйы тыххæй, æмæ мах та сараздзыстæм алцыдæр, цæмæй ацы мадзалы азæй азмæ фылдæр минæвæрттæ хайад исой æмæ сын уа цымыдисон», – загъта уый.

Сæ рады проекты хайадисджытæ дæр загътой бузныджы ныхæстæ проект «Аланский след»-ы организатортæн, кæцы фадат дæтты, цæмæй æнгомдæр кæнæм æмæ ма рох кæнæм нæ историон уидæгтæ. Францы ирон диаспорæйы номæй æрæмбырдуæвджытæн раарфæ кодта Хъесаты Хетæг.

«Стыр æхсызгон мын у уый, æмæ алы паддзахадтæй не ‘мфыдыбæстæйонтæ кæй зонынц сæ уидæгты, цымыдис кæнынц сæ культурæмæ. Аланты адæмы минæвæрттæ æрæмбырд сты ам, Хуссар æмæ Цæгат Ирыстоны арæныл, æмæ æз хъуыды кæнын, æввахс азты ацы мадзæлтты хайад кæй исдзысты ноджы фылдæр хайадисджытæ, кæцытæ ахъаз кæнынц ирон æвзаг æмæ культурæ сахуыр кæнынæн», – загъта уый.

Таджикистаны цæрæг ирæтты минæвар Коба Мельсы фырт банысан кодта, зæгъгæ, Райгуырæн бæстæйæн æддейæ чи цæры, уыцы ирæттæн тынг пайда у ахæм проекты хайад исын.

«Ацы проект махæн æххуыс кæны, цæмæй ма фесафæм нæ национ хиæмбарынад. Рай-гуырæн бæстæйæ дард цæргæйæ, мах исæм æцæгæлон менталитет, æмæ ацы проект та у уый тыххæй, цæмæй ма рох кæнæм нæхи æмæ зонæм кæцæй стæм», – загъта уый.

Мадзалы хайадисджыты раз раныхас кодта музейы директор Сохиты Ларисæ, кæцы банысан кодта ацы мадзалы ахсджиагдзинад.

«Сымах стут уникалондæр реликвиты ‘хсæн, кæцытæ баст сты стыр Хетæгкаты Къостайы номимæ. Абон ам сты ирæттæ, кæцытæ æрæмбырд сты дунейы алы къуымтæй. Йæ рæстæджы Хетæгкаты Къоста æнæхъуаджы куынæ загъта мыййаг: «Весь мир – мой храм, любовь – моя святыня, вселенная – Отечество мое», – загъта Сохиты Ларисæ.

Comments are closed, but trackbacks and pingbacks are open.