Бибылты Анатоли хайад райста Интеграцион комитет «Россия – Донбасс»-ы æмбырды

Интеграцион комитет арæзт æрцыд Донбасс æмæ Уæрæсейы ‘хсæн бирæнымæц хъæддых гуманитарон бастдзинæдты координаци сифтонг кæныны нысанæн.

Донецкы Адæмон Республикæйы сæргълæууæг Александр Захарченкойы ныхæстæм гæсгæ, «Донецкы Адæмон Республикæйæн ис иу нысан – райгуырæн бæстæмæ раздæхын, Интернационалон комитет та фадат ратдзæн уый тагъддæр саразынæн».

Хуссар Ирыстоны Президент Бибылты Анатоли банысан кодта, зæгъгæ, Хæлардзинад, æмгуысткæнынад æмæ кæрæдзийæн æххуысы тыххæй 11 майы къухтæ фыст цы Бадзырдыл æрцыдысты, уымæн дæр ис йæхи роль Хуссар Ирыстонимæ æмæ Уæрæсейы Федерациимæ Донецкы Адæмон Республикæйы интеграцийы.

«Уæрæсейы Федерацийы территоритимæ Донецкы Адæмон Республикæйы экономикон æмархайд арæзт æрцыд советон дуджы, бастдзинæдтæ хъахъхъæд æрцыдысты, æмæ уыцы бастдзинæдтæй Донбасс ма спайда кæна, уый йæ бон нæу. Бадзырдыл къух æрфыссыны фæстæ Хуссар Ирыстон дæр æххуыс кæндзæн Донецкы Адæмон Республикæйы экономикон рæзтæн», – загъта Бибылты Анатоли.

Уый куыд бамбарын кодта, афтæмæй Донецкы Адæмон Республикæ æмæ Республикæ Хуссар Ирыстон сараздзысты иумæйаг куыстуæттæ, базарадон хæдзæрттæ, цæмæй экономикон ахастытæ рахизой ног æмвæзадмæ.

Бибылты Анатоли ма банысан кодта, зæгъгæ, Бадзырд здæхт нæу æртыккаг бæстæты ныхмæ, фæлæ арæзт æрцыд, цæмæй фæхуыздæр кæна Хуссар Ирыстон æмæ Донецкы Адæмон Республикæйы адæмты фæрныгад.

Интеграцион комитеты сконды сты Уæрæсейы Федерацийы æхсæнадон æмæ политикон архайджытæ, УФ субъектты минæвæрттæ, Донецкы æмæ Луганскы Адæмон Республикæты минæвæрттæ.