Гергиты Валерийы номыл Дзæуджыхъæуы аивæдты колледжы байгом мысæн фæйнæг Уæрæсейы адæмон артисткæ Билаонты Долоресæн. Уый фæстаг 20 азы ацы колледжы амыдта вокал. Курдиатджын артисткæ цахæмфæнды фæлгондз дæр арæзта æнцонтæй, æмæ хуымæтæг царды та уыдис хæларзæрдæ Стыр Адæймаг. 11-æм ноябры адæмон артисткæйыл сæххæст уыдаид 85 азы. Ацы нысаниуæгджын боны цытæн байгом мысæн фæйнæг дæр.

Йæ ралæудтыты рæстæджы-иу сценæмæкæсджытæ ныхъус сты. Тыхджын æмæ зæрдæмæдзæугæ хъæлæсы-иу бауарзтой фыццаг секундтæй. Цы зарджытæ æххæст кодта, уыдон абоны онг дæр зарынц фæлтæрæй-фæлтæрмæ.

Билаонты Долорес музыкæ бауарзта хæрзчысылæй. 1964 азы каст фæ-цис Гнесинты номыл Мæскуыйы музыкалон-педагогон институты вокалон хайад, уыцы уагдоны ахуыр кодта Советон Цæдисы адæмон артист Иосиф Кобзонимæ. Хæлар уыдысты æнæхъæн царды дæргъы. Уыцы аз ссис Цæгат Ирыстоны музыкалон-драмон театры артисткæ. Долоресы диссаджы сопрано цалдæр хатты зæлыд Большой театры историон сценæйæ. Йæ репертуары уыдысты дунеон классикæйы сæйраг партитæ: оперæ «Демон»-ы Тамарæ, «Бал-маскарад»-ы Амелия, «Пиковая дама»-йы Графиня, Чио-чио-сан, Тоска, Аида æмæ бирæ æндæртæ. Æнахуыр хъæлæсы хицауæн дунеон сценæмæ фæндаг гом уыд, фæлæ йæ алыхатт дæр æрæздæхын кæдæм фæндыд, уыцы иунæг бынат уыд йæ райгуырæн Ирыстон. Долорес-иу алы хатт дæр сыгъдæг зæрдæйæ цин кодта коллегæты æнтыстытыл сæрыстыр уыд йæ ахуыргæнинæгтæй.

Билаонты Долорес дунеон æмæ ирон музыкалон культурæйы ныууагъта ирд фæд. Йæ уникалон хъæлæс абон дæр разæнгард кæны æвзонг зарæггæнджыты.

Мысæн фæйнæджы автор у Долоресы фырт, РЦИ-Аланийы сгуыхт нывгæнæг, Уæрæсейы нывгæнджыты цæдисы уæнг Хайты Ибрагим.

«Мæ мад-иу дзырдта, зæгъгæ, зæххмæ цы адæймаг фæзыны, уый хъуамæ цыдæр пайда хæсса. Уый йæ зонындзинæдтæ амыдта æвзонг фæлтæрæн æмæ уымæй сæрыстыр уыд. Уыдис ын бирæ ахуыргæнинæгтæ, кæцытæ æнтыстджынæй кусынц канд Уæрæсейы нæ, фæлæ ма фæсарæнты сценæтыл дæр. Уæлдай фылдæр йæ курдиат раргом ирон оперæтæ „Азау“, „Оллана“, „Къоста“, „Ханты цагъд“ æмæ æндæрты».

Зарæггæнæджы цардæмбал уыд зынгæ скульптор Хайты Владимир. Билаонты Долорес цардæй ахицæн 2009 азы уалдзæджы. Ныгæд æрцыд Дзæуджыхъæуы Кады аллеяйы.

Comments are closed, but trackbacks and pingbacks are open.