Информацион агентад «Спутник»-мæ хуынд æрцыд милицийы фæндагон змæлды æдасдзинады управленийы сæргълæууæг Джиоты Алан, кæцы æрдзырдта фæндагон æдасдзинады проблемæтыл æмæ ма сдзуапп кодта журналистты фарстатыл дæр.
Нæ горæты цæрджытæ иууыл тынгдæр фæтыхсынц бирæнымæц автомашинæтæй. Горæты уынгтæ сты уынгæг æмæ дзы райсомæй, кæнæ та исты массон мадзæлтты рæстæджы азмæлæн нал вæййы. Зындзинæдтæ февзарынц канд шофыртæ нæ, фæлæ ма фистæг бæлццæттæ дæр. Джиоты Алан куыд æмбарын кæны, афтæмæй 2010-2011 азты Госавтоинспекци фæндон бахастой, цæмæй горæты сæйраг азилæнты саразой зæххы бынты ахизæнтæ.
«2009-2010 азты мах анализ сарæзтам, автомашинæтæ цахæм темптæй фылдæр кæнынц нæ республикæйы, уымæн, æмæ æрцыдыстæм ахæм хатдзæгмæ – цалдæр азы фæстæ уынгты азмæлæн нал уыдзæнис. Нæ домæнтæм нын йæ хъус ничи æрдардта. Уæд нырма афтæ бирæ автотранспорт нæ уыд горæты, проблемæ ирдæй бæрæг нæ уыд æмæ уæды къухдариуæгады зæрдæмæ нæ фæцыд нæ хъуыды. Ныр нæ республикæйы регистрацигонд автомашинæты нымæц фæхæццæ кæны 30 минмæ æмæ тыхсæм. Ис ма афтæ саразæн, цæмæй скъолаты ахуыры рæстæг æрдæг сахаты бæрц фæраздæр кæной. Кæннод æппæт куыстуæттæ дæр райсомæй 9 сахатыл райдайынц кусын æмæ ма ахуыргæнæн уагдæттæ дæр. Уымæ гæсгæ райсомæй сæйраг уынгтæ байдзаг вæййынц автотранспортæй», – банысан кодта Гоасвтоинспекцийы сæргълæууæг.
Цалдæр скъолайы размæ ма æвæрд æрцыдысты сæрмагонд светофортæ, уыдоны ма хонынц «бæлццоны» светофортæ дæр. Фæндаджы иннæ фарсмæ дæ куы фæнда ахизын, уæд хъуамæ кнопкæйыл бахæцай æмæ автомашинæтæ æрлæудзысты. Фæлæ скъоладзаутæм цинау каст æмæ-иу дзы хъазыдысты. Стæй райсомæй уыйбæрц фистæг бæлццæттæ вæййы скъолаты раз æмæ алчидæр уыцы светофорæй куы пайда кæна, уæд автомашинæтæ иуран лæугæйæ баззайдзысты. Уымæ гæсгæ алы райсом дæр фæндагон инспектортæ фæлæууынц скъолаты раз æмæ хъахъхъæнынц фæтк æмæ æдасдзинад. Стæй ма хорз уаид æмæ скъолаты куы бакæниккой сæрмагонд уроктæ фæндагон змæлды фæткойтæ бацамоныны тыххæй, цæмæй ахуырдзаутæ ма тыхсой æмæ тæссаг ма уа автомашинæйы бын бахауынæй.
Автомашинæтæн горæты бауромыны бынат кæй нæй, уый дæр стыр зындзинæдтæ æвзарын кæны цæрджытæн дæр æмæ инспектортæн дæр. Ӕрвылбон дæр бæрндзинадмæ æркæнынц шофырты, фæивар сæ кæнынц, фæлæ проблемæ уымæй скъуыддзаг нæ цæуы. Уымæн дæр ис иу бæрæг аххосаг. 2009-2010 азты горæт ногæй арæзт куы цыд, уæд машинæты фæндæгтæ бауынгæг кодтой æмæ газонтæ та фæуæрæхдæр кодтой. Ææуый дæр нæ горæты уынгты фылдæр хай уæрæх нæ уыдысты æмæ уавæр ноджы февзæрдæр. Цæрджытæ хæраймаг не сты – дæ хисæрмагонд хæдзары раз дын дæ машинæ бауромыны бынат куы нæ уа, уæд истытæ кæндзæнис. Журналистты ма цымыдис кодта, ома æндæр горæтты ис сæрмагонд бынæттæ, кæдæм фæласынц фæткхалджыты автомашинæты. Джиоты Аланы ныхæстæм гæсгæ Цхинвалы нæй ахæм фæзуæттæ арæзт æмæ ввахс рæстæджы сæ пъланы нæй иваргонд машинæйы эвакуаци кæнын.
Национ банчы раз кусгæ бон вæййы бирæ автотранспорт, æдæрсгæ дзы аскъæрæн нæ вæййы. Госавтоинспекцийы сæргълæууæджы хъуыдымæ гæсгæ фæндон рахæссын хъæуы, цæмæй ацы уынгыл скъæрыны бар уа æрмæстдæр иуырдæм, æмæ уæд æндыгъддзинад бæрæг фæкъаддæр уыдзæнис.
Сæрды аппаратон-программон комплекс «Ӕдас горæт» кæй скуыста, уый фæахъаз ис фæткхалæн цаутæ фæкъаддæр кæнынæн. Фæлæ нæм уæддæр нозтджын шофыртæ æгæр бирæ вæййы. Ӕдæппæт ацы аз ивар æрцыдысты 194 нозтджын шофыры. Уымæй уæлдай ма фæндæгтыл дæр фæмардысты æхсæз адæймаджы.
Хорз ма уаид, фæндæгтыл цы сæрмагонд нысæнттæ ис, ома, урс хæххытæ, уыдон рæстмæ куы зыниккой. Уæд «Ӕдас горæт»-ы аппараттæ фиксаци кæниккой æндæр фæткхалæн цаутæ дæр æмæ иумийагæй бандавид фæндагон æдасдзинадыл. Джиоты Алан æрсидт шофыртæм, цæмæй кæрæдзийæ æфсæрмы кæной, уой цырддзаст æмæ ма халой фæндагон фæткойтæ. Фистæг бæлцæттæ дæр арæх вæййынц аххосджын авариты æмæ уыдонмæ дæр сиды, цæмæй, фыццаджыдæр, хъуыды кæной се нæниздзинадыл æмæ сæхи хизой фыдбылызтæй.
ДЖИОТЫ Алыксандр
Comments are closed, but trackbacks and pingbacks are open.