Хуссар Ирыстоны Хицауады сæрдар Джуссойты Константин ауагъта 2022 азæн Хуссар Ирыстоны социалон-экономикон рæзтæн ахъазгæнæг Инвестицион программæйы цыдыл контроль кæныны фæдыл, штабы радон æмбырд.

2023-2025 азтæн Инвестпрограммæ аразыны фарстыты фæдыл Уæрæсейы Федерациимæ æмархайды æмæ арæзтцæуæг объекты хъуыддæгты уавæры тыххæй Хицауады сæргълæууæгæн информаци радта арæзтад, архитектурæ æмæ цæрæнуатон-коммуналон хæдзарады министр Зæгъойты Эдуард.

Уый банысан кодта, зæгъгæ, фидæны Инвестпрограммæйы фæдыл фарстатæ æмæ ныры Инвестпрограммæйы реализацийы фарстатæ скъуыддзаг цæуынц, æмæ дзы бæрæг зындзинæдтæ нæй.

Министрады сæргълæууæг фехъусын кодта, йæ тæмæны кæй ис Ерцъо-Синагуры фæндагарæзтад, афтæ ма ивд цæуынц газуадзæны хызæгтæ Цхинвалы арæзтцæуæг уынгты æмæ уый фадат ратдзæн афоныл сæ хæрзарæзт кæнынæн.

Æмбырды ма ныхас цыдис цæрæнуатон-коммуналон хæдзарады лæггæдты тыххæй, сæрмагондæй бахардзгонд электроэнергийы тыххæй фиддонтæ куыд æмбырд цæуынц, уый тыххæй. Куыд банысанчындæуыд, афтæмæй электроифтонгады системæйы биноныг æрцæудзысты нымайæн прибортæ æмæ уый фадат ратдзæн электроэнерги æнæсанкционæй хардз кæныныл контроль кæнынæн.

Æмбырдæн хатдзæгтæ аразгæйæ, Джуссойты Константин банысан кодта, зæгъгæ, 2022 азы Инвестпрограммæйæн рахицæнгонд фæрæзтæ хъуамæ хардз æрцæуой æххæст гуырахстæй æмæ арæзтадон процессы æппæт хайадисджытæм æрсидт, цæмæй кусой хъаруджынæй.

 

 

НЫХАС АУНЕУЫ ХЪÆУЫ ТОВАРОН-ÆХСЫРЫ ФЕРМÆ СКУСЫН КÆНЫНЫЛ, ÆНДÆР ФАРСТЫТЫЛ

РХИ-йы Хицауады Сæрдар Джуссойты Константин ауагъта кусæгон æмбырд, цыран æркастысты хъæууонхæдзарады къабазы зæххæй пайда кæныны æмæ Знауыры районы Аунеуы хъæуы товарон-æхсыры фермæ сæндидзын кæныны тыххæй.

Æмбырды куысты хайад райстой: Хицауады Сæрдары хæдивæг, экономикон рæзты министр Тадтаты Дзамболат, хъæууон хæдзарады министр Мæргъиты Алан, юстицийы министр Гаглойты Олег, паддзахадон исад æмæ зæххы фæдыл ахастыты комитеты сæрдар Пæррæстаты Сергей, хицауады Аппараты къухдариуæггæнæг Джуссойты Алан æмæ районты администрациты сæргълæуджытæ.

Джуссойты Константин йæ хъуыды загъта, цæмæй бакуыстæуа хъæууон-хæдзарадон зæххытæй пайда кæныны эффективондзинад фæбæрзонддæр кæныны æмæ Аунеуы хъæуы æхсыры фермæйы реабилитацийы фарстытыл. Банысангонд фермæйы хъомысад фаг у, цæмæй æххæст кæна æхсыр æмæ æхсыры продукцийæ республикæйы домæнтæ.

“Хæлцадон æдасдзинад сифтонг кæнын у Хицауады ахсджиаг хæс. Хуссар Ирыстонæн ис хорз потенциал хъæууон хæдзарады къабазы, фæлæ цæмæй уырдæм инвестицитæ æрбакондæуа, уый тыххæй хъæуы арендон ахастытæ æрбæстон кæнын,” – загъта Хицауады Сæрдар. Уый æнæмæнгхъæуæг у, Аунеуы æхсыры фермæйы арæзтады фæуын æмæ йæ эксплуатацимæ раттынимæ баст фарстатимæ.

Джуссойты Константины ныхæстæм гæсгæ республикæйы æхсыры кондад саразын хорз разæнгардгæнæн фæрæз суыдзæн фермертæн æмæ стыр ахъаз фæуыдзæн сæудæджерадон комплексы рæзтæн иумиагæй сисгæйæ.

Хицауады Сæрдар профилон ведомствотæн бахæс кодта, цæмæй ревизи ауадзой хъæууонхæдзарадон нысаниуæджы паддзахадон зæххытæй нысанмæздæхтæй спайда кæныны тыххæй æмæ информаци бавдисой Хицауадмæ, афтæ ма бакуыстæуа æхсыры фермæ сæндидзын кæныны дарддæры къахдзæфтыл.

Зæрдыл лæууын кæнæм, Аунеуы товарон-æхсыры фермæйы арæзтад кæй райдыдта 2011 азы, фæлæ кæронмæ нæ фæцис, финанскæнынад кæй нал уыдис, уый тыххæй. Проектмæ гæсгæ фермæйæн йæ бон у суткæйы дæргъы 10 мин литры æхсыр уадзын. Ам ис къæппы, æхсырысæртæ, къæдор цыхт æмæ æндæр продукци уадзыны фадат.

РХИ-йы Хицауады пресс-службæ

 

Comments are closed, but trackbacks and pingbacks are open.