РХИ-йы Президент Тыбылты Леониды сæргълæудæй уыдис Хицауады радон рабадт.

Боны фæткмæ хаст фарстатыл цалынмæ уынаффæ кæнынмæ нæ æрæвнæлдтой, уæдмæ паддзахады сæргълæууæг мæсæллæйы ныхæстæ загъта Цхинвал-Ленингоры трассæйы фæндагон-транспортон цауы фæстиуæгæн трагикон æгъдауæй чи фæмардысты, уыцы уæрæсейаг æфсæддон службæгæнджыты, хиуæттæ æмæ хæстæджытæн. Иу минут æмырæй алæугæйæ сын ссардтой сæ рухс нæмттæ. Президент Мидхъуыддæгты министр Лæууойты Æхсарæн бахæс кодта, цæмæй паддзахадон автоинспекцийы управленийы службæ æмæ Автомобилон фæндæгты арæзтад æмæ эксплуатацийы фæдыл комитеты уæнгтимæ басгарой, авари кæм æрцыд, фæндаджы уыцы хай æмæ сбæрæг кæной, дзуапп дæдты фæндагыл цæуыны æдасдзинады фæткойтæн æви нæ, цæмæй дзы ахæм трагикон цаутæ макуыуал æрцæуа.

Рабадты финансты министр Хæбæлаты Азæ Хицауады уæнгты размæ сфидар кæнынмæ рахаста «2016 азы фыццаг кварталы Республикæ Хуссар Ирыстоны Паддзахады бюджеты сæххæсты тыххæй» РХИ-йы Закъоны проект.

Йæ ныхæстæм гæсгæ ацы азы фыццаг кварталы бюджеты æфтиæгтæ уыдысты 1 миллиард 178 милуан 959 мин сомы, хæрдзтæ та сты 1 милиард 279 милуан 248 мин сомы. Афтæмæй дефицит у 100 милуан 288 мин сомы.

Хицауады уæнгтæ сфидар кодтой Закъоны проекты. Тыбылты Леонид карзæй бафæдзæхста, цæмæй æндæр æмæ æндæр нысæнттæн Республикæйы бюджетæй рахицæнгонд алы сомæй дæр пайда цæуа йæ нысаниуæгмæ гæсгæ. Хицауады Сæрдар Хъуылымбегты Доменти та хъусдард аздæхта бюджеты мидæггагон резервтæй хуыздæр пайда кæныны хыгъдæй баххæст кæныны фæдыл куыст фæтыхджындæр кæныны æнæмæнг-хъæуындзинадмæ.

Финансты министр ма æрдзырдта «Республикæ Хуссар Ирыстоны социалон-эко-номикон рæзтæн ахъазгæнæг Инвестицион программæмæ хаст объекттæ æмæ мадзæлтты финанс кæныны фæткы тыххæй» РХИ-йы Хицауады 2014 азы 7 февралы Уынаффæмæ ивындзинæдтæ бахæссыны тыххæй. Уый куыд банысан кодта, афтæмæй ивындзинæдтæ бахæссыны æнæмæнгхъæуындзинад сæвзæрыд уымæн æмæ банысангонд пункттæ æмæ «Бюджетон арæзтады æмæ бюджетон процессы бындурты тыххæй «РХИ-йы за-къоны статъяты æхсæн ис ныхмæдзыдтæ.

Дарддæр рабадты хайадисджыты размæ хаст æрцыд «Æфсæддон службæйы чи сты, уыдоны æмæ сæ бинонты пенсион ифтонгады тыххæй» Республикæ Хуссар Ирыстоны Закъонмæ ивындзинæдтæ æмæ баххæсткæнинæгтæ бахæссыны тыххæй» РХИ-йы закъоны проект. Фарсты фæдыл раныхас кодта Хъахъхъæнынады министрады Генералон штабы хистæр инæлар-майор Цъæритты Тамерлан æмæ банысан кодта, зæгъгæ, Закъоны проектмæ ивындзинæдтæ бахæссын нысан кæны, æфсæддон службæйы чи сты, уыдоны æмæ сæ бинонты пенсион ифтонгады ног фæтк æмæ здæхт у ацы закъоны барадон нормæтæ хуыздæр кæнынмæ.

Хицауады уæнгтæм сфидар кæнынмæ бавдыст æрцыдысты дыууæ закъоны проекты, кæцытæ бæстон кæнынц амали-уæггæнджытæ æмæ юридикон цæсгæмттыл фиддонтæ æвæрыны фæтк. Закъоны проектты бавдыста Фиддонтæ æмæ æхцайы æмбырдты фæдыл комитеты сæрдар Къацты Вадим.

Фыццаг закъоны проект «Республикæ Хуссар Ирыстоны Фиддонты кодексы дыккаг хай «Физикон цæсгæмтты æфтиæг-тæй фиддонтæ»-йы 23 сæрмæ ивындзинæдтæ бахæссыны тыххæй» хауы, Республикæ Хуссар Ирыстоны территорийыл фæллойадон архайд чи æххæст кæнынц, уыцы фæсарæйнаг æмбæстæгтæм. Къацты Вадим куыд бамбарын кодта, афтæмæй ацы категорийы адæймæгтæ бюджетмæ нæ фидынц фиддонтæ. Ныр та сын нысан цæуы авансæй æрвыл-мæйон фиддонон бафыстытæ иу мин сомы бæрц.

Иннæ Закъоны проект «Республикæ Хуссар Ирыстоны Фиддонон кодексы 26-æм сæр «Къахгæ хъæздыгдзинæдтæй фиддон»-ы дыккаг хаймæ ивындзинæдтæ бахæссыны тыххæй»-ы нысан цæуы къахгæ хъæздыгдзинæдты фæдыл сфидаргонд фиддонон фæрæзтæ бакæнын къахгæ хъæздыгдзинæдтæ исыны тыххæй.

Комитеты сæрдар куыд банысан кодта, афтæмæй хомыс æмæ къахт æрмæджыты бæрц цас уа, уымæ гæсгæ бæлвырд цæудзæн фиддонон бафыст 48 мин сомæй 500 мин соммæ афæдзы дæргъы. Йæ ныхæстæм гæсгæ абоны бонмæ махмæ ис зæххы хъæздыгдзинæдтæй 13 пайдагæнæджы, кæцытæ регулярон æгъдауæй æххæст кæнынц сæ архайд рахицæнгонд фадгуыты.

Хицауады уæнгтæ æмхъæлæсæй райстой ацы Закъоны проекты. Хъуылымбегты Доментийы хъуыдымæ гæсгæ уый суыдзæн, пайдайы къахæггæгтæ исыныл чи кусынц, уыцы организациты куыст æрбæстон кæныны фæдыл мадзæлттæй сæ иу. Паддзахады сæргълæууæг дæр йе ‘нæразыдзинад равдыста зæххы хъæздыгдзинæдтæй чи пайда кæнынц, уыдоныл эффективон контроль кæй нæ цæуы, уый фæдыл. Ацы фирмæтæ республикæйы æрдзон хъæздыгдзинæдтæй пайда кæнгæйæ, сæхицæн кусынц дæсгай ми-луан сомтæ, бюджетмæ та фидынц цыдæр къапеччытæ. Президент карзæй загъта, фаг кæй нæу закъæтты проекттæ исын, æмбæлон организациты кæй хъæ-уы активондæрæй кусын æмæ сæ хæстæ дырысæй æххæст кæнын.

Паддзахадон исад æмæ зæххы фæдыл ахастыты комитеты сæрдар Пæррæстаты Сергей рабадты хайадисджыты рæгъмæ рахаста Хицауады уынаффæ «Республикæ Хуссар Ирыстоны иуæй-иу паддзахадон унитарон куыстуæтты сликвидаци кæныны тыххæй». Уый куыд банысан кодта, афтæмæй ацы аз 11 марты Хицауады Сæрдары барамындмæ гæсгæ арæзт æрцыд æмхæццæ кусæгон къорд паддзахадон унитарон куыстуæтты хæдзарадон архайдæн анализ саразыны нысанæн. Йæ куысты фæстиуджытæм гæсгæ бæл-вырд æрцыдысты къорд паддзахадон унитарон куыстуаты, кæцытæ сæ сырæзтæй фæстæмæ не ‘рывнæлдтой сæ архайд æххæст кæнынмæ, ницы исад сæм ис æмæ уынаффæ райст æрцыд, цæмæй ликвидаци æрцæуой. Уыдоны номхыгъдмæ бахауд паддзахадон унитарон куыстуат «ЮгоОсетСтройИнвест», дæр, фæлæ ууыл æруынаффæ кæнгæйæ, пад-дзахады сæргълæууæг банысан кодта йæ ахсджиагдзинад, республикæйы кæй хъæуы йæхи арæзтадон организаци æмæ йæ кæй хъæуы скусын кæнын.

Рабадты фидар æрцыд республикæйы цæрджыты сæйрагдæр социалон демографион къордтæм гæсгæ иу адæймагмæ ракæнгæ фæцæрыны минимумы бæрц. Экономикон рæзты министр Зæгъойты Вильям куыд фехъусын кодта, афтæмæй фæцæрыны минималон бæрц астæуккаг нымадæй у 10 мин 140 сомы, уыцы нымæцы куыстхъом цæрджытæн — 10 мин 825 сомы, пенсиисджытæн — 8167 сомы æмæ фынддæс азы онг кары сывæллæттæн та — 10851 сомы.

Министр ма уынаффæ кæнынмæ рахаста æргъты (тарифты) паддзахадон бæс-тонкæнынады тыххæй фарст. Уый бавдыста паддзахадон бæстонкæнынадмæ чи хауынц, уыцы тарифты паддзахадон номхыгъды тыххæй уынаффæйы проект, кæцыйæн йæ нысан у Республикæйы цæрæнуатон-коммуналон хæдзарады оптимизацийы фæдыл мадзæлтты план реализаци кæнын, афтæ ма Æхсæнхицауадон къамисы 14-æм рабадты фидар чи æрцыд, уыцы тарифон бæстонкæнынады системæ ныббиноныг кæнын.

Министры ныхæстæм гæсгæ проект райсын фæахъаз уыдзæнис экономикæйы паддзахадон бæстонкæнынады эффективондзинад бæрзонддæр кæнынæн, аф-тæ ма фæлхасгæнджыты æмæ бæлвырд хуызы архайд æххæстгæнæг организациты интересты баланс къухты бафтын кæ-нынæн.

Рабадты хайадисджытæ ма сфидар кодтой РХИ-йы закъæтты ахæм проекттæ куыд «2015 азæн РХИ-йы Пенсион фонды бюджеты сæххæсты тыххæй», «РХИ-йы социалон-экономикон рæзтæн ахъазгæнæг Инвестицион программæйы фæлгæтты паддзахадон финанскæнынад кæмæн хъуамæ уа, уыцы Инвестицион проектты æвзарыны фæтк сфидар кæныны тыххæй РХИ-йы Хицауады 2015 азы 15 октябры уынаффæмæ ивындзинæдтæ æмæ баххæсткæнинæгтæ бахæссыны тыххæй».

Уымæй дарддæр ма Хицауады рабадты фидар æрцыдысты, æмбæлы æви нæ, уый бафидар кæныны фæдыл куыстытæ æххæстгæнæг фæлварæн лабораторитæ (центртæ) аккредитаци кæныны фæткойтæ; 2016 азæн РХИ-йы хъæд калын, уымæ зилын æмæ йæ санитарон æгъдауæй сыгъдæг кæныны фæдыл хъæдмæзилæн фонд дих кæныны план; РХИ-йы æргътæ (тарифтæ) бæстонкæныны фæдыл Æхсæнхицауадон къамисы тыххæй уагæвæрд; паддзахадон унитарон куыстуат Цхинвалы дзулфыцæн комбинатæн РХИ-йы паддзахадон бюджетæй субсидитæ радтыны фæтк; паддзахадон унитарон куыстуат «Электробастдзинады телекоммуникацион компани»-йæн 2016 азы РХИ-йы паддзахадон бюджетæй субсидитæ радтыны фæтк; Паддзахадон унитарон куыстуат «Автомобилон транспортон управлении — Хуссар Ирыстон»-æн 2016 азы паддзахадон бюджетæй субсидитæ радтыны фæтк.

Рабадты ма æркастæуыд æндæр уæлæмхас фарстытæм дæр.

Бестауты В.

Comments are closed, but trackbacks and pingbacks are open.