Бухъ цардæй — раууатмæ

Глобалон фыдракæнды фæстиуджытæ уæззау уыдзысты… фыццаджыдæр Европæйæн

26 сентябры Балтикæйы денджызы æрцыдис æппæтдунеон террористон акт — рæмыгъд æрцыдысты газы хæтæлтæ «Северный поток-1» æмæ «Северный поток-2». Диверсийы фæстиуæгæн цыппар хæтæлæй æнæхъæнæй баззадис æрмæст «Северный поток-2»-йæ иу хæтæл. Срæмыгъды рæстæджы хæтæлты уыд 800 милуан кубометры бæрц æрдзон газ. Специалисттæ куыд æмбарын кæнынц, афтæмæй террористтæ æнхъæл уыдысты, ома, хæтæлтæй цы газ рацæуа, уый дæр æнæмæнг срæмудздзæнис æмæ уæд катастрофæйы масштабтæ егъаудæр уыдаиккой. Фæлæ сæ фæндтæ кæронмæ нæ сæххæст сты.

Ныридæгæн уагъд цæуынц слестгæнæн мадзæлттæ, кæцыйы хайад исынц Швеци, Дани æмæ Германы службæтæ. Кæд æмæ ацы газы хæтæлтæ уыдысты Уæрæсейы, уæддæр уæрæсейаг специалистты æввахс нæ уадзынц слестгæнæн куыстытæм. Æгæрыстæмæй, ныридæгæн цы куыстытæ бакод-той, цы информаци сæм ис террористон акт саразыны фæс-тиуæгæн æмæ цахæм зиæнттæ баййæфтой газы хæтæлтæ, уый дæр æмбæхсынц. Фæлæ «Газпром»-ы къухдариуæгад бамбарын кодтой сæ хурныгуылæйнаг партнертæн, ома, æнæ Уæрæсейы хайадистæй иунæг иртасæн куыстæн дæр тых нæ уыдзæнис, цы рабæлвырд кæной, уый та банымайдзысты æнæрастыл æмæ гæдыдзинадыл.

Дунейы сæвзæргæ уавæрмæ куы æркæсæм, уæд ирдæй зыны, ацы теракт пайда кæмæн уыд — æрмæстдæр АИШ-æн. Фæлæ къухты æвдисæйнæгтæ нырма нæй æмæ афтæмæй искæй азымджын кæнын та раст нæу. Алчидæр æй æмбары, ахæм теракт саразын йæ бон æрмæстдæр хъомысджын паддзахадæн у.

Диссаг у, ацы теракты та алыгъуызон æнæсæр политиктæ аххосджын кæнын райдыдтой Уæрæсейы!!! Афтæмæй та куы ахъуыды кæнæм, уæд æнцон бамбарæн у — Уæрæсе йæ газотранспортон системæ куыд хъуамæ срæмудза, кæд æмæ йын бирæ пайда хæссы?

Америкæйаг адекватон политиктæ Уæрæсейы кæй аххосджын кæнынц ацы диверсийы, уый нымайынц «абсурдыл», Уæрæсейы кæй аххосджын кæнынц ацы диверсийы.

Теракт саразыны хæдразмæ Германы егъау горæтты цыдысты демонстрацитæ. Адæм домдтой, цæмæй бæстæйы къухдариуæгад байгом кодтаид «Северный поток-2»-йы хæтæлтæ. АИШ фæтарстысты, ома, нын нæ æрдзон газ зынаргъæй нал æлхæндзысты Европæйы, æмæ уайтагъд «проблемæ» аиуварс кодтой. Ам æрмæстдæр дзырд цæуы пайдайыл, Европæйы цæрджыты мæт ничи кæны. Ӕниу, Европæйы бæстæты ныры къухдариуæггæнджытæ сæхæдæг куы нæ хъуыды кæнынц сæ адæмыл, уæд сын æндæр исчи цы хæсджын у. Цыдæриддæр сарæзтой фæстаг цалдæр азы дæргъы европæйаг политиктæ, уыдон иууылдæр нысанмæздæхт уыдысты сæ адæмы ныхмæ, сæ цæрджыты фæрныгад фæкъаддæр кæнынмæ. Уыимæ ма хурныгуылæн паддзахадтæй цæуы агрессивон пропагандæ Уæрæсейы ныхмæ æмæ европæйаг цæрджытæн алы амæлттæй сæ хъуыдыйы вæрынц, ома, уæ зындзинæдтæ иууылдæр уырыссæгты аххосæй сты. Афтæмæй сын æнæбындурæй æнæуынон кæнынц Уæрæсейы, сайынц сæ æмæ сæ сæхицæн сарæзтой Уæрæсейы ныхмæ инструмент.

Фыццаг хатт нæу

Историмæ куы æркæсæм, уæд Дыккаг дунеон хæсты размæ АИШ тынг бирæ уæй кодта нефть, æрдзон газ, æвзалы æмæ ма æндæр товартæ Европæмæ. Уымæн æмæ уæды рæстæджы дæр Европæйы уыдис тынг бирæ заводтæ æмæ фабриктæ, уыд дзы бæрзондтехнологон куыстад æмæ уагътой тынг бирæ продукци. Ахæм размæцыд сæудæджерадæн та хъуыд бирæ энерги. Ӕмæ европæйаг адæмæн сæ бон уыд æлхæнын дæр — фæрæзджын уыдысты.

1930-æм азты АИШ-ы цы экономикон кризис уыдис, уымæй рахызтысты Европæйы фæрцы.

Абоны бонау та англосаксойнаг пропагандæ уæды рæстæджы дæр Европæйы бæстæты растын кодта æрыгон Советон Цæдисы ныхмæ, аскъуынын сын кодта сæ бастдзинæдтæ æмæ бар-æнæбары æлхæныны райдыдтой АИШ-ы æрдзон ресурстæ зынаргъдæрæй. Уымæй уæлдай ма Европæйæ хаст æрцыдысты бирæ заводтæ æмæ фабрикæтæ АИШ-ы территоримæ æмæ уый фæрцы сæ экономикæ йæ къахыл слæууыдис. Европæйы цæрджытæ та аззадысты гæвзыккæй, мæгуырдзинады къахыл ныллæууыдысты æмæ ахæм уавæрты адæмы, куыйтау, искæуыл сардауын æнцондæр вæй-йы. Уый фæстæ райдыдта Дыккаг дунеон хæст æмæ Европæйы бæстæтæ иууылдæр хайад райстой Уæрæсемæ æрбабырсты. Ам хъуыдыйаг нал у, чи сæ сразæнгард кодта Уæрæсемæ æрбабырсынмæ, уый сбæлвырд кæнын.

Дыккаг дунеон хæсты фæстæ Советон Цæдис контроль кæнын райдыдта æгас хурыскæсæн Европæ, æмæ англо-сакстæн фадат нал уыд ацы территоритыл сæ хъæстæ пропагандæ уадзынæн. Европæйы бæстæтæм Уæрæсейæ уагъд æрцыдысты нефты æмæ æрдзон газы хæтæлтæ, кæцыты аргъ уыд бирæ асламдæр, раздæрмæ абаргæйæ. Сындæггай, хурыскæсæйнаг европæйаг бæстæты сæндидзыдта бæрзондтехнологон сæудæджерад. Фæстæдæр Франц æмæ Германы Федеративон республикæтæ дæр рахызтысты уæрæсейаг æрдзон газмæ æмæ нефтмæ. Уæдæй фæстæмæ АИШ æмæ Стыр Британийы бæллиц уыдис, цæмæй Уæрæсейы Европæйæ асура, йæхимæ сын æрбайса сæ хъæздыгдзинæдтæ, æмæ сын ныры онг æнтысгæ дæр бирæ бакодта.

Раууаты къæсæрыл

Англосаксойнæгтæ кæд æмæ æнаккæгтæ сты, уæддæр зондджын сты, дæрдтыл хъуыды кæнынц. Европæйы бирæ бæстæтæ ис æмæ зын контроль кæнæн сты. Уымæ гæсгæ нырма æрымысыдысты НАТО, цæмæй сын сæ гарзджын тыхтæ æрлæмæгъ кæной, бæстæтæн сæхи бахъахъхъæнын сæ бон ма уа æмæ сын лæгъстиаг уой. Уый фæстæ та æрымысыдысты Евроцæдис — уый та нысанмæздæхт уыдис Европæйы бæстæты финанстæ æмæ хъæздыгдзинад контроль кæнынмæ. Куыд уынæм, афтæмæй сæ фæндтæ æххæст кæнынц — Европæйы бæстæтæн, комкоммæ зæгъæгæйæ, хæстхъом æфсад нал ис æмæ сын сæ фæллой та сæхимæ, æнæрлæугæйæ, ссивынц англосакстæ.

Европæйаг къамисы сæрдар Урсула фон дер Ляйены мæнгæй нæ хонынц «Европæйы америкаг президент». Цыдæриддæр уынаффæтæ рахаста, уыдон иууылдæр уыдысты европæйаг цæрджыты ныхмæ. Стæй ма европæйаг бæстæты фылдæр хайы сæргълæуджытæй æвæрд æрцыдысты ахæмтæ, кæцытæ политикæ æмæ экономикæйы фарстаты «дуртæй» хъауджы не сты. Æмæ уыцы хъуыддаг дæр барæй арæзт у — англосакстæн æнцондæр у сæ манипуляцитæ аразын. Зæгъæм, Германы канцлер Олаф Шольцы ныхæстæм куы байхъусай, уæд æй æдылы йедтæмæ ницы рахондзынæ, æмæ афтæмæй та у Европæйы иууыл размæцыддæр бæстæйы сæргълæууæг!

Европæйы бæрзондтехнологон промышленность зынаргъ æрдзон газæй нæ бакусдзæнис — йæ продукци конкурентон нал уыдзæнис. Уымæ гæсгæ, æввахс рæстæджы раууатмæ æрцæудзæнис сæ индустри æмæ дзы гæнæн кæмæн уа, уыдон сæ заводтæ æмæ фабрикæтæ ахæсдзысты, хуыздæр уавæртæ кæм ис, уырдæм. Ныридæгæн Германы цалдæр егъау корпорацийы фæндон рахастой, цæмæй сæ куыстад ахæссой АИШ-мæ. Заводты æмæ фабрикæты фæстæ ацæудзысты, кæй зæгъын æй хъæуы, сæ дæсны кусджытæ дæр. Европæйы цæрæг адæм та баззайдзысты æгуыстæй æмæ гæвзыккæй.

Æмæ уæдæ дызæрдыггаг нал у, чи пайда кæны уавæрæй æмæ ныры онг дæр фæлитой митæ чи кодта, уый. Фæлæ-ма ныр цы? — сæфты къахыл ныллæууыдысты, æмæ дзы фæстæмæ бирæ цæмæндæрты нал уыдзæнис раздахæн. Йæ хæдбардзинад чи фесафы, кæнæ йæ хорз цардыл чи баивы, ууыл алы хатт дæр афтæ æрцæуы.

Джиоты Алыксандр