Бюджетон къабазы хицæн категориты кусджытæн фæфылдæр сты сæ куыстмыздтæ

Уыдис  Республикæ Хуссар Ирыстоны Хицауады рабадт. Боны фæткы уыд иунæг фарст – бюджетон организациты кусджыты куыстмыздтæм уæлæмхас разæнгардгæнæн бафыстыты бæрцтæ сфидар кæнын. Уыдон фылдæр кæнынц Республикæ Хуссар Ирыстоны паддзахадон æмæ муниципалон уагдæтты кусджыты куыстмыздтæ Уæрæсейы Федерацийы фæрæзты хыгъдæй æмфинанскæнынады фæтк æмæ уавæрты тыххæй Республикæ Хуссар Ирыстоны æмæ Уæрæсейы Федерацийы ‘хсæн Сразыдзинады фæлгæтты.

Фарсты фæдыл раныхас кодта РХИ-йы финансты министр Хæбæлаты Азæ. Уый куыд загъта, афтæмæй Ахуырады къабазы скъола æмæ скъолайы агъоммæ ахуырадон уагдæтты педагогон кусджытæн сæ куыстмызд фылдæр кæны 10 проценты, иумиагахуырадон уагдæтты кусджытæн дæр 10 проценты, административон-хæдзарадон персоналæн та – 30 проценты.

Райдиан æмæ астæуккаг профессионалон ахуырады ахуырадон уагдæтты ахуыргæнджытæ æмæ кондадон ахуыры мастертæн – 10 проценты.

Сывæллæтты уæлæмхас ахуырады уагдæтты педагогон кусджытæн – 10 проценты.

Уæлдæр профессионалон ахуырады ахуырадон уагдæтты ахуыргæнджытæн  10 проценты, административон-хæдзарадон персоналæн – 30 проценты.

Уанеты Захары номыл зонад-иртасæн институты кусджытæн –  30 проценты.

Физикон культурæ æмæ спорты уагдæтты тренертæн-ахуыргæнджытæн – 10 проценты, административон-хæдзарадон персоналæн – 30 проценты.

Культурæйы уагдæтты кусджыты сæйраг персоналæн (медицинон æмæ педагогон кусджытæй дарддæр) – 20 проценты, административон-хæдзарадон персоналæн та – 30 проценты.

Хъæууон хæдзарады паддзахадон уагдæтты кусджытæн – 30 проценты.

Паддзахадон уагдон «Мелиораци» паддзахадон уагдон «Хуссар Ирыстоны паддзахадон æвæрд хъæды»-ы кусджытæй йæ куыстмызд 12 минæй фылдæр кæмæн у, уыдонæн 25 проценты æмæ 12 минæй къаддæр кæмæн у, уыдонæн та – 36 проценты.

Информаци æмæ мыхуыры паддзахадон комитеты дæлбаруæвæг уагдæтты кусджытæн – 30 проценты.

Фæлхасгæнджыты бартæ хъахъхъæныны æмæ адæймаджы фæрныгады къабазы хъусдарды фæдыл комитеты хицæн æмæ хицæн категориты кусджытæн; дохтыртæн – 100 проценты; астæуккаг медицинон персоналæн – 50 проценты; кæстæр медицинон персоналæн – 4 проценты.

Цхинвалы горæты администрацийы социалон кусджытæн – 12 проценты.

Бюджетон къабазы организацитæ æмæ уагдæтты дæлведомствойон артгæнæнты хъахъхъæнджытæ æмæ машинисттæ-оператортæн – 30 проценты.

Банысан кæнын хъæуы уый, æмæ куыстмыздтæ кæй фылдæр кæнынц 2018 азы 1 январæй æмæ ногæй нымад æрцæудзысты уыцы рæстæгæй.

Бестауты Валя