Æххуыс — нæ республикæйæн

 

Æрæджы Цæгат Ирыстоны Хицауадæн цы æмбырд уыд, уым ныхас цыд Цæгат Кавказы федералон зылды рæзты паддзахадон программæйы фæлгæтты нæ республикæ фæстаг рæстæг федералон бюджетæй цы æххуыс райста, ууыл. Уыцы æххуыс фылдæр кæй кæндзæн, ууыл зæрдæдаргæйæ, Уæрæсейы Президент Владимир Путины амынддзинæдтыл дзырдта нæ республикæйы Сæргълæууæг Битарты Вячеслав. Уый куыд банысан кодта, афтæмæй 2015 — 2016 азты уыцы программæйы фæлгæтты федералон бюджет нæ республикæйæн радих кодта 1,5 миллиард сомæй фылдæр. «Уый фæрцы нæ къухы бафтдзæн Цæгат Ирыстоны экономикон æмæ социалон фарстатæ лыг кæнын. Ныфс нæ ис, Президенты амынддзинæдтæ æххæст кæнгæйæ, УФ-йы Хицауад фыццаградон æргом нæ инвесицион проекттæм дæр кæй аздахдзæн, уымæй». — загъта республикæйы Сæргълæууæг.

Уый ма куыд банысан кодта, афтæмæй Цæгат Кавказы рæзты паддзахадон программæйы бындурыл нæ республикæйы арæзт цæуы Сывæллæтты клиникон рынчындоны инфекцион хайады ног бæстыхай, цалцæггонд цæуынц районты культурæты хæдзæрттæ, рынчындæттæ, фæндæгтæ, донуадзæн хæтæлтæ… Хæстæгдæр рæстæг сæйрагдæр æргом здæхт цæудзæн сæудæджерадон æмæ хъæууонхæдзарадон куыстады, транспортон — логистикон инфраструктурæйы рæзт æмæ иннæ ахсджиаг социалон — экономикон фарстатæм. Уыцы æууæл хынцгæйæ, Цæгат Кавказы хъуыддæгты фæдыл министрадмæ нæ республикæ балæвæрдта 22 проекты агропромышленнон комплексы, туризм æмæ æндæр къабæзты райрæзты нысанимæ.

Зындгонд куыд у, афтæмæй æрæджы УФ-йы Президент Владимир Путин федералон Хицауадæн бахæс кодта, цæмæй æркæса 2025-æм азы онг Цæгат Кавказы федералон зылды рæзты паддзахадон программæйы уагæвæрдтæ æххæст кæнынæн уæлæмхасæн фæрæзтæ радих кæныны фарстамæ.

Джусойты Н.

Comments are closed, but trackbacks and pingbacks are open.