Цæгат Ирыстоны

ХЪОЛАЙЫ ЦЪИТИ – ФЫДБОНЫ ЦЪИТИ…

Цæгат Ирыстоны цæрджытæ кæддæриддæр зыдтой, Хъæрмæдоны комы, хæхты фахсыл 4780 метры бæрзæндæн чи у, уыцы Джимарайы кæй æмбæхсы Хъолайы цъити-марæг. Уыцы цъити ауыгъдæй слæууы комы сæрмæ æмæ та цалдæр дæс азы иу хатт ратоны, йæ разæй ахæссы дидинкалгæ ком. Афтæ уыд 1902 азы дæр.

Фæстаг хатт 2002 азы Хъолайы цъити цы трагеди расайдта, уый хъæдгæмттæ нæма бадзæбæх сты. Ихлæсæн ахаста 125 адæймаджы цард. Уæдæй абонмæ йæм ахуыргæндтæ сæ цæст дарынц. Фæлæ куыд зæгъынц, афтæмæй та иуафон цъитийæн æнæ ратонгæ нæй.

Дзæуджыхъæуы геофизикон иртасæнты центры директор Владислав Заалишвили журналисттæн куыд фехъусын кодта, афтæмæй та цъити иуафон æнæмæнг ракæлдзæн: “Хъолайы цъити у къусы хуызæн æмæ сабыргай йедзаг кæны зæйты лæсæнтæй, дуртæ, хуыр æмæ алыхуызон чъизитæй. Цалынмæ байдзаг уа, уæдмæ дзы ницы тас у. Куыд тагъд байдзаг уыдзæн, уый та аразгæ у æрдзæй. Мах бæрæг кæнæм æмæ кæсæм, йæхи куыд дары уымæ. Йе скондмæ гæсгæ байдзаг уыдзæн 10 – 15 азмæ. Фæлæ бынтон бæлвырд рæстæг базонын тынг зын у. Æцæг, дæс азы æнхъæлмæ кæсын æмæ сабыр бадæн нæй. Æрдзыл æууæнк нæй, æдзух цъитимæ хъæуы цæст дарын”, – загъта ахуыргонд.

Специалист ма йæ ныхæстæм куыд бафтыдта, афтæмæй трагеди кæд æрцæудзæн, уый бæлвырддæр базоныны тыххæй хъæуы фæсарæйнаг зынаргъ техникæ. Уымæй баххуыс кæнынмæ та сæ зæрдæ дарынц республикæйы разамы-надыл.

АЛЛЕЯ  АИВДЗÆН ЙÆ ХУЫЗ

Дзæуджыхъæуы Намысы аллея канд рæсугъддæр æмæ цæрджыты уарзондæр бынæттæй иу нæу нæ горæты, фæлæ ма у, республикæйы зынгæ адæм се ‘нусон бынат кæм ссардтой, уыцы уаз бынат.

Уый нымайгæйæ аллея æрæджы бабæрæг кодта Дзæуджыхъæуы администрацийы разамонæг Æл-бегаты Барис иннæ бæрнон кусджытимæ. Рейды архайджытæ аллеяйы ссардтой бирæ аиппытæ: бирæ рæтты астæрд скалд, цыртытæй къæрттытæ рахауд, йæ санитарон уавæр нывыл нæ уыд. Æлбеджы фырт бадомдта æмбæлгæ специалисттæй канд уыцы згъуыдтæ аиуварс кæнын нæ, фæлæ аллея бындуронæй рацаразын. Уыимæ ма реконструкци скæндзысты ирон-мæхъæлон быцæуы хъæбатыртæ кæм ныгæд сты, уыцы аллея дæр.

Администрацийы разамонæг куыд банысан кодта, афтæмæй Намысы аллея у Ирыстоны цæсгом, нæ номдзыд адæмы æнусон бынат æмæ уый æдзæллагæй дарын у стыр худинаг.

Реконстукцийы куыстытæ хъуамæ фæуой Фыдыбæстæйы Стыр хæсты Уæлахизы бонмæ.

Нæ уацх.