“ИРЫ СТЫР НЫХАС”-ы – КАДРОН ИВДДЗИНÆДТÆ

 

Æрæджы дунеон змæлд “Иры Стыр Ныхас”-ы координацион советæн съезды фæстæ уыд йæ фыццаг æмбырд. Архайдтой дзы районты æмæ хъæуты Ныхасты сæрдартæ, советы уæнгтæ. Хуссар Ирыстоны делегацийы сконды уыдысты координацион советы уæнгтæ Хъазиты Мелитон, Тыбылты Леонид, Гæбæраты Юри, Плиты Гацыр, Дудайты Альберт æмæ иннæтæ, Хуссар хайы Ныхасы сæрдар Гаглойты Роберты сæргълæудæй.

Æмбырд амыдта “Стыр Ныхас”-ы сæрдар Кучиты Руслан. Уый радзырдта Ныхасы куысты дарддæры планты тыххæй, цавæр хæстæ лæууынц сæ разы, чи цы хъуамæ куса, æмбырды рæстæг цавæр фæтк хъæуы æххæст кæнын æмæ бирæ æндæртæ. “Нæ республикæйы ис 80 бæрц æхсæнадон организацитæ, кæд сæ куысты нысан иу у, уæд уыйбæрц цæмæн хъæуы? Мах дæр нæ куысты фæтк бындуронæй куынæ аивæм, уæд нæ фыдæбон дзæгъæлы у. Зонут æй, Ныхасы комитеттæн сæ фылдæр сæхгæдтам. Цы комитеттæ ма нæм ис, уыдон хъуамæ æххæст кæной иннæты хæстæ дæр. Махмæ æхца исынмæ ничи цæуы, нæй нæм мызд, фæлæ Ирыстон зынаргъ кæмæн у, уыдон æрбалæууæд мæ фарсмæ æмæ иумæ бакусæм. Æз уæм сидын зиумæ. Иунæгæй æз дæр ницы бакæндзынæн. Нæ куысты нæ сæйраг æргом аздахын хъæуы ирон адæмы, æрвадæлты æрбангом кæнынмæ», – загъта Кучийы фырт.

Уый фæстæ æрдзырдта кадрты ивддзинæдтыл. Хуссар Ирыстоны хайы Ныхасы сæрдарæй фæстæмæ баззад Гаглойты Роберт. Цæгат хайы Ныхасы сæрдарæн хъуамæ уа цыппар хæдивæджы, дыууæ – æдзух йæ фарсмæ. Уыдонæй иу у раздæры хæдивæг Хутиты Таймураз, иннæ хæдивæг – Бæдтиаты Гришæйы раивта экономикон зонæдты кандидат, æхсæнадон архайæг Зæгъойты Вячеслав.

Æртыккаг хæдивæг, Хæххон металлургион институты профессор Æлборты Иван баззад йæхи бынаты. Уый ма у Дунеон ахастдзинæдты комитеты сæрдар дæр.

Сæрдары цыппæрæм хæдивæг уыдзæн æхсæнадон архайæг Дзекойты Юри. Уый ма уыдзæн Æдасдзинад æмæ æнæниздзинад хъахъхъæнынады комитеты сæргълæууæг дæр.

Ирон æвзаг æмæ æгъдæутты комитеты Мырзаганты Махары раивта Моргуаты Эдислав; Сылгоймæгты комитеты сæргъы фæстæмæ баззад Махъоты Иринæ; Мыггæгтимæ куысты комитеты сæргъы æрлæууыд Æгкацаты Юри; Хистæрты комитеты сæргъ та – Томайты Шамил. Фæсивæды комитетæн сæрдар æвзæрст нæма æрцыд.

Кучиты Руслан куыд фехъусын кодта, афтæмæй ирон диаспорæтимæ куысты комитет æхгæд æрцыд. Уыцы куыст кæндзысты Стыр Ныхасы разамынд æмхуызонæй.

Ныхас ма цыд газет “Стыр Ныхас”-ы куыстыл (йæ редакторæй фæстæмæ фидаргонд æрцыд Бицъоты Барис). Хутиты Таймураз куыд банысан кодта, афтæмæй газет у организацийы цæсгом, йæ цард, йæ куыст æвдисæг æмæ йæ бахъахъхъæнын хъæуы. Уый фæсидт районты, хъæуты Ныхасты сæрдартæм, цæмæй бакусой газет рафыссыныл.

Æмбырды ма ныхас цыд бирæ æндæр ахсджиаг фарстатыл.

Нæ уацх.

Comments are closed, but trackbacks and pingbacks are open.