«ЦÆЙ  УТ, ЛÆППУТÆ»

Горæт Цхинвалы скъола-интернаты къухдариуæгад æмæ ахуыргæнджытæ радон хатт сæ хъомылгæнинæгтæн сарæзтой хъæлдзæг бæрæгбон. Фыдыбæстæ хъахъхъæнæджы боны цытæн скъолайы уагъд æрцыд музыкалон-аивадон конкурс «Цæй ут, лæппутæ», зæгъгæ. Алы командæ дæр уыд фондз ахуырдзауы скондæй. Конкурс сорганизаци кодтой скъола-интернаты организатор Харебаты Маринæ æмæ  раздзог Икъаты Миленæ. Мадзал ауадзынæн сын баххуыс кодтой драмон кружокы къухдариуæггæнæг Хъотайты Сæрмæт, хоры ахуыргæнæг Остъаты Олеся, хореографийы ахуыргæнæг Собаты Ларисæ, хореографтæ Гасситы Кристинæ æмæ Тасойты Азæмæт æмæ ахуырдзауты  хъомылгæнджытæ.

Бæрæгбонон мадзалы хайадисджыты архайдæн аргъ кодта сæрмагонд жюри: РХИ-йы Адæмон ахуыргæнæг Бестауты Азæ (жюрийы сæрдар), Сывæллоны барты фæдыл РХИ-йы Президенты æххæстбарджын Цхуырбаты Татьянæ, Æлборты Эдуард, Гуыбаты Дауыт æмæ Джиоты Марат.

Мадзалмæ æрбацыдысты скъолайы ахуыргæнджытæ сæ директор Тедеты Ро-ланды сæргълæудæй, ахуыргæнинæгтæ æмæ æрхонгæ уазджытæ.

Конкурс байгом кодта Харебаты Маринæ. Уый арфæ ракодта æрæмбырдуæвджытæн æмæ банысан кодта, зæгъгæ, ацы мадзал хъуамæ уагъд æрцыдаид Фыдыбæстæ хъахъхъæнæджы боны цытæн, фæлæ, бæрæг аххосæгтæм гæсгæ хаст æрцыд февралæй апрелы мæймæ. Загъта, зæгъгæ, цалдæр мæйы размæ та ацы залы уагъд æрцыд конкурс «Цæй ут, чызджытæ» æмæ уыдонмæ гæсгæ лæппуты дæр тынг бафæндыд сæ арæхстдзинад равдисын æмæ бацæттæ кодтой  хиирхæфсæн мадзал  цымыдисон æмæ хъæздыг программæимæ.

Мадзал дæр амыдта Харебаты Маринæ.

Командæтæ ерыс кодтой ахæм номинациты: 1. Визитон карточкæ. «Арфæйы конкурс», цыран хайад истой командæты уæнгтæ иууылдæр фондз адæймаджы скондæй (лæвæрд ын цыд 3 минуты). 2. «Капитанты конкурс». Командæты капитантæ фыссгæйæ дзуапп лæвæрдтой æфсæддон тематикæйы фарстытæн. 3. «Хæдзарон хæслæвæрд» – лæппутæ хъуамæ саразой сæ къухы цы æрмæджытæ уыд, уыдонæй истыгъуызон дзаума. 4. «Тыхон конкурс»: чи фылдæр хатты сиса гиритæ. Ацы конкурсы командæтæй хайад иста иу минæвар. 5. Конкурс-пароди: «Мæ уарзон хъайтар» (лæвæрд ын цыд 5 минуты). 6. Йæхи чи фылдæр хатты систаид. 7. «Инсценировкæгонд зарæг» (3 минуты). 8. Кулинарон конкурс – 10 минуты. 9. «Салдаты кафт». 10. Конкурс «Подиум» (хайад дзы иста иу хайадисæг, хи къухтæй хуыздæр уæлæдарæс бахуыйын).

Мадзаламонæг радгай сценæмæ хуыдта командæты, кæцытæ хуындысты «Дина-мит», «8-я рота», «Дружба» æмæ «ВДВ». Командæты хайадисджытæ иууылдæр тырныдтой сæ номыртæ хорз сæххæст кæнынмæ æмæ сын æнтысгæ дæр кодта. Фыццаг уал сценæмæ рахызтысты 10-æм къласы командæ «Динамит»-ы уæнгтæ æмæ уый фæстæ та – иннæтæ. Алы номинацийы фæс-тæ дæр командæтæн аргъ кодтой жюрийы уæнгтæ æмæ-иу фехъусын кодтой, чи цал баллы райста, уый тыххæй. Командæтæ архайдтой хорз, фæлæ уæддæр уæлдай цымыдисондæр рауад номинаци «Мæ уарзон хъайтар». Ам ахуырдзаутæ сæ ролтæ сæххæст кодтой раст цыма æцæг артисттæ уыдысты, уыйау. 10-æм къласы лæппутæ сценкæ равдыстой «Новые русские бабки»-йæ (уыдоны гæнæн ис схонæн скъола-интернаты «новые бабки»), 9-æм къласы командæ  –  «Кавказская пленница»-йæ, 8-æм къласы  командæ та – «Три мушкетера»-йæ æмæ 7-æм къласы лæппутæ та сценкæ равдыстой Алла Пугачевайы зарæг «Миллион алых роз»-ы зæлты бын. Сценкæтæ рауадысты тынг хорз æмæ сын сценæмæкæсджытæ кодтой тыхджын къухæмдзæгъд.

Банысан кæнын хъæуы уый дæр, æмæ мадзалы хайад кæй райстой скъола «Эрудит»-ы ахуырдзау чызджытæ. Уыдон конкурсы рæстæджы номырæй номыры ‘хсæн сæххæст кодтой цалдæр кафты. Куыд æрвылхатт, афтæ та ныр дæр ирон зарджытæ азарыд скъола-интернаты раздзог Икъаты Миленæ. Гуымсæгыл ацагътой конкурсы хайадисæг дыууæ ахуырдзауы. Инсценировкæгонд зарæджы конкурсы йæ номыр уæлдай хуыздæр сæххæст кодта 9-æм къласы командæйы уæнг Дзукъаты Сослан. Уый азарыд «Катюша». Ацы лæппуйы арæхстдзинадмæ кæсгæйæ, зæгъæн ис æмæ йæ куы  бафæнда, уæд кæй суыдзæн фидæны курдиатджын артист.

Мадзал аххæссыд æртæ сахаты бæрц, фæлæ залмæ æрбамбырдуæвджытæ хатгæ дæр нæ фæкодтой рæстæджы цыд сывæллæтты ирд курдиатмæ кæсгæйæ.  Уæлахиздзауты сбæрæг кæнын æнцон нæ уыд. Командæтæ кæд  иууылдæр тынг хорз цæттæ уыдысты, уæддæр хуыздæрты ‘хсæн вæййы ноджы хуыздæртæ. Конкурсы жюрийы уынаффæмæ гæсгæ 1-аг бынат лæвæрд æрцыд 7-æм къласы командæйæн, 2-аг бынат – 9-æм къласæн, 3-аг бынат – 10-æм къласæн æмæ 4-æм бынат та – 8-æм къласæн.

Жюрийы сæрдар Бестауты Азæ арфæйы ныхæстæ загъта конкурсы организатортæн æмæ хайадисджытæн, ахæм хорз мадзал кæй бацæттæ кодтой, уый тыххæй. Сывæллæттæн арфæйы ныхæстæ загъта Сывæллоны барты фæдыл Президенты æххæстбарджын Цхуырбаты Татьянæ дæр. Уый банысан кодта, зæгъгæ, скъола-интернаты ис тыхджын лæппутæ, стæй, зæгъ, тынг рæхсынц салаттæ аразынмæ дæр. Загъта сын сабыр арвы бын цæрыны фæндиæгтæ. Афтæ ма, сæ рады Цхуырбаты чызгæн бузныг загътой, йæ архайды фæрцы Згъубиры чи баулæфыд, скъола-интернаты уыцы ахуырдзаутæ, кæцытæн финансон фæрæзтæ рахицæн кодта Президент Бибылты Анатоли.

Банысан кæнын хъæуы уый дæр, æмæ цæмæй ахæм диссаджы мадзал-конкурс бацæттæ кæнай, уый тыххæй бахъæуы бирæ хъарутæ бахардз кæнын. Бирæ бакуыстой конкурсы организатортæ ацы мадзал ауадзыны тыххæй æмæ сын буныджы ныхæстæ зæгъын æмбæлы сæ æвæллайгæ куысты тыххæй.

Джиоты Екатерина