Хуссар Ирыстоны дзыллон информацийы фæрæзты минæвæрттæн радон мастер-кълас
9-æм ноябры проект SputnikPro-йы ахуыргæнæн программæйы фæлгæтты РИА Новостийы журналисттæ Антон Скрипунов æмæ Алексей Филипповский хуссарирыстойнаг журналисттæн æмæ ХИПУ-йы журналистикæйы факультеты студенттæн «Спутник-Хуссар Ирыстон»-ы пресс-центры ауагътой мастер-кълас.
Профессионалон журналист Антон Скрипунов куыд банысан кодта, уымæ гæсгæ цымыдисон информаци ныффыссын æмæ йæ адæттынæн ныртæккæйы дуджы ис стыр нысаниуæг. Журналист кæддæриддæр хъуамæ уа цырддзаст æмæ йæ алыварс цытæ цæуы, уыдæттæ зона. Уый, сæйраджыдæр, йæ кол-легæтæн презентаци кодта ахæм темæ, зæгъгæ, æппындæр цымыдисон цы темæ нæу, уымæй куыд ис æнтыстджын æрмæг саразын æмæ йæ хайгай райхæлдта. Бацамыдта, уацы сæргонд цы хуызæн хъуамæ уа æмæ куыд арæзт цæуы, уыцы сусæгдзинæдтæ. Дарддæр æрдзырдта лид (ома, æрмæджы бацæуæн) куыд фысгæ у, куыд ахизын хъæуы тексты мидисмæ, æмæ æндæр профессионалон сусæгдзинæдтыл.
«Кæд æмæ журналистæн темæ йæ зæрдæмæ нæ цæуы, уæд йæ уац дæр цымыдисон никуы вæййы. Уый рахатдзæн кæцыфæнды редактор дæр æмæ йæ адæм дæр æнæрахатгæ нæ фæуыдзысты. Уымæ гæсгæ авторы хъуамæ йæхи уырна, цы куыстыл ныллæууыд, уый йын цымыдисон кæй рауайдзæн. Журналисты куысты ацы хъуыддаг у сæйрагдæр», – банысан кодта фæлтæрд редактор.
Антон Скрипунов стыр нысаниуæг дæтты уацты сæртæн æмæ куыд банысан кодта, афтæмæй кæцыфæнды информаци, кæнæ уацæн дæр йе ‘нтысты 50 проценты баст у сæримæ. Ирд æмæ цымыдисон сæртæй автор «æрбасайы» бирæ адæмы æмæ уæд бар-æнæбары бакæсынц æрмæджы. Цæмæй журналисты информацийæн йæ сæр кæддæриддæр æнтыстджын рауайа, уый тыххæй фæлтæрд журналист бацамыдта, зæгъгæ, сæры ма хъуамæ уа 5-7 дзырдæй фылдæр. Арæхдæр пайда кæнын хъæуы активон мивдисджытæй нырыккон (кæддæр суинаг) афонты, ахсджиаг ма у, цæмæй тексты мидисæй дæр дард ма лæууа, æмæ æндæр цæуылдæр дзурæг ма уа. Даргъ сæр идеалон кæй никуы вæййы, уый дæр загъдгонд æрцыд. Иумæйагæй сæрты ахицæн кодта ахæм хуызтыл: информацион, цымыдисздахæг æмæ дискуссион. Профессионалон журналист ма нæ бафæдзæхста, цæмæй макуы пайда кæнæм хахуыртæ æмæ дæлдзиныггæнæг дзырдтæй конд сæртæй, науæд ныл информацикæсджытæ нал æууæнддзысты, зæгъгæ. Уый дæнцæгæн æрхаста лæгмары тыхтæй. «Цалынмæ лæгмарæн йæ азым тæрхонгæнæг сбæлвырд кæна, уæдмæ йын лæгмар рахоныны бар нæй. Уæлдайдæр та йæ уацы сæры лæгмарæй ныффыссын раст нæ уыдзæнис», – загъта Скрипунов. Уый ма нын цыбыртæй райхæлдта, цы у репортаж æмæ интервьюйæ цæмæй хицæн кæны, уый. Радта нын хæслæвæрд, цæмæй флористыл иумæйагæй сарæзтаиккам репортаж. Æппæт журналистты ныхæстæ æмæ хъуыдытæй репортаж рауад цымыдисон.
Антон Скрипуновы фæстæ ма журналисттæн цымыдисон лекци бакаст йæ коллегæ, æхсæнадæмон медиакъорд «Россия сегодня»-йы интернет-технологиты центры къухдариуæггæнæг Алексей Филипповский ахæм темæйыл: «Где и как люди читают медиа. Web, социальные сети, apps – доступно и ясно», зæгъгæ, цыран уый банысан кодта социалон хызæгты размæцыды хъуыддаг æмæ куыд кусынц, уыдæттæ. Ныртæккæ алкæцы социалон хызæг дæр архайы ууыл, цæмæй райтынг кæна йæ видеоконтент æмæ йæм фылдæр адæм кæсой. Уымæн æмæ кæцыфæнды адæймагæн дæр текст кæсыны бæсты, бирæ æнцондæр у видеоæрмæгмæ бакæсын. Ацы лекцийы руаджы сайтты журналистты кусджытæ базыдтой сæ куыстæн чи фæпайда уыдзæн, ахæм ногдзинæдтæ. Лекцийы специалист пайда кодта технологион æвзагæй ног терминологийæ æмæ сæ æмбарын кодта.
Мастер-къласы кæрон Антон Скрипунов æмæ Алексей Филипповскимæ сæ лекциты фæдыл журналисттæ æмæ студенттæ лæвæрдтой сæ фарстытæ, æмæ-иу сын райстой æмбарынгæнæн дзуаппытæ.
Махæн ацы фæлтæрд журналисттимæ фембæлд, сæ лекцитæм байхъусын уыд пайда, уæлдайдæр та стыр æххуыс уыдысты студенттæн, уымæн æмæ сæ ахуыр домы уæлæмхас зонындзинæдтæ райсын.
«Спутник Хуссар Ирыстон»-ы редакцийы кусджытæ нын куыд загътой, уымæ гæсгæ проект дарддæр йæ куыст кæндзæнис, цæмæй ахæм æнгæс мадзæлтты фæлгæтты бынæттон журналисттæн сæ зонындзинæдтæ лæвар кæной уæрæсейаг фæлтæрд специалисттæ.
ЦХУЫРБАТЫ Ларисæ
Comments are closed, but trackbacks and pingbacks are open.