Нæ зонын, кæмæн куыд, фæлæ æз иууыл цæстуарзондæр адæймагыл нымайын ахуыргæнæгы. Уый уарзы æмæ рæвдауы йæ хъомылгæнинæгты, йæ зулмæ бакаст дæр ын кæстæр хорзæн фæисы. Фæлæ уæддæр ахуыргæнæг иууыл тынгдæр фæтыхсы, цæмæй йæ ахуыргæнинаг зонындзинæдтæй фæхайджын уа, фæтыхсы, цæмæй царды раст фæндагæй ма фæиппæрд уа.

Ахуыргæнæг-хъомылгæнæджы дæсныйадыл йæхи нæ атигъ кодта Цхинвалы районы Сатихъары хъæуккаг Джыгкайты Хаджумар дæр æмæ дзæвгар азты кæны ацы арфæйаг куыст. Хаджумар цалдæр азы та кусы Цхинвалы аивæдты лицейы æмæ ирон фæндыры сусæгдзинæдтæ амоны, ахуыр кæнынмæ йæм чи фæцæуы, уыдонæн. Аив цæгъдын амонынæн дæр ис йæхи сусæгдзинæдтæ, иутæм чизоны æнцон кæсы фæндырыл сахуыр кæнын. Фæлæ нæ хъусдард лæмбынæг куы аздахæм, уæд фæхатдзыстæм, æрмæст нотæты фæрцы фæндыры амонæнтыл æнгуылдзтæ азгъорын фаг кæй нæу. Цæмæй уацмыс ирдæй рантыса фæндырдзæгъдæджы фæрцы, бахъара хъусæджы зæрдæмæ, уый тыххæй ма дзæвгар аивадон амæлттæ бахъæуы сæххæст кæнын. Уыдæттæ нырма скъоладзау нæ фæхаты, æрмæст сындæггай разынынц ахуыргæнæджы æдзухон амынддзинады фæрцы. Джыгкайы-фырт уыдæттæ зæрдыл дары æмæ алы райдайæг цæгъдæгæн дæр зæрдиагæй фæамоны уыдон. Лицейы ирон фæндыртæ ис æртæ æмæ кæстæртæ зæрдæбынæй фæцæттæ кæнынц, сæ ахуыргæнæг сын цы цæгъдтытæ фæамоны, уыдон. Кæй зæгъын æй хъæуы, ахуыргæнинæгтæй алчи уыцы дæсныйад нæ равзары, фæлæ сыл уæддæр сомбоны  царды хорзæрдæм кæй бандавдзæн, уый бæрæг у. Йæ ахуыргæнинæгтæй сæ иу – Уалыты Регинæ ахуыры рæстæджы уыд тынг зæрдæргъæвд æмæ ныртæккæ та ахуыр кæны Дзæуджыхъæуы Гергиты Валерийы номыл аивæдты ахуыргæнæндоны. Ацы ахуыры аз дæр æм ахуыр кæны 11 скъоладзауы, уыдон хсæн ис, сæ фæндырдзагъдæй адæмы йæхимæ чи æрхъусын кæны, ахæм æрыгон цæгъдджытæ Гæбæраты Ирбег, Тедеты Мария, Дзеранты Каринæ, Тедеты Мария, Цæбиты Марат. Хаджумар фæндырыл цæгъдыны сусæгдзинæдтæ æрмæст ам нæ амоны, фæлæ ма хæдзарон уавæрты дæр, æнæ мыздæй. Зæгъæм, йæ зонындзинæдтæ нæ бахæлæг кодта Якименко Владикæн, уый фæстæдæр хорз нысæнттыл каст фæци Æлборты Феликсы номыл Цхинвалы музыкалон ахуыргæнæндон. Ахуыр каст фæуыны фæстæ  фæндырдзæгъдæгæй кусы Цхинвалы районы кафты ансамбль «Амонд» æмæ Тъбеты хъæууон культурæйы. Уый æрмæст ацы кæстæры кой ракодтон, фæлæ æнæуи та тынг бирæ сты, йæ фæрцы фæндырæй цæгъдыныл чи фæхæст, уыдон.

Джыгкайы-фырт дарддæр дæр цæстуарзонæй архайы, цæмæй сомбонæн хъомыл кæна аккаг фæлтæр, нæ республикæйы фылдæр кæной фæндырдзæгъдджытæ æмæ сæ рæсугъд аивадæй рухс кæной сæ иубæстон æмбæстæгты зæрдæтæ.

                                                   ХУЫБИАТЫ Никъала

Comments are closed, but trackbacks and pingbacks are open.