Куыд зонæм, афтæмæй Уæлвæткон уавæртæ æмæ æвирхъау цаутæ аиуварс кæныны министрад æрвылаз дæр цалынмæ 1-æм сентябры сабитæ скъоламæ нæ бацæ-уынц, уæдмæ басгарынц скъолаты уавæр. Цæмæй раргом кæной зынгхуыссынгæнæн нормæтæ хъахъхъæд цæуынц æви нæ.
1-æм сентябры агъоммæ Ахуырады министрад фехъусын кодта, зæгъгæ, нæ республикæйы скъолаты ахуырадон уагдæтты фесты цалцæггæнæн куыстытæ, алы скъола дæр, цæттæ кæй у ног ахуыры азмæ.
О, фæлæ зынгсирвæзты сигнализацитæй ифтонг кæй не сты скъолатæ, уымæ уæлæнгай цæстæнгасæй цæмæн кæсæм?!
Уæлвæткон Уавæрты министрады специалисттæ куыд банысан кодтой, афтæмæй зынгсирвæзты ныхмæ æдасдзинады домæнтæ æмбæлон уагыл хъахъхъæд нæ цæуынц. Уымæн æмæ ацы хъуыддаг у зын саразæн, домы техникон ифтонгад. Алы скъолайы дæр хъуамæ уа монитортæ, кæцытæн иудзинад хъуамæ уа Уæлвæткон уавæрты министрадимæ. Фæлæ раздæр азтау ацы проблемæ скъуыддзаг нæма æрцыд, уымæн æмæ баст у финансон фæрæзтимæ. Ацы министрады специалист Цоциты Азæмæт куыд загъта, афтæмæй кæд скъолатæн сæ фылдæры зынг-сирвæзты сигнализацитæ æвæрд ис, уæд-дæр дзы доны хæтæлтæ кæй нæ кусынц рæстмæ, уымæ гæсгæ системæтæ хъæуы ранæуæг кæнын. Уымæн та, дам, финансон фæрæзтæ хъуамæ кæна ахуырады министрад. «Уæлвæткон уавæрты министрады специалисттæ ахуырадон уагдæттæ сгарынц афæдзы мидæг дыууæ хатты ахуыры азы райдианы æмæ ногазон бæрæгбонты размæ. Раргомгонд фæткхæлдтыты цауты фæдыл дирекцитæн инструкцимæ гæсгæ лæвæрд цæуы 1-1,5 азы, цæмæй уыцы цухдзинад аиуварс кæной. Кæд домæнтæ æххæст не ‘рцæуой, уæд министрадæн ис бар объект сæхгæнынæн, лицензи ма радтынæн», – загъта Цоциты Азæмæт.
Уымæ нæ кæсгæйæ алы скъолаты æмæ уагдæтты дæр хъуамæ æнæмæнг уа зынг-сирвæзты ныхмæ стендтæ. Уыдонæн нæ хъæуы сæрмагонд финансон хæрдзтæ æмæ уымæ гæсгæ сты алы скъолаты дæр кæд базæрондгонд æууæл у, уæддæр.
Уазæгты М.
Comments are closed, but trackbacks and pingbacks are open.