6-æм ноябры зындгонд паддзахадон архайӕг, Хуссар Ирыстоны хӕдбардзинады сæрыл тохгӕнӕг Хуыбылты Валерийыл сӕххӕст уыдаид 54 азы.

Хуыбылты Валери (Хубул) райгуырд Цхинвалы 1966 азы 6 ноябры. 1983 азы фӕцис Цхинвалы фарастӕм астӕуккаг скъола, уыцы аз бацыд Хуссар Ирыстоны паддзахадон педагогон институты физикон-математикон факультетмӕ. 1984 азы йӕм ӕрсидтысты Советон Ӕфсадмӕ. Ӕфсады фӕстӕ адарддӕр кодта йӕ ахуыр ӕмӕ йӕ фӕцис 1990 азы. 1991 азы йӕ равзӕрстой Хуссар Ирыстоны Фæскомцæдисы областон комитеты Фыццаг секретарӕй.

Гуырдзиаг агрессийы фыццаг бонтӕй фӕстӕмӕ Хуыбылты Валери уыд хӕстон архайдтыты активон хайадисӕг, кӕцыты рӕстӕджы равдыста хъӕбатырдзинад ӕмӕ сорганизаци кодта ныхмӕлӕуд знагӕн.

1992 азы Хуыбылты Валери хайад райста Гуырдзыстон ӕмӕ Хуссар Ирыстоны ‘хсӕн конфликт ӕрбиноныг кӕныны фӕдыл Сочийы бадзырдты церемонийы.

1993 азы йӕ къухдариуӕгады бын сарӕзтӕуыд Хуссар Ирыстоны Хъахъхъӕнынады министрад – Хуыбылты Валери уыд йæ фыццаг сӕргълӕууӕг 1996 азы онг. Афтӕ ма 1994 азы Хуыбылты Валерийы снысан кодтой республикӕйы хицауады сӕрдары хӕдивӕгӕй.

1994-1998 азты уыд фӕсконфликтон уавӕр ӕрбиноныг кӕныны фӕдыл Контролон Къамисы уӕнг.

Хуыбылты Валерийы амардтой Дзӕуджыхъӕуы нæхъæн Ирыстонæн уыди ныфс.

Касаты Роланд: «Цыдæриддæр арæзта, уый арæзта Ирыстонæн, йæ хуыздæр фидæны тыххæй. Куы-иу ныхас кодтам æндæр истæй тыххæй дæр, уæддæр-иу йæ хъуыдытæ Ирыстоныл уыдысты – куыд уыдзæн йæ сомбон, куыд цæрдзыстæм… Фæндæгтæ агуырдта йæ райгуырæн бæстæ сæндидзын кæныны тыххæй.

Йæхицæн нæ тæригъæд кодта, æмæ йын Хуыцау дæр стыр тыхтæ лæвæрдта, цыма йæ ацы зын рæстæджы сæрмагондæй Ирыстонæн æххуысæн сæвзæрста, уыйау.

Фæндыдис æй сабырдзинад, цæмæй фыдракæндтæ мауал уыдаид нæ зæххыл, цæмæй нæ фæсивæд раст фæндагыл ныллæуыдаид, цæмæй макæй мад фæрыстаид хæсты аххосæй… Уыйбæрц стыр уды хицау уыдис, æмæ, стыр проблемæтæ скъуыддзаггæнгæйæ, нæ рох кодта конкретон адæмы дæр.

Æз бирæ хæттыты федтон: лæппутæ-иу цардыл сæ къух куы ауагътой, уæд-иу  Вале сæ цуры ‘рбадт, æмæ-иу сæ йæ ныхæстæй, йæ уарзтæй царды ныфс бауагъта. Нæ Иры фæсивæд, нæ хистæртæ сомбон хъуамæ уыйбæрц бацархайой, цæмæй Валейæн цы хъуыдытæ, цы фæндтæ уыдис, уыдон дарддæр размæ цæуой, ма ныкъуылымпы уой. Ууыл архайдзысты йе ‘мбæлттæ дæр  æмæ йæ мæлæт кæй зæрдæ фæриссын кодта, æппæт уыдон дæр».

Бахъаты Гоча: «Адæм æй нырма æмбаргæ дæр нæ кæнынц, Ирыстоныл цы трагеди æрцыд. Тагъд рæстæджы уый разындзæн нæ цардыл, Вале немæ кæй нал ис. Куыд уыдис: адæмæн мызд нæй:  «Кæм дæ, Валера!», рухс нæй: «Кæм дæ, Валера!», Мæскуыйы исты хъуыддæгтæ,  уæддæр та – Валера… Мах йемæ уыдыстæм, æмæ йæ уыдтам, цæуыл куыста æмæ цæуыл тох кодта – æрмæстдæр Ирыстоны сомбоныл.

Æз никуы хъуыды кæнын, æмæ уый лæджы фæхъыг кодта, æмæ йæм стæй нæ бацыд æмæ дзы кæнæ хатыртæ нæ ракуырдта, кæнæ йын йæ хъуыддаг нæ сарæзта. Йæхи тыххæй уый никуы никæй бахъыгдардта. Гæнæн уыдис, æмæ хицауад кæнæ адæмы тыххæй искæй батыхсын кодтаид».

Бестауты Бала: «Хубул уыдис нæ ныфс. Чи йæ амардта? Цæмæн? Æз æй куыд зонын, афтæмæй йын знæгтæ нæ уыди. Знæгтæ йын куы уыдаид, искæмæй куы тарстаид, уæд нæ алыварс, кæй хъæуы æмæ кæй нæ хъæуы, уыдонæн иууылдæр хъахъхъæнджытæ ис, æмæ уый дæр, йæхицæн тæрсгæйæ, йемæ искæй кодтаид.

Цæй знæгтæ йын уыдис! Куы-иу æрцыди, уæд-иу æдзух адæмы проблемæтæ скъуыддзаг кодта, адæмæн лæггад кодта.

Хæсты рæстæджы-иу гæрах кæм фæцыдис, уырдæм-иу Валейæ раздæр ничи бахæццæ. Йе ‘мбæлттимæ иууылдæр тох кодта: ацæуæм æмæ уымæн баххуыс кæнæм. Нæхи хæсты аирвæзти, Абхазы уыди, Дзæуджыхъæуы мæхъæлы хæсты уыди.

Уым æй нæ амардтой, æмæ Ирыстоны зæххыл йæ туг ныккалд…

Ацы хабар куы ‘рцыдис, уæд мæхæдæг дæр Дзæуджыхъæуы уыдтæн. Куы йæ фехъуыстон, уæд машинæйыл абадтæн, æмæ сæ кæм фехстой, уырдæм бацыдтæн. Адæмы рафæрс-бафæрс кодтон, æмæ мын уыцы æнæмæтæй дзуапп лæвæрдтой: цавæрдæр чъребайаг лæппуйы, дам, амардтой…

Вале никуы хицæн кодта Хуссар æмæ Цæгат. Мæхъæл 1992 азы Ирыстонмæ куы ‘рбабырстой, уæд Вале фыццаг бонæй фæстаг бонмæ уыдис Дзæуджыхъæуы. Уыдонæн Хуыбылты Валери «чъребайаг лæппу» у, махыл та мæнæ туг ныууарыдис… Цы зæгъæн ис. Ахæм лæппутæ куы амæлы Ирыстонæн, уæд ирон лæппутæй бирæ чидæртæ хъуыдыты бахауынц: «Куыд цæрдзыстæм дарддæр, лæг ма кæуыл баууæнда, лæг ма цы сараза, Хубулы хуызæттæ куы нæ уал уа, уæд».

Нæ республикæйы Инвестицион программæмæ гæсгæ ногæй арæзт æрцыд Хуыбылты Валерийы номыл централон парк.

2016 азы хъахъхъӕнынады министр, инӕлар-лейтенант Гассеты Ибрагимы хъӕппӕрисӕй сарӕзтӕуыд Хуыбылты Валерийы номыл хорзӕх.

ДРИАТЫ Лейла

Comments are closed, but trackbacks and pingbacks are open.