Спортивон бæрæгбон та арæзт æрцыд спортивон комплекс «Олимп»-ы. Радон хатт та æвзонг спортсментæ ерыс кодтой ленк кæнынæй. Ацы хатт республикæйы чемпионат цыд комплексон ленк кæнынæй. Сæ тыхтæ дзы фæлвæрдтой 180 ахуырдзауы. Ерысты официалонæй байгом кæныны церемонийы æрæмбырдуæвджытæн раарфæ кодта РХИ-йы Президенты цур сабийы барты фæдыл æххæстбарджын Козаты Гульнара.

«Тынг æхсызгон мын у, ерысты афтæ бирæ сывæллæттæ хайад кæй исы, уый. Уыдон иууылдæр стыр æхсызгонимæ архайдтой чемпионаты. Бузныг мæ фæнды зæгъын йæ организатортæн», – банысан кодта Козаты Гульнара.

Залмæ ма æрбацыд РХИ-йы Фæсивæдон политикæ, спорт æмæ туризмы комитеты сæрдар Зассеты Сергей.

«Рацыд иу азмæ æввахс, уæрæсейаг специалист Евгения Терлеева Хуссар Ирыстоны кусын куыд райдыдта, уымæй. Уыцы рæстæджы арæзт æрцыд бирæ. Кæд дарддæр дæр спорты ацы хуыз размæ цæуа ахæм темптæй, уæд нæм æввахс рæстæджы фæзындзысты уæрæсейаг ерысты уæлахиздзаутæ», – загъта Зассеты Сергей.

Радон хатт та ленк кæнынæй ерыстæ цымыдисдзинад сывзæрын кодтой спортуарзджытæм. Ерысты рæстæджы, уыдон трибунæты цæугæ дæр нæ кодтой. Уымæ гæсгæ та  ерыстæ ацыдысты дыууæ этапæй, цæмæй спортсменты ныййарджытæн æмæ хиуæттæн фадат уыдаит трибунæтæм æрбацæуын æмæ æвзонг спортсменты архайдмæ бакæсынæн.

Банысан кæнын хъæуы уый, æмæ ныртæккæ ленк кæныны секциты кæй тренировкæ кæнынц 700 ахуырдзауæй фылдæр. Ерысты сæйраг тæрхонгæнг Евгения Терлеева куыд загъта, афтæмæй ацы спортивон сезоны ерыстæ ауагътой 5 хатты.

«Спортсментæ сæ бæрæггæнæнтæ хуыздæрæй хуыздæр кæнынц. Уымæ гæсгæ, фæнд кæнæм ног спортивон сезоны республикæйы гом чемпионат ауадзын. Уырдæм фæхондзыстæм уæрæсейаг регионты ко-мандæты дæр», – банысан кодта Евгения Терлеева.

Ерысты фæстиуджытæм гæсгæ йæ уæлахиздзаутæ систы Алиса Жаркова, Чиаты Михаил, Æлборты Аннæ, Дзæгъиаты Николай, Джиоты Катеринæ, Бестауты Бега, Тыджыты Дианæ, Быценты Арсен, Тедеты Моникæ, Къæбулты Инал, Тедеты Ирмæ æмæ Чысиаты Александр. Уыдон иууылдæр хорзæхджын æрцыдысты Кады грамотæтæй.

Хуриты Батрадз

Comments are closed, but trackbacks and pingbacks are open.