Ныр афæдзы дæргъы нæ республикæйы цæрджытæ æнхъæлмæ кæсынц, фыдгæнæгæн цавæр тæрхон рахæсдзысты, уымæ. Æмæ, æппынфæстаг, дæргъвæтин слесты фæстæ Алагиры тæрхондон Гагкайты Уырызмæгæн рахаста дыууæ азы ахæстоны фæбадыны тæрхон. Дардыл чи ай-хъуыст, уыцы трагеди цыбырæй уыд афтæ: Хъалæгаты Аланæ, иу æмæ ссæдзаздзыд цардбæллон чызг, ЦИПУ-йы хуыздæр студенткæ, курдиатджын фæндырдзæгъдæг, Гагкайты Уырызмæгмæ моймæ æрцыд æвддæс аздзыдæй. Фæлæ чызджы хъысмæт æнамонд рауад. Цыппар азы дæргъы йын йæ мой йæ туг нуæзта, дæлдзиныг æмæ йын фыдмитæ кодта. Нæ йыл ауæрста, иумæйаг сывæллон сын куы фæзынд, уæд дæр. Фæлæ чызг фæрæзта, никæмæн ницы дзырдта, æгæрыстæмæй йæ мадæн дæр. Гагкайты бинонтæ уыдтой, сæ чындз хъаймæты арты куыд судзы, уый, фæлæ сæ лæппуйæн йæ ных никуы бакъуырдтой. Æппынфæстаг, Аланæ ацыд йæ мадмæ йæ афæдз æмæ æрдæгдзыд чызгимæ, фæлæ йæ уым дæр йæ лæг уæгъд нæ уагъта, йæ алы къахдзæф дæр ын барста.

2016 азы 25 июны Хъалæгаты Аланæйæн уыд университет каст фæуыны тыххæй банкет Дзæуджыхъæуы. Уырдыгæй Алагирмæ куы аздæхт, уæд йæ размæ вагзалы бабадт йæ мой æмæ йæ адæмы раз фæнадта. Нал сфæрæзта уыцы худинаг сæрыстыр чызг, бафæллад йæ цардæй, ацыд уырдыгæй, æмæ уым хæстæг хъæды къохы йæ банкетмæ æлхæд къабайы ронæй йæхи æрцауыгъта.

Ацы хабар арвы нæрдау айхъуыст Ирыстоныл. Йæхи æмæ йæ гыццыл чызджы тæригъæдæй сæ цæссыг калдтой, чи  йæ нæ зыдта, уыдон дæр. Интернет æмæ газетты нал уыд æндæр кой. Растадысты фæсивæды парламент æмæ комитеттæ, сæ хуыздæр студенткæйы сæрыл барадхъахъхъæнæг органтæм хъаст барвыстой ЦИПУ-йы ирон филологийы фæкультеты коллектив æмæ студенттæ. Цы фыдмитæ æвзæрста йæ сæр, уыдон тыххæй æвдисæнтæй æрлæууыдысты бирæ адæм, уæлдайдæр та студенттæ.

Кæй зæгъын æй хъæуы, сæхи аххосджыныл нæ нымадтой Гагкайты бинонтæ дæр, ссардтой бирæ æвдисæнтæ. Фæлæ Алагиры тæрхондон Уæрæсейы Федерацийы Уголовон ко-дексы 110-æм статьямæ гæсгæ «Дове-дение до самоубийства путем угроз жестокого обращения и систематического унижения человеческого достоинства» -мæ гæсгæ рахаста йæ тæрхон. Афтæ кæй уыд, уый сбæлвырд кодтой бирæ æвдисæнты ныхæстæ, Алагиры вагзалы æвæрд видеокамерæ, стæй медицинон æмæ психологон экспертизæтæ. Ныр дыууæ азы ахæстоны бад-гæйæ, рæстæг уыдзæн Гагкайты Уырызмæгæн йæ фыдмитыл ахъуыды кæнынæн.

Кæд Аланæ йæ фыдбойнаджы цард нæ хъæр кодта, уæддæр ын йæ уавæр  бирæтæ зыдтой. Зыдтой, фæлæ алчидæр йæхи ныхъхъус кæны, æмæ трагеди куы æрцæуы, уæд тох кæныныл ныллæууæм. Гагкайты бинонтæ дæр æмæ Аланæйы зонгæтæ дæр йæ рæстæджы исты мадзæлттæ куы сарæзтаиккой, уæд гæнæн ис æмæ йæ æрыгон уд нæ бацарæфтыд уыдаид, йæ саби та сидзæрæй нæ баззадаид.

Йæ фыдæх калынæн та искæй цард милмæ чи сæвæры, уымæн уый æгæр фæлмæн тæрхон у. Æмæ кæд ахæмтæ рæсттæрхонæй уæлæнгай аирвæ-зынц, уæддæр сæ Хуыцауы тæрхон искæд баййафдзæн.

Нæ уацх.

Comments are closed, but trackbacks and pingbacks are open.