Уæрæсейы Хъахъхъæнынады министрады специалисттæ саргъ кодтой Хуссар Ирыстоны территорийыл радиацион, химикон æмæ биологон уавæрæн, фехъусын кодта президенты пресс-секретарь Босыкты Наталья.
«Мах иууылдæр лæмбынæгæй нæ хъус дарæм онкологион рынчынты статистикæмæ æмæ йæ зонæм, сæ нымæц азæй-азмæ кæй фылдæр кæны. Се ‘хсæн, хъыгагæн, ис сывæллæттæ дæр. Хæст йæ фæд ныууадзы. Афтæ ма катайдзинад æвзарын кæны Хуссар Ирыстонмæ æввахс биолабораторийы куыст. Уымæ гæсгæ, республикæйы территорийыл радиацион, химикон æмæ биологон уавæрæн саргъ кæныны нысанæн. Хуссар Ирыстоны æмæ Уæрæсейы Хъахъхъæнынады министрадты специалистты хайадистæй уагъд æрцыдысты мадзæлттæ», — загъта Босыкты чызг.
Йæ ныхæстæм гæсгæ, уавæрæн саргъ кæныны фæстæ рабæрæг, республикæйы радиацион фон у нормæйæ дзæвгар къаддæр — дæс хатты.
Уый у хорз бæрæггæнæн. Уымæй уæлдай ма специалисттæ систой доны æмæ зæххы пробæтæ. Уæрæсейы Хъахъхъæнынады министрады централон лабораторийы иртасæнтæм гæсгæ, бæрæггæнæнтæ нормæйы сты«, — банысан кодта пресс-секретарь.
Босыкты чызг ма банысан кодта, зæгъгæ, уавæрыл дарддæр контролæн республикæйы къухдариуæгад рахаста уынаффæ регулярон æгъдауæй банысангонд мадзæлттæ уадзын.
«Алфамблайы объекттæ иртасыны номенклатурæ уæрæхдæр кæндзæн», — загъта уый.
