Адӕймагмӕ йæ сабибонтæй фæстæмæ æввахс чи фæлæууы, уыдоны фыццӕгтӕй иу чиныг у. Ӕнӕхъуаджы йӕ нӕ хонынц, зонындзинӕдты суадон, зӕгъгӕ. Чиныджы фӕрцы ӕмбӕстӕгтӕн лӕггад кӕнын сӕ комкоммӕ ӕмӕ ахсджиаг хӕсыл чи нымайынц, ахӕм адӕймӕгтӕ нӕ республикӕйы дӕр дзӕвгар сты. Уыдоны нымӕцмӕ хауы Анахарсисы номыл республикон библиотекӕйы кӕсӕн залы сӕргълӕууӕг Тыбылты Азӕ дӕр. Уый ныр 44 азы кусы ӕмӕ фӕллой кӕны ацы культурӕйы уагдоны ӕмӕ ӕппӕт дæр аразы, цӕмӕй дзы чиныгкӕсджытӕ кӕддӕриддӕр здӕхой райгонд ӕмӕ цинзӕрдӕйӕ. Кӕй зӕгъын ӕй хъӕуы, раздӕры азтимӕ абаргӕйӕ, чиныгкӕсджыты нымӕц зынгӕ фӕкъаддӕр. Уымӕн та йӕ аххосæгтæй сæ иу у, информаци райсыны алыгъуызон нырыккон фӕрӕзтӕ кӕй фӕзындысты ӕмӕ ӕрбиноныг сты, уый. Фӕлӕ уӕддӕр библиотекӕтӕ ӕмӕ кӕсӕн залӕн сӕ ахадындзинад нӕ ныллӕг кӕны, цӕуынц сӕм, чиныгыл йӕ къух чи нӕ исы, сӕхи дзы чи хотыхджын кӕнынц, уыдон. Сты, сӕйраджыдӕр, студенттӕ ӕмæ  скъоладзаутӕ.

Кӕсӕн залы уавӕртӕ дзӕвгар фӕхуыздӕр сты, ис сӕм компьютертӕ 15, фæлæ нырма ӕбӕрӕг аххосӕгтӕм гӕсгӕ иу не сты, фæлæ сæ пайда кæнын куы райдайой, Тыбылты Азæйы ныхӕстӕм гӕсгӕ, уӕд интернетмӕ иу уаиккой, уый та фадат раттид алыгъуызон информаци исынӕн.

Абоны онг чингуыты фонд у 250 мины бæрц, сты ирон, уырыссаг ӕмӕ фӕсарӕйнаг ӕвзӕгтыл уагъд литературӕ. Фӕлӕ, зӕгъæн ис, нырыккон литературӕ сӕм бынтондӕр кӕй нӕй. Стеллажты чингуытӕ ӕфснайд сты ӕмбӕлон фӕткыл ӕмӕ кӕсӕгӕн ӕнцон вӕййы, цахӕм чиныг ӕй хъӕуы, уый бацагурынӕн. Сты дзы философи, математикӕ, физикӕ, ӕрдззонынад, географи, аивад, ӕвзагзонынад ӕмӕ ӕндӕр хайадтӕ. Раздӕры азты дзы уыд, сыгъзӕрин фонд кӕй хуыдтой, ахӕмтӕ, уыдонӕн адӕттӕн нӕ уыд ӕдтӕмӕ, фӕ-лӕ байсӕфтысты хӕсты азарӕй. Тыбылты чызг куыд зӕгъы, афтӕмӕй ногӕй кусынц чингуыты каталогтӕ ӕрбӕстон кӕныныл ӕмӕ сын уый сӕххӕст кӕнын дæр кӕронмӕ бантысдзӕн рӕхджы. Зӕгъын хъӕуы, чиныгкӕсджыты нымӕц афтӕ цъус дӕр кӕй нӕу – сты 570. Кӕсӕн залы кусджытӕ мадзæлттæ бацӕттӕ кӕнынц ӕндӕр ӕмӕ ӕндӕр бӕрӕгбонон ӕмӕ зӕрдылдарӕн цаутæм, ауадзынц чиныгкӕсджыты конференцитӕ, фембӕлдтытӕ ирон фысджытӕ, Стыр Фыдыбӕстӕйон хӕсты ветерантимӕ ӕмӕ ӕндӕр ахӕмтӕ. Уыдон ацӕуынц бӕрзонд ӕмвӕзадыл ӕмӕ сӕ райгондӕй баззайынц йӕ хайадисджытӕ.

Адӕймаг йӕ куыст куы уарза, ӕнувыд ӕмӕ йыл иузӕрдион куы вӕййы, бӕрндзинад куы фенкъары йӕхи ӕмӕ, кӕмӕн лӕггад кӕны, уыцы ӕмбӕстӕгты раз дӕр, уӕд ахӕмтӕн ӕрцӕуы ӕмбӕлон аргъ. Йӕ бирӕ лӕггӕдтӕ чиныгкӕс-джыты раз ӕмӕ уӕздан ахасты тыххӕй Тыбылты Азӕ ӕндӕр ӕмӕ æндӕр рӕстӕджыты фӕиста бирӕ арфӕ ӕмӕ бузныджы ныхӕстӕ, грамотӕтӕ, «Республикӕ Хуссар Ирыстоны 10 азы» юбилейон майданӕй, кад ӕмӕ радимӕ хӕссы нӕ республикӕйы культурӕйы сгуыхт кусӕджы кадджын ном. Тыбылон дӕргъвӕтин рӕстӕджы чиныджы фӕрцы цӕстуарзонӕй лӕггад кӕны йӕ иубӕстон адӕмӕн ӕмӕ йын нӕ цӕст уарзы, цӕмӕй ма уыцы лӕггады хай фӕкӕна дзӕвгар азты.

Хуыбиаты Никъала

Comments are closed, but trackbacks and pingbacks are open.