Фæстаг азты нæ чингуыты рауагъдадтæ арæхдæр рауадзынц нæ фысджыты, ахуыргæндты чингуытæ æмæ уымæй барухс кæнынц, æхсызгонæй кæй хъæуынц, уыдоны зæрдæтæ. Ныр дæр та æвдисæн уыдыстæм, Информаци æмæ мыхуыры паддзахадон комитеты пресс-центры презентаци кæмæн уыд, уыцы чиныджы рацыдæн.

Йæ автор у Республикæ Хуссар Ирыстоны сгуыхт журналист, историон зонæдты кандидат Хъуылымбегты Роберт æмæ хуыйны «Южная Осетия. От прошлого к настоящему». Чиныджы презентацимæ æрбацыдысты нæ республикæйы Президент Бибылты Анатоли, РХИ-йы фыццаг Президент Цыбырты Людвиг, Хуссар Ирыстоны Уæрæсейы Федерацийы минæварады уынаффæгæнæг Сергей Манько, РХИ-йы Парламенты Национ политикæ, культурæ, ахуырад, дин, зонад æмæ дзыллон информацийы фæрæзты комитеты сæрдар, РХИ-йы сгуыхт журналист Гæбæраты Юри, зонад-иртасæн институты директор Гаглойты Роберт, Хуссар Ирыстоны паддзахадон университеты ректор Тедеты Вадим, Цæгат Ирыстон-Аланийы адæмон фыссæг, Хетæгкаты Къостайы номыл паддзахадон премийы лауреат Дзасохты Музафер æмæ æндæртæ.

Презентаци бацæуæн ныхасæй байгом кодта информацион агентад «Рес»-ы сæйраг редактор Уазæгты Юри æмæ банысан кодта, зæгъгæ, чиныг уагъд æрцыд РХИ-йы Информаци æмæ мыхуыры комитеты рауагъдадон къамисы уынаффæмæ гæсгæ. Афтæ ма цыбыртæй æрдзырдта чиныджы нысаниуæгыл.

Презентацийы раныхас кодта Цыбырты Людвиг. Уый, фыццаджыдæр банысан кодта, зæгъгæ, Роберт уыдис йе студент æмæ уæд рахатыдис уымæн йæ курдиат æмæ ахуырмæ тырнындзинад. «Хъуылымбегты Роберт студентон азты дæр хицæн кодта, йæ ахуыры йын æнтыс-тытæ кæй уыдис æмæ уæлдай куыст кæй кодта йæхиуыл, уымæй. Зæгъын мæ фæнды уый, æмæ мæ ахуыргæнинæгтæй бирæтæ ахуыры бæрзæндтæм кæй схызтысты æмæ сын æнтыстытæ кæй ис сæ профессионалон архайды. Мæнæн уый у стыр æхсызгон æмæ сæ дæн сæрыстыр», – загъта Цыбырты Людвиг. Уый ма бафиппайдта, зæгъгæ, дызæрдыггаг нæу æмæ нын рæхджы, Хъуылымбегты Роберт йæхи базонын кæна, куыд историон зонæдты доктор, афтæ. Уыимæ иумæ ма Цыбырты Людвиг банысан кодта, зæгъгæ, йын уый тыххæй хъæуы аразын æппæт уавæртæ дæр, цæмæй дарддæр дæр зонадон куыст кæна.

Чиныг æмæ йæ авторы тыххæй йæ хъуыдытæ загъта нæ бæстæйы сæргълæууæг Бибылты Анатоли дæр. Уый банысан кодта, зæгъгæ, чиныг кæддæриддæр у авторæн йæхиуыл дзурæг. «Хъуылымбегты Роберт у, алыварсон кæй фæхонынц, ахæм гоймаг. Кæд æмæ автор йæхæдæг уа цымыдисон, уæд йæ куыстытæ дæр уыдзысты дзыхы акæнинаг. Ро-берт æрмæст ацы диссаджы уацты æм-бырдгæнæг нæу, фæлæ ма нæ бахъæл-дзæг кæны æмæ нæ фæхудын кæны йæ карикатурæты руаджы, кæцытыл райдыдта кусын 1975 азæй фæстæмæ. Чиныг цымыдисон кæй у, уый бæрæг у йæ уацты мидисмæ гæсгæ. Ам бакæсæн ис историон, политикон æмæ культурон царды тыххæй дæр. Чиныг у ахсджиаг, зæрдиагæй йыл бакуыста автор. Кæд æз нæма чиныг кæронмæ нæ бакастæн, уæддæр ыл мæ цæст ахастон æмæ дзы цы уацтæ ис, уыдон мæ зæрдыл сæмбæлдысты. Мæнмæ гæсгæ дзы алкæцы чиныгкæсæг дæр ссардзæнис йæхион. Мах æрбалæудзыстæм йæ фарсмæ, цæмæйдæриддæр йæхи бацæттæ кæна æмæ бахъахъхъæна докторон диссертаци дæр. Уымæн æмæ абон нæ паддзахадæн уый у ахсджиаг фарст æмæ йæ хъæуы æнæмæнгæй дæр саразын», – загъта Бибылты Анатоли. Паддзахады сæргълæууæг ма чиныджы авторæн загъта стыр бузныг æмæ  арфæйы ныхæстæ. Йæ цæст ын бауарзта йе сфæлдыстадон куысты ног æнтыстытæ æмæ фидар æнæниздзинад.

Дзасохты Музафер дæр йæ раныхасы банысан кодта, зæгъгæ, чиныджы ирдæй зыны авторы æгæрон уарзт йæ райгуырæн бæстæмæ æмæ адæммæ. «Фæстаг рæстæджыты мæ зæрдæ æппæты тынгдæр цы чингуытæй барухс, уыдон уыдысты Хъуылымбегты Роберты дыууæ чиныджы æмæ Гæбæраты Юрийы чиныг дæр. Уыдон сæ дыууæ дæр æрыгæттæ кæй сты æмæ ма дарддæр дæр бирæ кæй сараздзысты, уый мын тынг æхсызгон у. Афтæ фæзæгъынц, зæгъгæ, газет иу бон цæры, журнал – мæй æмæ чиныг та бирæ цæры. Æмæ бирæ чи фæцæрдзæн, уыцы чингуытæй сты адон дæр. Ацы чиныджы ис Хуссар Ирыстоны истори. Автор ахæм диссæгтæ ссардта æмæ дзы иу уацы фæрсты дæр адæймаг нæ ахиздзæнис. Чиныг ахæм æвзагæй фыст у æмæ бауарзын кæндзысты Ирыстоны иннæ адæмтæн, стæй ирон адæмы. Уый та у сæйраг, уымæн æмæ автор ахæм уарзондзинадæй фыссы нæ райгуырæн бæстæйы  нæ адæмы тыххæй æмæ нæ æнæбауарзгæ нæ фæуыдзысты», – загъта Дзасохты Музафер.

Чиныджы тыххæй ма йæ хъуыдытæ загъта йæ редактор – газет «Республика»-йы сæйраг редактор Хъоцыты Андрей. Уый цыбыртæй загъта, автор стыр куыст кæй бакодта чиныджы рацыдыл æмæ йе ‘рмæджытæ раздæр мыхуырæй кæй цыдысты газет «Республика»-йы фæрстыл, уый тыххæй. «Мæн ныфс ис æмæ ацы чиныг кæй уыдзæнис дæ историон миниатюрæты фыццаг хай æмæ сæ ноджыдæр кæй адарддæр кæндзынæ. Уымæн æмæ сты тынг цымыдисон æмæ тынг хъæуæг æрмæг. Уый не студенттæн у стыр лæвар, уыдон дзы æрмæстдæр фæуыдзысты бузныг», – банысан кодта Хъоцыты Андрей.

Гæбæраты Юрийы хъуыдымæ гæсгæ ацы чиныг адæймагмæ æвзæрын кæны цымыдисдзинад æмæ йæ кæцыфæнды чиныгкæсæг дæр бакæсдзæнис иу æрбадтæн. «Æз тынг фæцин кодтон чиныджы рацыдыл. Фыццаджыдæр, дзы банысан кæндзынæн йе взаджы хуымæтæгдзинад. Автор ацы уацмысты адæймаджы размæ ахæм хуызы хæссы æмæ æнцон рахатæн у, зæрдæйæ фыст кæй цыдысты, уый. Хъуылымбегты Роберт егъау куыст бакодта æмæ уымæй балæггад кодта йæ фыдыбæстæйæн. Хуыцау ын радта стыр курдиат æмæ йын мæ зæрдæ зæгъы, цæмæй йын ноджы фылдæр бантыса», – банысан кодта Гæбæрайы фырт.

Презентацийы ма йæ раныхасы университеты ректор Тедеты Вадим банысан кодта, зæгъгæ, Робертмæ бахатыдысты, цæмæй университеты историон факультеты хицæн историон дисциплинæйæ лекцитæ кæса студенттæн.

Зонад-иртасæн институты директор Гаглойты Роберт дæр банысан кодта авторы стыр курдиат æмæ чиныджы ахадындзинад. Институты директор бахатыд Робертмæ, цæмæй рæхджы къухдариуæгад кæна институты этнографион хайадæн.

Презентацийы ма чиныджы ахадындзинад æмæ хъæуæг кæй у, уый тыххæй сæ хъуыдытæ загътой мадзалы иннæ хайадисджытæ дæр, уыдон æхсæн Сергей Манько, историк Гаглойты Иринæ æмæ æндæртæ.

Презентацийы бирæ арфæйы ныхæстæ райста чиныджы автор æмæ уый дæр йæ дзуаппон арфæтæ æмæ бузныджы ныхæстимæ мадзалы кæрон алкæмæн дæр балæвар кодта зæрдылдарынæн йæ къухæй фыстытимæ ног чингуытæй. Уый ма банысан кодта, зæгъгæ, чиныгæн хуыздæр тæрхонгæнджытæ сты чиныгкæсджытæ æмæ сын æй сæ размæ хæссы зæрдæрайæ.

Цхуырбаты Ларисæ

Comments are closed, but trackbacks and pingbacks are open.