Ивгъуыд къуырийы кæрон Хуссар Ирыстонмæ фыццаг хатт фæуазæг Дагъыстаны паддзахадон академион ансамбль «Лезгинка» æмæ Хетæгкаты Къостайы номыл  паддзахадон драмон театры сценæйыл равдыстой цымыдисон концерт.

Легендарон хореографион коллектив Цхинвалмæ гастролон балцы æрцыдис проект «Обменные культурные мероприятия России и Южной Осетии»-йы программæйы фæлгæтты. Ансамбль «Лезгинка» у Республикæ Дагъыстаны раззагондæр сфæлдыстадон коллективтæй сæ иу æмæ парахат кæны бæстæйы культурæ æмæ традицитæ. Иудзырдæй, мах, ирон адæм «Симд»-æй куыд сæрыстыр æмæ буц стæм, афтæ ацы бæстæйы кадджын ном хæссы уæлдæрбанысангонд ансамбль дæр. «Лезгинка» йæ сырæзтæй абоны онг цы сфæлдыстадон фæндæгтыл цæуы, уыдон алыгъуызон уыдысты, кæддæриддæр сын ис æнтыстытæ, адæм сын уарзынц се сфæлдыстад.

Ансамбль театры сценæйыл цы бирæ кæфтытæ равдыста, уыдон æхсæн уыдысты: «Ритмы Кавказа», «Выше гор», «Парная лезгинка», «Приветственная лезгинка», «Рутульский танец» æмæ æндæртæ. сæ концертон программæ арæхстджын æмæ аивæй кæй сæххæст кодтой, уымæ гæсгæ сыл хуссарирыстойнаг сценæмæкæсджытæ æмбæлдысты тыхджын къухæмдзæгъдимæ.

Республикæ Хуссар Ирыстоны Культурæйы министр Зæгъойты Рада йæ раныхасы банысан кодта тынг æхсызгон ын кæй у Ирыстоны зæххыл кæй æмбæлынц æмæ кæй аргъ кæнынц ансамбль «Лезгинка»-йæн, уый. «Абон мах аргъ кодтам Кавказы цæрæг адæмтæй сæ иуы культурæйæн. Цы диссаджы аивад федтам, уый нæ алкæй зæрдæмæ дæр тынг фæцыдис, уымæн æмæ коллектив равдыстой сæ профессионализм æмæ арæхстдзинад. Ныртæккæ Уæрæсейы Федераци уæззау уавæры ис, алчидæр æй зоны, фæлæ адæйма-гæн æхсызгон вæййы куы æнкъары æмæ куы уыны культурæ удæгас кæй у æмæ дарддæр кæй цæуы адæмы рæгъмæ, уый. Банысан кæнын хъæуы уый дæр æмæ ахæм мадзæлттæ æнгомдæр кæй кæнынц æндæр æмæ æндæр адæмты, афтæ ма се хсæн хæлардзинад кæй райтынг вæййы», – загъта Зæгъойты Рада. Министр ма йæ раныхасы арфæ ракодта уазджытæн се сфæлдыстадон куысты  æмæ сын йæ цæст бауарзта фидар æнæниздзинад. Уый фæстæ ансамблы коллективæн нæ бæстæйы сæргълæууæг Гаглойты Аланы номæй радта паддзахадон хорзæхтæ.

Дагъыстайнаг уазджытæн ма сæ цымыдисон концертон программæйы тыххæй арфæ ракодтой нæ республикæйы æндæр бæрнон кусджытæ дæр.

КОЦТЫ Ларисæ

 

Comments are closed, but trackbacks and pingbacks are open.