Цхинвалы дзулфыцæн комбинатæн бындурæвæрд æрцыд 4-æм ноябры 1956 азы. Эксплуатацимæ та лæвæрд æрцыд 1961 азы, райдыдта дзы кусын дыууæ цехы – дзулфыцæн æмæ адджинæгтæ кæнæн цехтæ. 1970-æм азы онг комбинат куыста дурæвзалыйыл. Уыцы аз æм бауагъд æрцыд æрдзон газ.

Дзулфыцæн комбинаты сæргъ Цхуырбаты Вадим куы слæууыд, уæдæй фæстæмæ фылдæрæй-фылдæр кæнынц сæ рауадзгæ продукцийы хуызтæ. Сæйраг цехæй дарддæр ма заводы кусы кондитерон цех, цыран кæнынц алыгъуызон адджинæгтæ æмæ дзулы бирæ хуызтæ.

Куыд раздæр, афтæ ныр дæр хуссарирыстойнаг дзулфыцæн комбинаты дзул хицæн кæны йæ гъæдæй. Заводы къухдариуæгад фæнд кæны ноджыдæр йæ кондад рауæрæхдæр кæнын æмæ зæронд ифтонггæрзтæ раивын.

Афæдзы дæргъы комбинаты фых цæуы 4 251 358 дзулы – 2 550 тоннæйы (69 милуан сомы рагъ). Абон комбинат дзулæй ифтонг кæны  æрмæст горæты цæрджыты нæ, фæлæ ма республикæйы районты æмæ хъæуты дæр. Дзул ласынæн ын ис 12 автомашинæйы æмæ афоныл хæццæ кæнынц фæлхасгæнджытæм продукци. Ам регулярон æгъдауæй саразынц санитарон бонтæ, коллектив, æппынæдзух кусы сæ профессионалон дæсныйад фæбæрзонддæр кæныныл æмæ, ног кусæгон бынæттæ саразыныл.

Бирæ сты йæ лæггæдтæ дзулфыцæн комбинатæн адæмы раз. Уыдон 2008 азы августы хæсты рæстæджы дæр не ‘рурæдтой сæ куыст æмæ цæрджыты уæззау бонты дæр ифтонг кодтой дзулæй. Уыдон уымæй равдыстой стыр хъайтардзинад æмæ сæ хорзы кой абон дæр кæнынц республикæйы.

Абон дзулфыцæн комбинаты цы ногдзинæдтæ ис æмæ сæ куысты дарддæр цы ивддзинæдтæ цæудзæн, уыдон тыххæй нын цыбыртæй радзырдта дзулфыцæн комбинаты директор Цхуырбаты Вадим.

Уый, сæйраджыдæр, банысан кодта, куыд иннæ азты, афтæ та ныр дæр цин кæнынц сæ комбинаты гуырæн боныл:

– Æз арфæ ракодтон мæ коллективæн. Нæ куысты ветерантæн, заводы кусджытæн радтам æхцайы премитæ. Бирæты дзы схорзæхджын кодтам грамотæтæй, арфæйы фыстæджытæй. Нæхи дæр нын æрхъуыды кодтой æмæ нын бæрæгбоны цытæн арфæтæ ракодтой. Абон махмæ кусы 170 адæймагæй фылдæр. Ныртæккæ нæ комбинаты цæуы зымæгмæ цæттæгæнæн куыстытæ. Фæсауæрц кæнæм ссад, цæхх æмæ ма нæ цыдæриддæр фæхъæуы комбинаты куыстæн, æппæт уыцы æрмæджытæ, уыдон нымæцы æртаг-сæрдæн æрмæджытæ – дизель генератортæн. Фæсауæрцтæн ис сæхи сæрмагонд бынæттæ æмæ сын сæвзæрæй тас нæу.

Уымæй дарддæр ма нæ бæстыхай бацалцæджытæ кодтам, хъармгæнæн системæ дæр бацæттæ кодтам. Афтæ ма кæнæм æндæр лыстæг техникон куыстытæ, кæцытæ.

Нæ кусæг персоналы рæнхъыты фылдæр кæнынц æвзонг фæлтæр. Уый мæнæн у тынг æхсызгон. Уадзæм урсаджы продукци. Балхæдтам ифтонгæрзтæ, цæмæй аразæм пельментæ, варениктæ æмæ æндæр ахæмтæ. Нæ фæнды ис ног бæстыхаймæ рахизын ацы азы кæрон, кæнæ та Ног, 2017 азы райдианты æмæ уæд уым нæ куысты уавæртæ бирæ фæуæрæхдæр уыдзысты.

Дзулфыцæн комбинатмæ куыстмæ æрбацæуыны рæстæджы мах алыхатт дæр æрдомæм медицинон  картæтæ. Цæмæй медицинон басгæрст рацæуа нæ кусæг, уый тыххæй йын мах баххуыс кæнæм æмæ йын бафидæм медицинон басгæрсты лæггæдтæн. Æгæрыстæмæй, нæм цы ахуыргæнинæгтæ фæкусынц, уыдонæй дæр æрдомæм медицинон басгæрсты тыххæй медкартæтæ. Уый нæ куысты у æнæмæнгхъæуæг æмæ йæм кæсæм тынг серьезон цæстæй.

Фæнды ма мæ банысан кæнын уый дæр, æмæ нæ кусджытæн фæстаг рæстæджы Цхинвалы хуыйæн фабрикæ «БТК – 4»-йы ныззакъаз кодтам спецдарæс. Тынг хорз рауад нæ хъуыддаг: нæ къух нын сарæзтой, дард цæуын нæ нал хъæуы. Спецдарæс йæ гъæдмæ гæсгæ дæр у тынг хорз æмæ та уыимæ иумæ нæ кусджытæй алкæмæндæр уый фадат ис, цæмæй бацæуа æмæ йын æй йæ размернтæм гæсгæ бахуыйой. Раздæр та-иу нæ ацæуын хъуыд Пятигорскмæ спецдарæсы тыххæй.

Нæ ассортимент дарддæр дæр кæндзæн фылдæр, иу хатт ма йæ зæгъон, нæ ног завод эксплуатацимæ лæвæрд куы рцæуа, уæдæй. Кондитерон продукци дæр нæ фæнды фæфылдæр кæнын. Абон нæ районты дæр рæстæгыл ифтонг кæнæм нæ продукцийæ, зæгъæм, Дзауы районмæ алы бон дæр ласынц дзул. Къуайса æмæ Знауырмæ та – къуыри цыппар хатты. Ленингормæ къуыри 2-3 хатты. Ногдзинæдтæ та нæм æнхъæлмæ кæсынц, ног  бæстыхаймæ куы рахизæм, уæд. Мæнмæ гæсгæ, дзулфыцæн комбинат цы продукци уадзы, уый адæмы зæрдæмæ цæуы. Уый у махæн нæ сæйрагдæр хæстæй сæ иу æмæ дарддæр дæр кусдзыстæм, цæмæй дзул дæр æмæ нæ комбинаты æндæр продукци дæр уа бæрзондгъæдджын, нырыккон технологитæм гæсгæ. Фæнды мæ, цæмæй цы уадзæм, уый уа хæрзад æмæ гъæдджын», – радзырдта Цхуырбаты Вадим.

Дзулфыцæн комбинаты директор куыд зæгъы, уымæ гæсгæ ахæм уæрæх ассортимент æмæ хæрзгъæд продукци Хуссар Федералон зылды æндæр æмæ æндæр регионты дæр нæй.

Иудзырдæй, абон дзулфыцæн комбинаты куыстмæ  фау æрхæссын зын у, уымæн æмæ дзы ис фæтк.

Ацы боны цытæн Цхинвалы дзулфыцæн  комбинаты къухдариуæгад æмæ кусджытæн арфæ кæны нæ редакцийы коллектив. Фæнды йæ уыдонæн фидар æнæниздзинад æмæ æнтыстытæ сæ фæрнджын æмæ хæрзиуæгон куысты.

 

Цхуырбаты Ларисæ

Comments are closed, but trackbacks and pingbacks are open.