Ӕнæмæнг уын искуы радзурдзынæн иу æввахс сылгоймаджы, дун-дунеон демократийы центры цæрæджы тыххæй. Абон та мæ фæнды, цивилизаци цы у, уый тыххæй мæ хъуыдытæ раргом кæнын… Уыцы сылгоймаджы ахасты фæдыл райгуырдис ацы монолог; йæ темæ алы хæрзуд адæймаджы дæр æвæлмонæй нæ ныууадздзæн.

Цал хатты-иу нæ ныхасы мидæг хæлæггæнгæйæ сдзырдтам «цивилизацион дуне», зæгъгæ? Советон Цæдисы рæстæджы райдыдта уыцы модæ. Сæттын, мæхæдæг дæр-иу ахæм ныхæсты стыр разæнгардæй истон хайад. Сæ витринæты нывтæ, сæ Голливуды рекламæтæ, сæ каталогтæ «Отто» æмæ «Неккерман»-ы къамтæм кæсынæй не ’фcæcтæн. Мæ хуызæттæ бирæ, тынг бирæ уыдис уæдыккон фæсивæды æхсæн. Раст зæгъгæйæ, хистæр кæнæ ацæргæ адæм дæр махæй дард нæ алыгъдысты. Уыдонæй дæр бирæтæ гипнозгондты хуызæн уыдысты. Нæ, нæ, мæхи нæ рæстытæ кæнын. Сæттын, рæдыдтæн.

Кæддæр, тынг раджы, скъоладзау ма куы уыдтæн, уæд уæдыккон «Советон Европæ», ома, Прибалтикæйы курорт Палангæйы баулæфыны амонд мæм æрхаудта. Мæ мадимæ ацыдыстæм. Балтийаг денджызы былгæроны пляж, гыццыл фалдæр та уæларвмæдзыд бæрзонд нæзы бæлæстæ цæсты раз лæууынц. Иухатт Вильнюсмæ куыд ацыдыстæм, дæлхæ-дзары аиварæзт къаннæг ресторанмæ дыууæ нæхи хуызæн туристимæ æхсæвæр куыд кодтам. Хæрæндоны фактурон æмæ романтикон интерьер бахъуыды кодтон — алы фынгыл дæр сойдзырагъ, дурджын лæгъз цар, æвзонг рæсугъд чызг уардиты чыргъæдимæ фынгты æхсæн рацу-бацу кæны. Тæмæссаг ныв! Кæй зæгъын æй хъæуы, ахæм «романтикæйы» фæстæ нæ районон центры хæрæндоны хуыз, кæнæ нæ хъæуы уынгты кæйдæр хæрæджы къуырмагæнæг уаст Вильнюсимæ абарын мæ хъуыдыйы дæр не рцыдаид. Куыд тынг нæ фæндыдис уыцы фыруæздан цивилизацимæ баввахс уæвын! Дзæвгар рæстæг мысыдыстæм нæ балц. О, куыд сыгъдæг сæм у! О, цы диссаджы культурон, æгъдауджын адæм сты! Цыфæнды æнæзонгæйыл дæр цæй райдзаст цæстæнгасимæ сæмбæлынц! Цы диссаджы рæсугъд хæдзæрттæ, дыргъдонтæ, цæхæрадæттæ, уæлмæрдтæ. Гъе уый дын æцæг цивилизаци, гъе!

90-æм азты та нын цæвиттон систы Германи, Голланди, Бельги… Мæ та ногæй… охх, бакæсут-ма, цы хуызæн рæсугъд хæдзæртты цæрынц! Интернет йемыдзаг у уыцы цæрæнбынæтты нывтæй. Ноджы фылдæр та дзы ис видеотæ. Æмæ æнæнымæц комментаритæ. Кæс æмæ та чидæр къам сæвæрдта æмæ йын йæ быны бафыста: бакæсут-ма, Германы цы диссаджы хъæутæ ис. Уыцы интернетон автортæн сæ фылдæр немыцы бæстæйы никуыдæр уыдысты. Ахæмтæн цас фæнды куы æмбарын кæнай, зæгъгæ, тынг ра-гæй дзы нал ис æцæг хъæутæ — нæ дæ хъусынц. Æцæгдзинады та Германы ис къаннæг горæттæ, кæцыты цæрджыты алы райсом дæр сæ куысты бынæттæм бахæццæйæн бахъæуы сæдæ километры сæрты ахизын. Кæннод та уыцы къаннæг горæтты цæрынц фæрæзджын пенсиисджытæ. Уæлдай рæсугъд æмæ уындджын бынæтты хуызмæ та уæлдай зылд цæуы туристтæн равдисыны тыххæй. Зæгъæм, Рейны цæугæдоны былгæрон ис ахæм туристон центр Обервезель. Мæ хорз зонгæ дзы фæцардис азæй фылдæр.

Рæсугъд бынæттæ сты æнæмæнг. Хæдзæрттæ, дидинæгдонтæ, пластикон тарæ исæг автоматы уындæй зæрдæ райы. Фæлæ æппæт уыдæттæ цивилизацийы бæрæггæнæнтæ сты æви нæ? Цы у уæддæр цивилизаци? Ацы фарстайы фæдыл æнæхъæн монографитæ фыст æрцыди. Æмæ уын ам мæхицæй алцызонæг специалист нæ сараздзынæн. Хуымæтæг зæххон адæймаджы зондахаст мын куыд амоны, уымæ гæсгæ мæ фæнды бафæлварын ахсджиаг фарстайы фæдыл мæ хъуыдытæ зæгъын.

Дæнцæг: зæгъæм, чидæр бавдæлд æмæ сафинаг, æлгъыстаг лæгмары сфæлыста, скодта йын йæ уæлæ зынаргъ æмæ зындгонд брендон смокинг, галстук ыл бабаста æмæ ма йын маникюр дæр сарæзта. Уыдæттæй йæ удысконд æндæрхуыз кæй не суыдзæн, уый дызæрдыккаг нæу. Хъуыды кæнут эсэсæгтæн сæ мундирты рæсугъддзинад? Гъе ахæм у Прибалтикæйы «рæсугъддзинад». Ахæм фæлгонц ис æцæг садисттæн дæр.

Уæдæ уæд куыд хъуамæ рахонæм ахæм адæймагхуыз цивилизацийы минæвæртты? Пластикон тарæйы автоматæй пайда кæнын кæд базыдтой, уæддæр цивилизацимæ ницы бар дарынц. Иугæндзонæй йæхи хуызæн адæмы чи цæгъды, сæрæгасæй чи баззадис, уыдоны цард та зындон чи фестын кæны, уый цавæр номы аккаг у? Адæймагдзинад кæм нæй, уым цивилизацийы кой гæнæн нæй. Кæд æмæ цивилизаци технократон ахуырад райсын, æрмæст буары домæнты цагъар фестын, мад, фыд, хъæбулы ферох кæнын, уæд, о, Европæ æмæ Прибалтикæ цивилизаци сты.

Мæнмæ гæсгæ æцæг цивилизаци у — зондæй æххæст адæймаджы ахаст йæхи хуызæн зондæххæстты царды аргъмæ — стыр хæзнайыл хъуамæ нымайай искæй цард, цыфæнды адæмыхатт, расæ, дины минæвар куы уа, уæддæр. Уæларвон тыгъдад нын нæ хицæндзинæдтæ нæ уыны. Профессор Евстафьев тынг раст ныффыста кæмдæр, зæгъгæ, дуне америкæгтæ, немыцæгтæ кæнæ уырыссæгтæ-ирæттæ-туркæгтæ-дзуттæгтыл æмæ а. д. нæ дих кæны! Дуне дих кæны сæрыгæстыл, мæрдтыл. Дих кæны, цардыл чи тох кæны, царды уæлахизы сæраппонд йæхи цард чи нæ бавгъау кæндзæн æмæ адæймаджы уд чи халы, мæлæт æмæ сæфты къахыл кæстæрты чи кæны, ахæм категоритыл.

Бахъуаджы сахат йæхи чи ферох кæны æмæ иннæты чи ирвæзын кæны, йæ куысты раззагдæр æмæ арæхсджындæр чи у, йæ дзырдæн — хицау, йæ бинонтæн — ныфсы хох, уыдонæй алкæмæ дæр лæмбынæг куы æркæсæм, уæд нæ цæстыты раз растдзæнис ЦАРД. Уæдæ уæд ахæм хатдзæг скæнæн ис — цивилизаци фыццаджыдæр у планетарон рацарæзтыл хъуыдыгæнæг, царддæттæг, тæригъæдгæнæг, адæймаджы уд рæсугъдгæнæг дуне. Ахæм цивилизацийы, хæдæгай, пластикон тарæ исæг автоматты ныхмæ ничи рацæудзæн.

Рæсугъд, æфснайд хæдзæртты æххормаг, сæдæгай гендертæм сæхихæссæг аууон-адæймæгтæ кæм цæры, уый цивилизацимæ ницы бар дары. Уый у æрмæстдæр тæрсынгæнæг декораци.

Tertium non datur. Æртыккаг дзы нæй.

ДАМБЕГТИ Иринæ

Comments are closed, but trackbacks and pingbacks are open.