Цымыдисон экскурси

Горæт Цхинвалы æмæ Знауыры районы астæуккаг скъолаты хистæркъласонтæ ацыдысты экскурсийы Гæззаты Вадимы номыл милицийы Сæрмагонд нысаниуæджы къордмæ. Скъоладзаутæн спецкъорды фæлтæрд кусджытæ радзырдтой ОМОН-ы сырæзты историйы цаутæ, йæ рæнхъыты цæсгомджынæй чи фæкуыста æмæ дзы Ирыстоны сæрвæлтау йæ цард чи радта, уыцы хæстонты тыххæй.

Экскурсийы рæстæджы спецкъорды физикон æмæ хæстон цæттæдзинады инструктор Коцты Алыксандр ахуырдзаутæн равдыста табелон æхсæнгæрзты хуызтæ, æрдзырдта сын сæ техникон характеристикæтыл æмæ дзы куыд хъæуы æнтыстджынæй пайда кæнын, уыдæттыл. Кæд æмæ æввахсмæ фенын æхсæнгарз зын нæу махмæ – бæрæгбонон мадзæлтты æмæ рейдты рæстæджы арæх вæййы фенæн барадхъахъхъæнæг органты сæ табелон æхсæнгæрзтимæ, уæддæр скъоладзауты зæрдæмæ тынг фæцыдысты инструкторы ныхæстæ, куы  сын райхæлдта йемæ архайыны сусæгдзинæдтæ, уыдæттæ.

Ахуырдзауты ма тынг цымыдис кодтой ОМОН-ы згъæрварс автотранспорты хуызтæ дæр  – БТР æмæ «Тигр». Фенын сын кодтой – мидæгæй куыд арæзт сты, куыд дзы хъæуы æдæрсгæйæ бахизын æмæ рахизын, цахæм службæйон хæстæ дзы ис сæххæст кæнæн сæ фæрцы. Сæ чысыл уазджытæн ОМОН-ы кусджытæ радзырдтой, куыд æмæ цахæм уавæрты фæахсынц фыдгæнджыты, æмæ сын æй равдыстой инсценировкæйы хуызы.  Фыдгæнджыты ролты дæр ахъазыдысты спецкъорды кусджытæ сæхæдæг. Экскурсийы ацы хай уæлдай тынгдæр фæцыд скъоладзауты зæрдæмæ.

Уымæй уæлдай ма сын фенын кодтой сæрмагонд æрмахуыр куыйты дæр, уыдон спецкъорды кусджыты æмрæнхъ æнтыстджынæй хæссынц службæ. Сæ фæрцы бæлвырд æрцæуынц фыдгæнджытæ, кæцытæ сусæгæй фæласынц æмæ фембæхсынц наркотиктæ, æхсæнгæрзтæ, хæлæн æрмæджытæ æмæ æндæр тæссаг предметтæ. Сæ цуры сын автомашинæйы хуылфы дæр æмæ уынгы дæр бавæрдтой хæлæн æрмæг æмæ стæй æрмахуыр куыдзы рауагътой, уый цыбыр рæстæгмæ сбæлвырд кодта тæссаг предметы æвæрæн бынат.

Скъоладзаутæн ахæм экскурситæ ОМОН-мæ фыццаг хатт не сты – ныр сæ схонæн ис традицион. Ахæм мадзал ма хæссы хъомыладон функци дæр – рæзгæ фæлтæрæн æвдисынц хорз æмæ æвзæр, æфтауынц  сæ раст хъуыдытыл.

ДЖИОТЫ Алыксандр