НЫХАС КОДТОЙ ТЕЛЕФОНЫ

Французаг фарсы инициативæмæ гæсгæ УФ-йы премьер-министр Дмитрий Медведев телефоны ныхас кодта йæ французаг коллегæ Эдуард Филиппимæ. Уыдон æруынаффæ кодтой дыууæ бæстæйы æмархайды актуалон фарстытыл, уыцы нымæцы базарадон-экономикон æмæ инвестицион фадгуыты æмгуыстады тыххæй.

ИНО-ЙЫ ÆДАСДЗИНАДЫ СОВЕТЫ РАБАДТÆЙ

Уæрæсе рацыд Сирийы фæдыл ИНО-йы Æдасдзинады советы хъусынгæнинаджы ныхмæ, – фехъусын кодта Организацийы УФ-йы æдзухон минæвары хæдивæг Владимир Сафронков. Дипломаты ныхæстæм гæсгæ, Æдасдзинады советы фæдыл коллегæтæ бафæлвæрдтой «Идлибы уавæр сзыгъуыммæ кæнынмæ». Уый ма банысан кодта, зæгъгæ, Ныгуылæны бахъæудзæн басæттын Сирийы ацы регионы кæй хицауиуæгад кæны «Джебхат ан-Нусра» æндæр номы бын.

УÆРÆСЕ СÆЙРАГ УАЗÆГ

Китайы горæт Сианы Зæлдаг фæндаджы 4-æм дунеон ЭКСПО-йы сæйраг уазæг ссис Уæрæсе. Ацы аз равдысты йæ базарадон-экономикон, инвестицион, туристон, ахуырадон æмæ зонадон потенциал æвдисы Уралы федералон зылд, кæцыйы стендтæ æрбаиу сты иугонд национ павильоны. Равдысты сæйраг темæ уыд «Новая эра», Новая ситуация. Новое развитие». Тематикон стендты куыстæй дарддæр ма мадзæлтты программæйы уыдысты 30 дунеон конференци æмæ форумæй фылдæр ахæм здæхтыты фæдыл, куыд экономикæ, базарад, культурæ, туризм, юриспруденци æмæ инвестицион æмгуыстад. Равдысты иумиаг фæзуат ацы аз у 8 мин квадратон метры.

ЛÆВÆРД ЫН ÆРЦЫД УФ-ЙЫ АДÆМОН НЫВГÆНÆДЖЫ НОМ

Цæгат Ирыстоны паддзахадон университеты нывкæнынадон аивады кафедрæйы сæргълæууæг Бедойты Шалвайæн лæвæрд æрцыд «УФ-йы адæмон нывгæнæджы» кадджын ном, нывкæнынадон аивады къабазы йе стыр лæггæдты тыххæй. Нывгæнæджы уацмыстæ æвæрд сты Санкт-Петербурджы Паддзахадон Уырыссаг музейы, Уæрæсейы нырыккон аивæдты музейы, Мæскуыйы Уæрæсейы аивæдты академийы музейы, АИШ-ы аивæдты центры (горæт Непл) æмæ бирæ æндæр рæтты.

УÆЛАХИЗЫ БОНЫ ЦЫТÆН

Стыр Фыдыбæстæйон хæсты Уæлахизы боны цытæн Беслæны ипподромы уагъд æрцыдысты бæхты дугътæ. Ерыстæм æрбацыдысты 4 мин адæймагæй фылдæр. Æрбамбырдуæвджытæ бакастысты цыппар дугъмæ æмæ конкурсмæ Цæгат Ирыстоны æмæ сыхаг республикæты хуыздæр жокейты æмæ бæхты хайадистæй. Призон фонд уыд 250 мин сомы.

ИВД ÆРЦЫДЫСТЫ УАГÆВÆРДТÆ

Уæрæсейы ивд æрцыдысты сывæллæтты пособиты райсыны уагæвæрдтæ. Фыццаг æмæ дыккаг сывæллоны тыххæй пособи райсыны тыххæй куырдиат бадæттæн ис кæцыфæнды горæты дæр. Æмбæлон закъон йæ тыхы бацыд 12-æм майы. Уый размæ сывæллæтты пособитæ райсæн уыд, æрмæстдæр адæймаг фыст кæм уыд, уым. Ныр пособитæ райсынæн нæ хъæуы, æгæрыстæмæй, рæстæгмæйон регистраци дæр. Ацы ног закъонæн ис стыр нысаниуæг, уымæн æмæ уæрæсейæгтæ арæх ивынц кæнæ та сæ фæнды сæ цæрæн бынат фæивын хуыздæр куыст æмæ куыстмызд ссарыны тыххæй.

ЙÆ ТЫХЫ БАЦЫД УЫНАФФÆ

10-æм майæ йæ тыхы бацыд Китайы товартыл фиддонттæ фæфылдæр кæныны тыххæй АИШ-ы уынаффæ.  Фиддонтæ хъуамæ фæфылдæр уыдаиккой 1-æм январæй, фæлæ цалдæр хатты уый фæдыл уынаффæ æргъæвд æрцыд фæстæдæр æмгъуыдмæ, уымæн æмæ Китай æмæ АИШ-ы ‘хсæн уагъд цыдысты базарадон баныхæстæ. Ныр китайаг товарты тыххæй фиддонтæ фидын хъæудзæн 10 проценты бæсты 25 проценты, ома, 200 миллиард доллары фылдæр. Дональд Трамп Китайы фæаххосджын кодта, базарадон конфликт æрбæстон кæныны фæдыл развæлгъау бадзырдтæ кæй не ‘ххæст кæны, уый тыххæй.

РАЙСДЗÆН ДЗУАППОН МАДЗÆЛТТÆ

Китай райсдзæн дзуаппон мадзæлттæ, китайаг товартыл АИШ фиддонтæ кæй фæфылдæр кодта, уый тыххæй, – хъусын кæны бæстæйы коммерцийы министрад. Министрады хъусынгæнинаджы нысан цæуы, зæгъгæ, китайаг фарсы ба-хъæудзæн æнæмæнгхъæуæг контрмадзæлттæ райсын. Фæлæ, уымæ нæ кæсгæйæ, Вашингтоны уагъд æрцыд дыууæ бæстæйы ‘хсæн базарадон баныхæсты 11-æм раунд, фæлæ АИШ æмæ Китайы къухты нæ бафтыд сразыдзинад райсын базарадон фиддонты тыххæй.

БАДЗЫРДТОЙ ИННОВАЦИТÆ РÆЗЫН КÆНЫНЫЛ

«Большая двадцатка»-йы бæстæты хъæууон хæдзарады министртæн сæ къухты бафтыд бадзурын инновацитæ æмæ ног технологиты рæзт фæактивондæр кæныны тыххæй. Министртæн фембæлд уыд япойнаг горæт Ниигатайы æмæ цыд дыууæ боны дæргъы. Мадзæлтты фæстиуджытæм гæсгæ ист æрцыд иумиаг деклараци.

РАЙСТА ЗАКЪОНЫ ПРОЕКТ

Францы национ æмбырд райста закъоны проект зынгсирвæзты хъыгдардбаййафæг Парижы Мады Майрæмы аргъуан сæндидзын кæныны тыххæй. Документыл уынаффæ кодтой 13 сахаты дæргъы. Проект райсыны фæстæ æрвыст æрцыд æркæсынмæ Сенатмæ æмæ йын кæройнаг уынаффæ рахæсдзысты 27-æм майы.

ПРОТЕСТОН АКЦИТÆ

Албанийы столицæ Тиранайы хицауады ныхмæ протесттæ рахызтысты ныхмæлæудтытæм. Албанийы оппозицийы мингай фарсхæцджытæ æрсидтысты хицауады отставкæмæ æмæ æмгъуыдæй раздæр парламентон æвзæрстытæ ауадзынмæ. Тиранайы парламенты бæстыхайы цур протестгæнджытæ æрдомдтой министрты советы сæрдар Эди Рамы отставкæ. Протестгæнджытæ барадхъахъхъæнæг органты кусджытыл æппæрстой петардатæ æмæ Молотовы коктейлтæ.  Хъыгдард баййæфтой барадхъахъхъæнæг органты 13 кусæджы. Оппозици бæстæйы премьер-министры аххосджын кæны коррупцийы æмæ организацигонд фыдракæнддзинадимæ бастдзинæд-тæй. Оппозицион лидертæ æрсидтысты адæммæ, цæмæй дарддæр дæр протест кæной, цалынмæ премьер отставкæйы нæ ацæуа, уæдмæ.

ФÆМАРД СТЫ СЫВÆЛЛÆТТÆ

Афганистаны хуссар хайы фæндаджы цур æвæрд минæ кæй спырх, уый фæстиуæгæн фæмард сты авд æнахъомы. Рæмудзæн æрмæг «Талибан»-ы боевиктæ сæвæрдтой сæйраг автотрассæтæй сæ иуы афгайнаг æдасдзинады тыхты кусджыты амарыны тыххæй. Фæлæ срæмыгъды амæттæгтæ систы авд сывæллоны, кæцытыл цыд авд азæй фараст азы онг. Уыдонæй цыппар уыдысты иу бинонтæй. Ноджы ма дыууæ сывæллоны та цæфтæ фесты.

Информацион агентадты хъусынгæнинæгтæм гæсгæ

Comments are closed, but trackbacks and pingbacks are open.