ДÆ ЦÆСТ АХÆСС ДУНЕЙЫЛ

Сирийы фехстой базырджын ракетæтæй

14-æм апрелы райсомы 4 сахатыл (мæскуыйаг рæстæгмæ гæсгæ) ныгуылæйнаг бæстæты коалици АИШ, Стырбритани æмæ Францы скондæй ракетон-бомбæйон цæф ныккодта Сирийаг Арабаг Республикæйы. Æдæппæтæй Сирийыл рауагъдæуыд 100 ракетæйæ фылдæр. УФ-йы Фæсарæйнаг хъуыддæгты министрады хъусынгæнинагмæ гæсгæ, уыцы ракетæтæн сæ фылдæры спырх кодтой Сирийы Уæлдæфон хъахъхъæнынады фæрæзтæй. Сирийы атакæйы хайад истой наутæ æмæ бомбæзгъалæн хæдтæхджытæ. Америкæйаг фарс Уæрæсейæн нæ фехъусын кодта йæ плæнтты тыххæй. Ныгуылæйнаг коалици Сирийы ракетон цæф кæй ныккодта, уый цæхгæр æвзæрыл банымадта Уæрæсейы къухдариуæгад. Уæрæсейы инициативæйæ ауагътой ИНО-йы Æдасдзинады советы экстренон рабадт, фæлæ  Сирийы фæдыл уæрæсейаг резолюци райст не ‘рцыд. «Уый у кæуинаг бон ИНО-йæн дæр æмæ æнæхъæн дунейæн дæр», – загъта ИНО-йы УФ-йы æдзухон минæвар Василий Небензя.

Нæ рахæцыдысты хæстон операцийы æвварс

Ис паддзахадтæ, уыцы нымæцы НАТО-йы бæстæтæй дæр, кæцытæ нæ рахæцыдысты Сирийы Вашингтон æмæ йе ‘мцæдисонты архайдтыты æвварс.  Италийы премьер-министр Паоло Джентилони, Грецийы хицауады сæргълæууæг Алекс Ципрас банысан кодтой сæ позицийы тыххæй, зæгъгæ, хайад нæ райсдзысты Сирийы хæстон операцийы. Æввахс Хурскæсæны хæстон операцийæн карзæй стæрхон кодта Иран. Тегераны фехъусын кодтой, зæгъгæ, Дамаскы ныхмæ агресси у ацы бæстæйы террористтæ састы бынаты кæй баззадысты, уый фæдыл мастисæн æмæ æрсидт дунемæ, цæмæй стæрхон кæной АИШ, Франц æмæ Стырбританийæн æмæ иумæ фæлæууой сæ ныхмæ.

«Мисси æххæст æрцыд»

Сирийыл америкæйаг æфсæддонтæ ракетæтæ кæй рауагътой, уый АИШ-ы президент Дональд Трамп схуыдта идеалон. «Бузныг Франц æмæ Стырбританийæн сæ куырыхондзинад æмæ тыхджын гарзджынты тыхты тыххæй. Мисси æххæст æрцыд!», – ныффыста Трамп «Твиттеры» йæ фарсы.

УФ-йы Генералон штабы брифинг

УФ-йы Генералон штаб брифинджы лыстæггай радзырдта Сирийы уæлдæфон атакæйы тыххæй. Сирийыл Ныгуылæн коалицийы ракетон цæфтæ ахастой 1 сахат æмæ 28 минут. Тартус æмæ Хмеймимы базæты регистраци æрцыд 103 ракетæйы, уыдонæй иу дæр нæ батахт уæрæсейаг комлексты цурмæ. Сирийаг æфсад советон техникæйы руаджы фæлæууыд нырыккон ракетæты ныхмæ. Æрцахстой 71 базырджын ракетæйы. Сæ ныхмæ архайдтой сирийаг хъахъхъæнынадон фæрæзтæ ПВО С-125, С-200, «Бук», «Квадрат» æмæ «Оса».

Путины хъусынгæнинаг

УФ-йы Президент Владимир Путин сарæзта хъусынгæнинаг ИНО-йы  Æдасдзинады советы æнæ санкцийæ Сирийы АИШ æмæ йе ‘мцæдисонтæ ракетон цæф кæй ныккодтой, уый фæдыл. Путин банысан кодта, зæгъгæ, куыд иу азы размæ, уæд америкæйæгтæ спайда кодтой химион хæцæнгарзæй «спайда кæнын»-ы провокацийæ æмæ ракетæтæй сатакæ кодтой авиабазæ Шайраты, афтæ  та ныр дæр провокацийæ  спайда кодтой барæй саразгæ сценарийæ.  Уæрæсейаг лидер банысан кодта, зæгъгæ, химион хæцæнгарз ма уадзыны фæдыл организаци сирийаг горæт Думамæ арвыста экспертты, цæмæй сбæрæг кæна, химион атакæ дзы уыд, æви нæ, уый. «Фæлæ ныгуылæйнаг бæстæты къорд циникон æгъдауæй ницæмæ æрдардта уыцы факт æмæ райдыдта хæстон операци», – загъта Путин.

Протесты акцитæ

Дунейы бирæ бæстæты уагъд цæуынц протестон акцитæ Сирийы хæстон операцийы фæдыл. Вашингтоны акцийы хайадисджытæ рацыдысты Урс хæдзары цурты ахæм плакаттимæ: «Нет войне» æмæ «Руки прочь от Сирии». Туркы та АИШ-ы минæварады цур протестгæнджытæ америкæйаг фарсы æмæ ацы бæстæйы æмцæдисонты схуыдтой «АИШ æмæ сæ бандæ».

Уæрæсейаг парламентариты визит

Сиримæ визитимæ чи æрцыд, уыцы уæрæсейаг парламентаритæ æмæ Ханты-Мансийскы автономон зылд Юграйы губернатор Наталья Комарова сæхи цæстæй федтой, Сирийы кæй сатакæ кодтой, уыцы хъуыддаг сирийæгты сæ бæстæйы къухдариуæгады алыварс кæй æрбангом кодта, уый. Суверенон паддзахады ныхмæ радон агрессийы рæстæджы символикон факт ссис уый, æмæ бадзырдты хъусдард здæхт кæй æрцыд Сирийы экономикæ сæндидзын кæныны фарстытæм æмæ уыцы процессы Уæрæсейы хайадистмæ. Уæрæсейаг делегаци бабæрæг кодта Скæсæйнаг Гутайы, уыцы нымæцы горæт Думайы. Уæрæсейаг парламентаритæ фæмбæлдысты Сирийы Президент Башар Асад æмæ бæстæйы премьер-министр Имад Хамисимæ. Министрты кабинеты сæргълæууæг банысан кодта, зæгъгæ, уæрæсейаг хъуыддагон адæймæгтæн арабаг республикæйы лæвæрд æрцæудзысты максималон преференцитæ бизнесы æппæт хуызты.

Саргъ кодта Сирийы æндидзынадæн

Сирийы президент Башар Асад Сирийы æндидзынадæн саргъ кодта 400 миллиард доллары. «Бæстæйы ныппырхгонд инфраструктурæйæн бахъæудзæн 400 миллиард доллары æмæ 10-15 азы, – фехъусын кодта Асад уæрæсейаг делегациимæ фембæлды рæстæджы. Уымæй дарддæр ма Асад стыр аргъ скодта Советон Цæдисы рауагъд хæцæнгæрзты гъæдæн, кæцыйы руаджы сирийаг æфсад ныхкъуырд радта  ракетон цæфтæн. «Мах федтам америкæйаг агресси. Æмæ нæ бон ссис атакæтæн 70-азты рауагъд советон хæцæнгæрзтæй ныхкъуырд радтын», – загъта Сирийы сæргълæууæг.

Æфсæддон комитеты рабадт

Астанайы уагъд æрцыд Коллективон æдасдзи-нады тыххæй Бадзырды организацийы æфсæддон комитеты (ОДКБ) рабадт. Рабадты хатдзæгтæм гæсгæ ОДКБ-йы Иугонд штабы хистæр инæлар-булкъон Анатолий Сидоров банысан кодта, зæгъгæ, фембæлды рæстæджы къухты бафтыдысты къорд бадзырды саразын, кæцытæ здæхт сты Организацийы паддзахадтæ-хайадисджыты коллективон æдасдзинад сфидардæр кæнынмæ. Рабадт уагъд æрцыд хъахъхъæнынады национ университеты Республикæ Казахстаны Гарзджын тыхты генералон штабы хистæр Мурат Майкеевы сæрдариуæгадæй. Рабадты размæ делегациты сæргълæуджыты йæхимæ райста Республикæ Казахстаны хъахъхъæнынады министр Саке Жасузаков.

«Крымская волна»

Знон, 16-æм апрелы йæ фыццаг бæлццæтты райста Симферополы дунеон аэропорты  ног аэровагзалон комплекс. Рейс Мæскуы-Симферополь аэропорты æрбадт 08.20 сахатыл. Аэропорты ног терминалы проект сарæзта Цæгат Кореяйы дунеон зындгонд архитектурон компани Samoo Architects & Engineers. Уыдонæн Хъырымы æрдæгсакъадахы æрдз сæ зæрдæмæ афтæ тынг фæцыд æмæ дизайнертæ систой денджызы фæлгондз, проекты «Крымская волна» схонгæйæ. Денджызы уылæны хуызæн комплексы специалисттæ смонтаж кодтой 5,7 тоннæйы згъæрæй конструкци. Терминал арæзт æрцыд дыууæ азæй чысыл къаддæрмæ. Симферополы аэропорты ног терминал саразыны тыххæй уынаффæ райстæуыд 2014 азы Хъырым Уæрæсемæ куы æрбаиу, уый фæстæ.

Информацион агентадты

хъусынгæнинæгтæм гæсгæ