ДÆ ЦÆСТ АХÆСС ДУНЕЙЫЛ

Дунеон экономикон форум

24-æм майы Санкт-Петербурджы йæ куыст райдыдта дунеон экономикон форум, цыран хайад исынц 15 мин адæймаджы дунейы 140 бæстæйæ. Форуммæ æрцыдысты Францы Президент Эммануэль Макрон, Японы премьер-министр Синдзо Абэ, Дунеон валютон фонды къухдариуæггæнæг Кристин Лагард æмæ æндæр бæрнон адæймæгтæ. Уыдон хайад райстой форумы пленарон рабадты.

Коллегæты фембæлд

УФ-йы Президент Владимир Путин фембæлд Францы президент Макронимæ. Фембæлд ахаста цыппар сахатмæ æввахс. Уыдон æуынаффæ кодтой Ираны ядерон программæйæ АИШ-ы рахызтыл, Сири, Украинæйы уавæрыл æмæ æндæр ахсджиаг фарстытыл. Фембæды фæтæ дыууæ лирерæн пресс-конференци уыд журналисттимæ.

Канцлеры балц Китаймæ

Герман æмæ Китайы хицауадты ‘хсæн рабадтмæ канцлер Ангела Меркелимæ æрцыдысты егъау бизнесы 18 минæвары. Автомобилон, электронон, фармацевтон æмæ немыцаг сæудæджерады æндæр фадгуыты минæвæрттæ хайад райстой китайаггермайнаг экономикон комитеты рабадты. Немыцаг бизнесгæнджытæ фæнд кæнынц Скæсæны сæхицæн ног перспективæтæ байгом кæнын.

Ликвидаци æрцыд

ядерон полигон

24-æм майы Цæгат Корея сликвидаци кодта ядерон хæцæнгæрзты фæлварæнтæ уадзæн  полигон «Пхунгери». Цæгат Кореяйы æфсæддонтæ цалдæр бæстæйы журналистты цур спырх кодтой æртæ фæлварæн шахтæйы. Уымæй дарддæр ма уыдон скуынæг кодтой цæстдарæн уæлзæххон пункттæ æмæ æндæр объекттæ. Афтæмæй Пхеньян равдыста ядерон фæлварæнтæ дарддæр кæй нал уадздзæн, уый. Журналистты ныхæстæм гæсгæ, срæмыгъд афтæ тыхджын уыд, æмæ йын йæ уылæн банкъардтой полигонæй æрдæг километры дæрддзæгæн.

 

АИШ-ы ядерон гæнæнты тыххæй

АИШ-ы президент Дональд Трамп Цæгат Кореяйы лидер Ким Чен Ынæн йæ фыстæджы фехъусын кодта АИШ-ы ядерон егъау гæнæнты тыххæй. «Ды дзурыс дæ ядерон гæнæнты тыххæй, фæлæ нæ ядерон тыхтæ афтæ егъау æмæ хъомысджын сты æмæ æз Хуыцаумæ кувын, цæмæй сæ спайда кæныны сæр макуы бахъæуа»,  дзырдæуы Трампы фыстæджы.

Кæны ног санкцитæ  сæвæрыны фæнд

АИШ-ы президенты администраци, гæнæн ис, иннæ къуыри бакæна ног санкцитæ Пхеньяны ныхмæ. Уый размæ Урс хæдзары сæргълæууæг аивта Цæгат Кореяйы лидер Ким Чен Ынимæ фембæлд, кæцы хъуамæ уагъд æрцыдаид 12 июны Сингапуры. Трампы ацы хъусынгæнинагæй цалдæр сахаты размæ Цæгат Корея скуынæг кодта йæ иунæг ядерон полигон, кæцыйæн сæндидзынгæнæн нал уыдзæн. Трампы ацы уынаффæйы фæстæ Сеулы уыд Æдасдзинады советы экстренон рабадт. Хуссар Кореяйы президент Мун Чжэ Ин æрсидт бæстæтæм фембæлд ауадзыны тыххæй.

Цæгат Кореяйы реакци

Цæгат Кореяйы сарæзтой фыццаг хъусынгæнинаг АИШ-ы президент Дональд Трампы ног демаршы фæстæ, кæцы аивта ацы бæстæйы лидер Ким Чен Ынимæ историон фембæлд. Цæгат Кореяйы фæсарæйнаг хъуыддæгты министры хæдивæг Ким Ке Гвана фехъусын кодта, зæгъгæ, Трампы уынаффæ у дунеон æмæхсæнады фæндæтты ныхмæ. «Мах араздзыстæм æппæт дæр дунейы æмæ Кореяйы æрдæгсакъадахы сабырдзинад æмæ стабилондзинад къухты бафтын кæныны тыххæй. Мах æргом стæм, цæмæй АИШ-æн радтæм рæстæг æмæ фадат. Мах раздæрау цæттæ стæм АИШ-имæ бадзырдтæм», – банысан кодта уый.

Уынаффæ кодтой саммитмæ бацæттæ кæныны тыххæй

УФ-йы Фæсарæйнаг хъуыддæгты министр Сергей Лавров телефоны йæ аргентинæйаг коллегæ Хорхе Фориимæ ныхас кæнгæйæ, æруынаффæ кодта «Большая двадцатка»-йы саммитмæ бацæттæ кыныны тыххæй, кæцы плангонд цæуы 30 ноябрæй -1 декабрмæ ауадзын. Министртæ бафидар кодтой уæрæсейаг-аргентинæйаг стратегион партнерондзинад сфидардæр кæныны фæндон, æруынаффæ кодтой боны фæткы дыууæфарсон æмæ дунеон къорд фарстытыл, уыцы нымæцы Буэнос-Айресы саммитмæ бацæттæ кæныны тыххæй дæр.

Æфсæддон æмгуыстадмæ

цымыдисдзинад

Уæрæсе цымыдис кæны Казахстанимæ æппæтфарсонæй æфсæддон æмгуыстад, афтæ ма ацы бæстæимæ æфсæддонтехникон бастдзинæдтæ рауæрæхдæр кæнынмæ, – уый тыххæй фехъусын кодта УФ-йы Хъахъхъæнынады министр Сергей Шойгу Казахстаны президент Нурсултан Назарбаевимæ фембæлды рæстæджы. «Уæрæсейы стыр аргъ кæнынц дæ архайдæн. Ды дæ фæлтæрд къухдариуæггæнæг, кæцы реалонæй æмбары уавæры вазыгджындзинад æмæ уæвæг тæссагдзинæдтæ. Владимир Путин мын бахæс кодта демæ фембæлын æмæ регионы цæуæг цаутыл æруынаф-фæ кæнын», – загъта Шойгу. Афтæ ма уæрæсейаг министр сæрмагондæй банысан кодта, зæгъгæ, Уæрæсе æмæ Казахстаны ‘хсæн æфсæддон æмгуыстады ахсджиаг аспект у Централон Азийы регионы æдасдзинады тæссагдзинадты фæдыл оперативонæй дыууæфарсон архайд.

Симпозиум Eurock 2018

50 бæстæйы ахуыргæндтæ, уыцы нымæцы АИШ, Австрали, Канадæ æмæ Германæй æрцыдысты Санкт-Петербургмæ Дунеон Европæйаг симпозиум Eurock 2018-мæ, кæцы байгом хæххон университеты Васильевскы сакъадахы. Симпозиумы хайадисджытæн арфæйы ныхæстæ æрбарвыста Петербургы губернатор Георги Полтавченко. Симпозиумы хайадисджытæ æруынаффæ кодтой зонады актуалон фарстытыл, кæрæ-дзийæн радзырдтой фадыджы инженерон фæстаг бакуыстыты тыххæй.

Фыццаг интервью

Йе ‘нæниздзинад фæхуыздæр, афтæмæй Юлия Скрипаль радта йæ фыццаг интервью. Уæрæсейаг чызгæй интервью райстой  Reuters-ы журналисттæ, Стырбританийы полицийы руаджы. Йæ ныхæстæм гæсгæ уый ныфс ис «фидæны искуы йæ хæдзармæ, Уæрæсемæ рыздæхынæй».

Æрæвналдзысты гуманитарон акцитæм

Сирийы Гарзджын тыхтæ террористтæй æххæстæй ссыгъдæг кодтой палестинæйаг лигъдæтты лагерь Ярмукы, кæцы ис Дамаскы цур. Ацы операцийы фæстæ бæстæйы хицауады æфсæд-тæ æрæвналдзысты гуманитарон акцитæм, кæцытæ здæхт сты бынæттон цæр-джытæн баххуыс кæнынмæ. Ярмукы анклав уыд террористты фæстаг бынат сирийаг столицæмæ æввахс æмæ  уымæ гæсгæ йе ссæрибар кæнынæн уыд уæлдай ахсджиаг нысаниуæг. Ацы районы сæрыл тохтæ цыдысты иу мæйы бæрц.

Æрбаздæхтысты сæ хæдзæрттæм

Скæсæйнаг Гутайы гуманитарон уавæр кæй фæхуыздæр, уый 66 мин цæрæгæй фылдæрæн радта сæ хæдзæрттæм æрбаздæхынæны фадат. Уый тыххæй журналисттæн фехъусын кодта Сирийы знагиуæггæнæг фæрсты фидыдады уæрæсейаг центры хистæр, инæлар-майор Юрий Евтушенко. Йæ ныхæстæм гæсгæ, сабыр цæрджыты æдасдзинад сифтонг кæныны тыххæй уæрæсейаг æфсæддон полици æппынæдзух хъахъхъæны Скæсйнаг Гута, Скæсйнаг Каламун, Ярмукы, Эр-Растаны æмæ Телль-Бисейы.

Информацион агентадты

хъусынгæнинæгтæм гæсгæ