2017 азы кæрон Цхинвалы эксплуатацимæ лæвæрд æрцæудзæн ног, нырыккон домæнтæн дзуапп чи дæтта, ахæм операцион-хирургион корпус гемодиализы центримæ. Уый арæзт цæуы Республикон соматикон рынчындоны фарсмæ.

Бæрæг куыд у, афтæмæй ацы проект реализаци цæуы 2015-2017 азты Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты. Объекты заказгæнæг у Хуссар Ирыстоны Арæзтад, архитектурæ æмæ цæрæнуатон-коммуналон хæдзарады министрад. Объекты генералон подрядон та у цæгатирыстойнаг фирмæ арæнгонд бæрндзинадимæ æхсæнад «Мегаполис-Т».

Фирмæ «Мегаполис-Т»-йы генералон директор Гæджиты Игоры ныхæстæм гæсгæ, абоны онг объекты æххæст цæуынц мидæггагон сæрдæн куыстытæ.

«Мидæггагон куыстытæ æххæст кæнынæн, æндæр бæрæггæнæнтимæ, иумæ приоритетон нысаниуæг ис, бæстыхайы мидæгæй цы æрмæджытæй пайда цæуы, уыдоны экологион æдасдзинадæн. Æрмæджыты куы уа зианхæссæг буарадтæ, уæд уыдон уæлдæфимæ иу кæндзысты æмæ æндавдзысты рынчын пациентты æнæниздзинадыл. Уый фæстиуæгæн, мидæггагон куыстыты тыххæй цы æрмæг æлхæд цæуы, уыдон равзарæм, се сконды зианхæссæг буарадтæ ис æви нæ,  уый лæмбынæг сахуыр кæнгæйæ», — банысан кодта Гæджиты Игорь æмæ ма йæ ныхасмæ бафтыдта, зæгъгæ, хирургион корпус æддейæ уыдзæн алюмин композитон æрмæгæй конд.

«Фасад конд уыдзæн композитæй — бæстыхайы æддаг къултыл монтажгонд уыдзæн фидар, зынгæнфæразон æмæ хъармуромæн панелтæй. Уыдон сты дыууæ алюмин сыфæй конд, сендвичты хуызæн, се ‘хсæн та ис полимерон æрмæг. Фасад композитæй конд кæй у, уый йын йе ‘ддаг хуызæн дæтты нырыккон бæстыхайы хуыз, хуыздæр ын кæны йæ мидæггагон микроклимат, хъахъхъæны йæ нæ алыварс алфæмблайы зианхæссæг æндæвдадæй, уый фæстиуæгæн бæстыхай фылдæр фæлæууы», — банысан кодта Гæджиты Игорь. Ныртæккæ объекты кусы 65 адæймаджы, архайынц дзы дæс иуæджы уæззау техникæ.

Хирургион корпус рынчындоны бæстыхаимæ иу уыдзæн дыууææмвæзадон бахизæнæй.

Comments are closed, but trackbacks and pingbacks are open.