Хуссар Ирыстоны алыгъуызон къабæзты кусджытæ цæуынц квалификаци бæрзонддæргæнæн курсытæ куыд онлайн, афтæ боны форматы дæр. Он-лайн форматы курсыты рæстæджы фадат ис цыфæнды рæстæджы дæр лекцитæм байхъусынæн. РХИ-йы Ахуырад æмæ зонады министрады цур Ахуыргæнджыты квалификаци бæрзонддæргæнæн институты директор Къæбулты Заирæ  нын куыд фехъусын кодта, уымæ гæсгæ курсытæ уагъд цæу-дзысты декабры онг боныфæсаууонмæ форматы. 15 ноябрæй 19 ноябры онг курсытæ уагъд цыдысты боны форматы.

19-æм ноябры хуссарирыстойнаг ахуыргæджытæн  фесты боны форматы квалификаци бæрзонд-дæргæнæн курсытæ, кæцытæ уагъд цыдысты нæ горæты 6-æм астæуккаг скъолайы базæйыл къуырийы дæргъы. Курсыты хайад райстой республикæйы скъолаты  уырыссаг æмæ англисаг æвзæгты, райдиан кълæсты æмæ бирæпрофилон колледжы ахуыр-гæнджытæ.

Йæ ныхæстæм гæсгæ курсытæм стыр цымыдисæй цæуынц ахуыргæнджытæ. Сæ ауадзыны тыххæй Хуссар Ирыстонмæ æрцыдысты Цæгат Кавказы Федералон университеты ахуыргæнджыты иу къорд, кæцыты ‘хсæн сты педагогон зонæдты кандидаттæ Светлана Пашина, Оля Гуменная, Лиана Вартанова, психологон æмæ философон зонæдты кандидаттæ Светлана Беловодова æмæ Людмила Белоусова. Къорды къухдариуæггæнæг у доцент, юридикон зонæдты кандидат, Цæгат Кавказы Федералон университеты юридикон институты директоры хæдивæг Алексей Жуков.

«Уый размæ та ахуыргæнджытæн курсытæ уагъд цыдысты онлайн форматы. Курсытæ рацæуыны тыххæй сертификаттæ нæма райстой, фæлæ ахуыргæнджытæ райстой тесттæ æмæ уыдон хатдзæгтæм гæсгæ мах аскъуыддзаг кæндзыстæм сертификаттæ сын радтæм, æви ма сын уæлæмхас онлайн-ахуыртæ ауадзын бахъæудзæн сæ зонындзинæдтæ баххæст кæныны тыххæй», — загъта уый.

Фæлæ йæ ныхæстæм гæсгæ, ахуыргæнджытæ мадзалы куыд активонæй хайад исынц æмæ сæ лектортимæ куыд ныхас кæнынц, уымæ гæсгæ зæгъæн ис афтæ, æмæ иууылдæр кæй райсдзысты сертификаттæ. «Республикæ Хуссар Ирыстон æмæ Уæрæсейы Федерациимæ æмгуыстады тыххæй сразыдзинад арæзт æрцыд РХИ-йы Хицауады хъæппæрисмæ гæсгæ. Ацы проект реализаци кæны Цæгат Кавказы Федералон университет. Ацы университетæн стыр фæлтæрддзинад ис ахæм курсытæ организаци кæныны», — банысан кодта Къæбулты Заирæ.

Квалификаци бæрзонддæргæнæн курсытæ райдыдтой сентябры мæйы. Уæлæмхас ахуырады программæ у уæрæх. Коронавирусы пандеми кæй апарахт, уымæ гæсгæ курсытæ фылдæр уагъд цæуынц онлайн-форматы.

Банысан кæнын хъæуы уый дæр, æмæ 19 октябрæй 23-æм октябрмæ нæ горæты 2-æм астæуккаг скъолайы квалификаци бæрзонддæргæнæн курсытæ кæй рацыдысты нæ республикæйы скъолаты физикæ, математикæ, истори æмæ æхсæнадзонад  æмæ физкультурæйы ахуыргæнджытæ. Нæ республикæйы коронавирусы пандемийы апарахаты фæстиуæгæн карантин баконд кæй æрцыд, уымæ гæсгæ æрхонгæ специалисттæ æмæ республикæйы скъолаты ахуыргæнджытæ кæрæдзимæ радтой сæ координаттæ æмæ афтæмæй курсытæ уагъд цыдысты æмæ абоны онг дæр цæуынц онлайн-режимы. Специалистты хæс у нырыккон ахуырадон технологитæ æмæ зонадон-методикон бакуыстытимæ базонгæ кæнын.

23-æм октябрæй 29-æм октябрмæ та квалификаци бæрзонддæргæнæн курсытæ уагъд цыдысты астæуккаг скъолаты химийы ахуыргæнджытæн, сабидæтты хъомылгæнджытæ æмæ сæргълæуджытæн, республикæйы скъолаты директортæн. Къæбулты Заирæ куыд банысан кодта, уымæ гæсгæ мадзæлтты комплексы фæлгæтты сæ квалификаци фæбæрзонддæр кæндзысты хуссарирыстойнаг 1000 бæрц специалисты, уыцы нымæцы педагогон кусджытæ, ахуырады системæйы управленийы кусджытæ, паддзахадон æмбæстагон службæгæнджытæ, аразджытæ æмæ энергетиктæ. Ахуырты фылдæр хай уагъд цæуы онлайн-режимы. Ныридæгæн курсытæ рацыдысты хуссарирыстойнаг  сæдæгай специалисты. Курсыты хатдзæгтæм гæсгæ, хъусджытæ райсдзысты документтæ квалифкаци бæрзонддæргæнæн курсытæ кæй рацыдысты, уый тыххæй.

ДЖИОТЫ Екатеринæ

 

Comments are closed, but trackbacks and pingbacks are open.